ເມື່ອວັນທີ 16 ກໍລະກົດ 2023 ຜ່ານມາ ທີມທອັກ ສື່ດັງຂອງວົງການບານເຕະ ລາຍງານໂດຍອ້າງແຫຼ່ງຂ່າວຈາກແອັດສະປາຍວ່າ ແມນເຊັສເຕີ ຢູໄນເຕັດ ທີມດັງຂອງ ພຣີເມຍລີກ ອັງກິດ ຫວັງຈະຄວ້າຕົວ ເດວິດ ອາລາບາ ກອງຫຼັງຂອງ ຣີວ ມາດຣິດ ສະໂມສອນຍິ່ງໃຫຍ່ ລາ ລີກາ ແອັດສະປາຍ ມາເສີມຄວາມແຂງແກ່ນໃນເກມຮັບ ໃນໄລຍະຕະຫຼາດນັກເຕະລະດູຮ້ອນນີ້
ແມນເຊັສເຕີ ຢູໄນເຕັດ ຕົກເປັນຂ່າວວ່າຕ້ອງການນັກເຕະໃໝ່ໃນຫຼາຍຕຳແໜ່ງ ລວມທັງກອງກາງ, ກອງໜ້າ, ຜູ້ຮັກສາປະຕູ. ລວມເຖິງກອງຫຼັງ ເຊິ່ງອາດມີການຫຍັບຕົວກ່ອນປິດຕະຫຼາດນັກເຕະໃນລະດູຮ້ອນນີ້ ຫາກສາມາດຂາຍ ແຮຣີ ແມັກກວັຍ ອອກໄປໄດ້ ເພື່ອນໍາເງິນມາເພີ່ມໃນງົບປະມານເສີມທັບ ໂດຍຕອນນີ້ມີ ເວສແຮມ ຢູໄນເຕັດ ທີມຮ່ວມເວທີພຣີເມຍລີກ ທີ່ສົນໃຈຄວ້າຕົວໄປຮ່ວມງານ.
ແຫຼ່ງຂ່າວລະບຸວ່າ ແມນເຊັສເຕີ ຢູໄນເຕັດ ທີ່ພາດການຄວ້າຕົວ ຄິມ ມິນເຈ ເຊິ່ງເລືອກຍ້າຍຈາກ ນາໂປລີ ໄປ ບາເຢິນ ມິວນິກ ແທນນັ້ນ ໄດ້ຫັນມາເພັ່ງເລັງໄປທີ່ ດາວິດ ອາລາບາ ກອງຫຼັງທີມຊາດໂອຕຣິສ ຂອງ ຣິວ ມາດຣິດ ອາຍຸ 31 ປີ ເຊິ່ງຫຼິ້ນໄດ້ທັງແບັກຊ້າຍ ແລະ ກອງຫຼັງຕົວກາງ
ເຖິງວ່າ ດາວິດ ອາລາບາ ຈະຍັງເຫຼືອສັນຍາອີກ 3 ປີ ແຕ່ ແມນເຊັສເຕີ ຢູໄນເຕັດ ກໍເຫັນວ່າ ຫາກ ຣີວ ມາດຣິດ ໄດ້ຮັບຂໍ້ສະເໜີທີ່ໜ້າພໍໃຈ ກໍອາດຍອມຂາຍໃຫ້ກໍໄດ້ ເຊັ່ນດຽວກັບທີ່ເຄີຍຄວ້າຕົວ ຣາຟາເອວ ວາຣານ ແລະ ຄາເຊມິໂຣ ໃນ 2 ລະດູການທີ່ຜ່ານມາ ໂດຍລາຍງານເປີດເຜີຍວ່າ ຄ່າຕົວຂອງ ອາລາບາ ໜ້າຈະຢູ່ທີ່ປະມານ 40 ລ້ານເອີໂຣ.
