ແຂວງຊຽງຂວາງ ຈັດກິດຈະກຳກິລາຫຼາຍການ ເພື່ອສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນສ້າງຕັ້ງກິລາ-ກາຍະກໍາແຫ່ງຊາດ ຄົບຮອບ 57 ປີ ຢ່າງເປັນຂະບວນການຟົດຟື້ນ ແລະ ເບີກບານມ່ວນຊື່ນ ໃນວັນທີ 14 ກໍລະກົດ 2023 ທີ່ສະໜາມກິລາໄຊຊະນະ ບ້ານໂພນມີໄຊ ເມືອງແປກ, ໂດຍມີ ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ, ທ່ານ ບຸນເລື່ອນ ວັນນາຮັກ ຫົວໜ້າພະແນກສຶກສາທິການ ແລະ ກິລາແຂວງ ແລະ ທ່ານ ນາງ ຈັນທະສອນ ພູນສຸກ ປະທານສະຫະພັນແມ່ຍິງແຂວງ ພ້ອມດ້ວຍຄະນະນໍາຂອງແຂວງ, ຫົບໜ້າ-ຮອງຫົວໜ້າພະແນກການ, ພະນັກງານ, ທະຫຼານ-ຕຳຫຼວດ ຕະຫຼອດຮອດມວນຊົນຊາວຊຽງຂວາງ ເຂົ້າຮ່ວມ 2 ພັນກວ່າຄົນ.
ໂອກາດນີ້, ທ່ານ ບຸນເລື່ອນ ວັນນາຮັກ ໄດ້ໃຫ້ຜ່ານປະຫວັດຄວາມເປັນມາຂອງວັນກິລາ-ກາຍະກໍາແຫ່ງຊາດ ຊຶ່ງທ່ານໄດ້ຍົກໃຫ້ເຫັນເຖິງການຫຼີ້ນກິລາ-ກາຍະກໍາໃນເມື່ອກ່ອນ ພຶດຕິກຳຂອງການຫຼິ້ນກິລາ ລ້ວນແລ້ວແຕ່ຖອດແບບອອກມາຈາກຍຸດທະວິທີຂອງການຕໍ່ສູ້, ວິທີທາງຂອງການດຳລົງຊີວິດ ຫຼື ວິທີກຳຕ່າງໆຂອງຄົນໃນຍຸກກ່ອນ ເຊັ່ນ: ການຍ່າງ, ແລ່ນ, ໃຊ້ຫອກ, ດາບ, ເພື່ອຕໍ່ສູ້ປ້ອງກັນຕົວ, ໃຊ້ຄ້ອນ, ຂວານ, ມີດ, ພ້າ, ທະນູ ແລະ ປືນແກັບປືນເພີງຕ່າງໆ ເປັນອາວຸດປ້ອງກັນຕົວ ທັງເປັນອາວຸດເຮັດເສິກສົງຄາມຕໍ່ສູ້ ເພື່ອປົກປ້ອງພູມລໍາເນົາຂອງຕົນ, ເມື່ອຍາມສະຫງົບເສິກ ອາວຸດຍຸດຕະພັນເຫຼົ່ານັ້ນ ໄດ້ກາຍມາເປັນເຄື່ອງມືທຳມາຫາກິນ ເພື່ອການດຳລົງຊີວິດຂອງປະຊາຊົນ, ຕົກມາທ້າຍສະຕະວັດທີ XIX ເຄື່ອງມືດັ່ງກ່າວ ໄດ້ພັດທະນາມາເປັນອຸປະກອນຮັບໃຊ້ການແຂ່ງຂັນກິລາເພື່ອຄວາມມ່ວນຊື່ນລື່ນເລີງ, ເສີມສ້າງສຸຂະພາບໃຫ້ມີຄວາມສົມບູນແຂງແຮງຂອງຄົນໃນສັງຄົມ ເຊັ່ນ: ກິລາຍິງໜ້າ, ຍິງທະນູ, ຍິງປືນ, ຟັນດາບ, ຕີມວຍ, ຊັດຫຼາວ ເຫຼົ່ານີ້ເປັນຕົ້ນ.
ຕົກມາໃນປັດຈຸບັນ ການແຂ່ງຂັນກິລາໄດ້ພັດທະນາຂຶ້ນເລື້ອຍໆ, ຈາກວົງແຄບໄປສູ່ວົງກວ້າງ, ຈາກບຸກຄົນໄປສູ່ໜູ່ຄະນະ, ຈາກກົມກອງທ້ອງຖິ່ນໄປສູ່ລະດັບປະເທດ ແລະ ສາກົນ, ຈົນກາຍເປັນປະເພນີທີ່ນິຍົມຢ່າງກວ້າງຂວາງເທົ່າທຸກວັນນີ້ ໃນທີ່ສຸດກໍໄດ້ປະກາດສ້າງຕັ້ງກອງກິລາ-ກາຍະກໍາແຫ່ງຊາດລາວຂຶ້ນຢ່າງເປັນທາງການ ໃນວັນທີ 13 ກໍລະກົດ 1966 ໂດຍແມ່ນພົນເອກ ສີສະຫວາດ ແກ້ວບຸນພັນ ຫົວໜ້າກອງເສນາທິການສູງສຸດກອງທັບປົດປ່ອຍ ປະຊາຊົນລາວ ໃນໄລຍະນັ້ນເປັນຜູ້ປະກາດສ້າງຕັ້ງ, ນັ້ນແມ່ນຂີດໝາຍແຫ່ງການກຳເນີດເກີດຂຶ້ນຂອງກິລາລາວກ້າວສູ່ຍຸກສະໄໝ.
ທ່ານ ບຸນເລື່ອນ ວັນນາຮັກ ຍັງໄດ້ຍົກໃຫ້ເຫັນເຖິງກິດຈະກໍາການສະເຫຼີມສະຫຼອງໃນງານຄັ້ງນີ້ ປະກອນມີ ການເຕັ້ນແອໂຣບິກ, ຍ່າງເພື່ອສຸຂະພາບ ແລະ ການແຂ່ງຂັນກິລາເປຕັງມິດຕະພາບ ໂດຍຄວບຄູ່ກັບການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955-20 ກໍລະກົດ 2023), ວັນຄ້າຍວັນເກີດປະທານ ສຸພານຸວົງ ຄົບຮອບ 114 ປີ (13 ກໍລະກົດ 1909 -13 ກໍລະກົດ 2023), ວັນອານຸລັກສັດນໍ້າ- ສັດປ່າແຫ່ງຊາດ ຄົບຮອບ 26 ປີ (13 ກໍລະກົດ 1997-13 ກໍລະກົດ 2023) ໃຫ້ມີບັນຍາກາດຄຶກຄື້ນມ່ວນຊື່ນ, ໄດ້ຄວາມໝາຍຄວາມສໍາຄັນ ແລະ ພ້ອມກັນເຊີດຊູວັນທີ່ມີຄວາມໝາຍຄວາມສໍາຄັນນີ້ ໃຫ້ຄົງຢູ່ຄູ່ກັບຄົນລາວຂອງພວກເຮົາຕະຫຼອດໄປ.
(ພາບ-ຂ່າວ ໂດຍ: ຄານສີສະຫວັນ)
