ຄະນະບໍລິຫານງານພັກ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນ ຄະນະບໍລິຫານງານພັກກະຊວງ ເມື່ອວັນທີ 17 ກໍລະກົດ 2023 ທີ່ສະໂມສອນ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ໂດຍການເຂົ້າຮ່ວມຂອງສະຫາຍ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ສະຫາຍ ຮສ.ປອ ພຸດ ສິມມາລາວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງສຶກສາທິການ ແລະ ກິລາ, ສະຫາຍ ສີໃນ ມຽງລາວັນ ຮອງເລຂາຄະນະພັກ, ຮອງປະທານກວດກາສູນກາງພັກ, ພ້ອມດ້ວຍຄະນະວິຊາການຈາກຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ຄະນະກວດກາສູນກາງພັກ, ບັນດາຮອງເລຂາຄະນະພັກ, ກໍາມະການປະຈໍາພັກ, ກໍາມະການພັກກະຊວງ, ຄະນະພັກຮາກຖານ, ຄະນະໜ່ວຍພັກຮາກຖານ, ເລຂາ ແລະ ປະທານອົງການຈັດຕັ້ງມະຫາຊົນຂັ້ນກະຊວງ, ບັນດາສະມາຊິກພັກສົມບູນທີ່ມີຕໍາແໜ່ງບໍລິຫານຂັ້ນຮອງຫົວໜ້າກົມ ແລະ ທຽບເທົ່າຂຶ້ນໄປ.
ໃນກອງປະຊຸມ, ສະຫາຍ ປອ ຄໍາພັນ ພົມມະທັດ ໄດ້ມີຄໍາເຫັນວ່າ: ກອງປະຊຸມຄັ້ງນີ້ ມີຄວາມໝາຍສໍາຄັນຍິ່ງ ເນື່ອງຈາກເປັນການສໍາຫຼວດກວດກາຄືນໝາກຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກ ກະຊວງສຶກສາທິການ ແລະ ກິລາ ກາງສະໄໝ ຂອງກອງປະຊຸມໃຫຍ່ຜ່ານມາ ຢ່າງພາວະວິໄສ ແລະ ຖືກຕ້ອງກັບສະພາບຕົວຈິງ, ເຫັນໄດ້ວ່າໃນ 2 ປີເຄິ່ງຜ່ານມາ ກະຊວງສຶກສາທິການ ແລະ ກິລາ ໄດ້ມີການຫັນປ່ຽນໃໝ່ທີ່ກ້າວໜ້າ ແລະ ມີຜົນສໍາເລັດຫຼາຍດ້ານ ເປັນຕົ້ນແມ່ນ ວຽກງານສຶກສາອົບຮົມການເມືອງ-ແນວຄິດ ສະມາຊິກພັກ, ພະນັກງານ, ຄູອາຈານ, ນັກຮຽນ ນັກສຶກສາ, ມີຄວາມອຸ່ນອຽນທຸ່ນທ່ຽງ ແລະ ເຊື່ອໝັ້ນຕໍ່ການນຳພາ-ຊີ້ນຳຂອງພັກ-ລັດ, ຄວາມສາມັກຄີເປັນເອກະພາບ ພ້ອມກັນເຮັດສຳເລັດໜ້າທີ່ວິຊາສະເພາະ ແລະ ໜ້າທີ່ການເມືອງເປັນຢ່າງດີ, ວຽກງານຈັດຕັ້ງ-ພະນັກງານ ແລະ ນະໂຍບາຍ ໄດ້ຮັບການຈັດຕັ້ງປະຕິບັດເປັນຢ່າງດີ ເຮັດໃຫ້ການບຳລຸງ-ກໍ່ສ້າງພະນັກງານ ມີຄວາມຮູ້ຄວາມສາມາດ ເປັນລະບົບຕໍ່ເນື່ອງ ຕອບສະໜອງໃຫ້ການປະຕິບັດໜ້າທີ່ການເມືອງ, ວິຊາສະເພາະຂອງຄະນະພັກແຕ່ລະຂັ້ນ, ຕິດພັນກັບການປະຕິບັດນະໂຍບາຍຕໍ່ພະນັກງານ, ຄູອາຈານ ຜູ້ທີ່ມີຜົນງານ ແລະ ຫ້າວຫັນປະຕິບັດໜ້າທີ່ທີ່ໄດ້ຮັບຜິດຊອບ ຢ່າງເໝາະສົມ ເຮັດໃຫ້ພະນັກງານ, ຄູອາຈານ ມີຄວາມກະຕືລືລົ້ນໃນການຈັດຕັ້ງປະຕິບັດໜ້າທີ່ວຽກງານ ແລະ ມີຄວາມສາມັກຄີເປັນຢ່າງດີ, ວຽກງານກໍ່ສ້າງພັກ ແລະ ຂະຫຍາຍພັກ ໄດ້ຮັບການປັບປຸງ ແລະ ຂະຫຍາຍຕົວຢ່າງແຂງແຮງ ທັງປະລິມານ ແລະ ຄຸນນະພາບຕາມກົດລະບຽບພັກ, ພວກເຮົາຈະພົບຄວາມຫຍຸ້ງຍາກຫຼາຍດ້ານກໍຕາມ, ແຕ່ການນຳພາ-ຊີ້ນຳການພັດທະນາ ແລະ ຍົກສູງຄູນນະພາບການສຶກສາ, ວິທະຍາສາດ ແລະ ກິລາ ກໍສາມາດດຳເນີນໄປໄດ້ຕາມແຜນການ ມີຫຼາຍອັນພົ້ນເດັ່ນ ເປັນຕົ້ນແມ່ນ ລະບົບການສຶກສາທາງໄກ, ການສອນທາງອອນລາຍ, ໂທລະພາບສຶກສາ ແລະ ກິລາ, ຄັງປັນຍາລາວ, ການສຶກສາແຕ່ຊັ້ນອະນຸບານຮອດການສຶກສາຊັ້ນສູງ ໄດ້ມີການປັບປຸງຫຼັກສູດການຮຽນການສອນ, ພື້ນຖານໂຄງລ່າງ, ສະໜອງອຸປະກອນສື່ການຮຽນການສອນ ໄປຄຽງຄູ່ກັບການສ້າງ ແລະ ປັບປຸງບັນດາກົນໄກ, ນິຕິກຳການບໍລິຫານ-ຄຸ້ມຄອງ, ຂອດການປະສານງານຕາມສາຍຕັ້ງ-ສາຍຂວາງແຕ່ສູນກາງລົງຮອດທ້ອງຖິ່ນ ໄດ້ຮັບການປັບປຸງໃນທ່ວງທ່າທີ່ດີຂຶ້ນ. ພິເສດ, ແມ່ນການສ້າງສູນຄົ້ນຄວ້າພາສາລາວ ໄດ້ສຸມໃສ່ດໍາເນີນການຈັດຕັ້ງປະຕິບັດຕາມການມອບໝາຍຂອງຂັ້ນເທິງ.
ນອກຈາກນີ້, ໃນກອງປະຊຸມຍັງໄດ້ຮັບຟັງການເຜີຍແຜ່ຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານແຕ່ລະຂັ້ນ ສະບັບເລກທີ 268/ຄລສພ, ລົງວັນທີ 20 ມັງກອນ 2023, ຜ່ານມາດຕະຖານຄະນະບໍລິຫານງານພັກກະຊວງ-ອົງການ, ສິດ ແລະ ໜ້າທີ່ຂອງຄະນະພັກດັ່ງກ່າວ ແລະ ຂໍ້ຫ້າມສຳລັບສະມາຊິກພັກ. ຫຼັງຈາກນັ້ນ, ໃນກອງປະຊຸມຈຶ່ງໄດ້ດໍາເນີນການທາມທາບຄວາມໄວ້ວາງໃຈຕໍ່ຄະນະພັກ ກະຊວງສຶກສາທິການ ແລະ ກິລາ, ດໍາເນີນກອງປະຊຸມກາງສະໄໝເປີດກວ້າງ ແລະ ດໍາເນີນຊີວິການເມືອງພາຍໃນຄະນະພັກ ກະຊວງສຶກສາທິການ ແລະ ກິລາ.
ໂດຍ ບົວລະພາ
