ອົງການໄອຍະການປະຊາຊົນສູງສຸດ(ອອປສ) ມອບຢາປີ່ນປົວພະຍາດໃຫ້ ກະຊວງປ້ອງກັນຄວາມສະຫງົບ ລວມມູນຄ່າ 800 ກວ່າລ້ານກີບ ໃນວັນທີ 13 ກໍລະກົດ 2023, ມອບໂດຍ ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ ແລະ ຕາງໜ້າຮັບໂດຍ ທ່ານ ພົຕ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າກົມໃຫຍ່ຕໍາຫລວດ ໂດຍມີພາກສ່ວນກ່ຽວຂ້ອງສອງຝ່າຍ ເຂົ້າຮ່ວມ.
ທ່ານ ບຸນທັນ ບຸນທະວິໄລ ໄດ້ກ່າວວ່າ: ຢາປິ່ນປົວພະຍາດທີ່ນໍາມາມອບຄັ້ງນີ້ ແມ່ນໄດ້ຮັບການຊ່ວຍເຫລືອຈາກ ກຸ່ມບໍລິສັດ ລາວພັນທະມິດຟາມາ ກຣຸບ ຈຳກັດ ເຊິ່ງປະກອບມີ: ຢາ ອາລີບູເຟີນ (ແກ້ປວດ, ຫລຸດໄຂ້), ຢາລິມິວມິກ (ຕ້ານອັກເສບ), ຢາປາລາຕາໂມນ (ແກ້ປວດທົ່ວໄປ, ຫລຸດໄຂ້),ຢາປາລາຕາໂມນຄອມພາວ (ແກ້ໄຂ້ຫວັດ), ຢາເມັດຟໍມີນ (ປົວພະຍາດເບົາຫວານ), ຢາອາລີຮາຍຊ່າ (ປົວຄວາມດັນໃນເລືອດສູງ)
ໂອກາດນີ້, ທ່ານ ພົຕ ຄໍາກິ່ງ ຜຸຍຫລ້າມະນີວົງ ກໍໄດ້ກ່າວສະແດງຄວາມຂອບໃຈ ແລະ ຕີລາຄາສູງ ຕໍ່ຄະນະພັກ-ຄະນະນຳ ອົງການໄອຍະການປະຊາຊົນສູງສຸດ ທີ່ໄດ້ນຳເອົາຢາປີ່ນປົວພະຍາດທມາມອບຕໍ່ໃຫ້ກະຊວງປ້ອງກັນຄວາມສະຫງົບ ແລະ ເຫັນໄດ້ຄວາມສຳຄັນຕໍ່ບັນຫາສຸຂະພາບ, ເຊິ່ງຢາດັ່ງ ກ່າວ, ກະຊວງປ້ອງກັນຄວາມສະຫງົບ ຈະໄດ້ຈັດແບ່ງໄປຍັງຄ້າຍຄຸມຂັງ-ດັດສ້າງ ເພື່ອປີ່ນປົວພະ ຍາດໃຫ້ແກ່ຜູ້ຖືກຫາ ແລະ ນັກໂທດ ໃນຂອບເຂດທົ່ວປະເທດ ໃຫ້ໄດ້ຢ່າງທົ່ວເຖິງ.
ຂ່າວ-ພາບ: ອານຸສັກ ກວາງວັນ
