ພິທີສະເຫຼີມສະຫຼອງ ວັນເກີິດ ປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ວັນທີ 13 ກໍລະກົດ ຄົບ ຮອບ 114 ປີ ແລະວັນອານຸລັກ ສັດນໍ້າ – ສັດປ່າ ແຫ່ງຊາດ 13 ກໍລະກົດ 2023, ຢູ່ມະຫາວິທະຍາໄລສຸພານຸວົງ ໄດ້ຈັດຂື້ນໃນວັນທີ່ 13 ກໍລະກົດນີ້ ພາຍໃຕ້ການນຳ ພາຂອງ ຮອງສາດສະດາຈານ ປະລິນຍາໂທ ວິລະ ອາໂນລັກ ຮັກສາການອະທິ ການບໍດີ ມະຫາວິທະຍາໄລ ສຸພານຸວົງ, ມີຄະນະອະທິການບໍດີ, ຄະນະບໍດີ, ຫົວໜ້າຫ້ອງການ, ບັນດາພະແນກການ ພາກສ່ວນອ້ອມຂ້າງມະຫາວິທະຍາໄລ, ບັນດາການຈັດຕັ້ງບ້ານຕະຫຼອດຮອດພະນັກງານຄູ-ອາຈານ ແລະ ນັກສຶກສາເຂົ້າຮ່ວມ.
ພິທີເລີ່ມຕົ້ນການວາງກະຕ່າດອກໄມ້ ທີ່ອານຸສອນສະຖານ ປະທານສຸພານຸວົງ ໃຈກາງມະຫາວິທະຍາໄລ, ຈາກນັ້ນ, ໄດ້ມີການຈັດປາຖະກະຖາ ໃຫ້ກຽດເລົ່າມູນເຊື້ອໂດຍ ທ່ານ ບຸນສົມ ຄຸນມະນີ ກຳມະການປະຈຳພັກແຂວງ ຫົວໜ້າພະແນກ ອຸດສາຫະກຳ ແລະ ການຄ້າແຂວງ, ທ່ານກ່າວວ່າ: ຕັ້ງແຕ່ເຍົາໄວ ປະທານ ສຸພານຸວົງ ເປັນນັກຮຽນ-ນັກສຶກສາທີ່ຂະຫຍັນໝັ່ນພຽນ ແລະມີພອນສະຫວັນໃນຫຼາຍດ້ານທັງຮຽນເກັ່ງ ແລະສອບເສັງໄດ້ຄະແນນດີມາຕະຫຼອດ, ປີ 1937 ທ່ານໄດ້ຮັບໃບປະກາສະນີຍະບັດ ວິສະວະກອນຂົວທາງທີ່ຝຣັ່ງ ເປັນຄົນທຳອິດຂອງປະເທດລາວ. ຫຼັງຈາກນັ້ນເພິ່ນໄດ້ກັບຄືນສູ່ອິນດູຈີນ ໂດຍໄດ້ຮັບລາຊະການຢູ່ຫວຽດນາມ, ກຳປູເຈຍ ແລະລາວ, ປະທານ ສຸພານຸວົງ ໄດ້ສ້າງຜົນງານຫຼາຍຢ່າງ ອັນເປັນທີ່ຍອມຮັບໃນຖານະວິສະວະກອນທີ່ມີຄວາມຮູ້, ຄວາມສາມາດ ແລະເຮັດແທ້ທຳຈິງ, ທ່ານໄດ້ພົບກັບປະທານໂຮ່ຈີມິນ ເພື່ອປຶກສາການລິເລີ່ມ ດຳເນີນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ຍາດເອົາຄວາມເປັນເອກະລາດມາໃຫ້ລາວ, ວັນທີ 13 ສິງຫາ 1950 ກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໄດ້ເປີດຂຶ້ນເຊິ່ງໄດ້ຕົກລົງສ້າງຕັ້ງແນວໂຮມເອກະພາບແຫ່ງຊາດ ຂຶ້ນຢ່າງເປັນທາງການໂດຍໃສ່ຊື່ວ່າ ແນວລາວອິດສະລະ ແລະໄດ້ສ້າງຕັ້ງລັດຖະບານລາວຕໍ່ຕ້ານ ປະກອບດ້ວຍ 5 ທ່ານ ໂດຍແຕ່ງຕັ້ງ ປະທານສຸພານຸວົງ ເປັນປະທານແນວລາວອິດສະລະ ທັງເປັນລັດຖະມະຫາເສນາ ຫຼື ນາຍົກລັດຖະມົນຕີ ຂອງລັດຖະບານລາວຕໍ່ຕ້ານ. ນັບແຕ່ປີ 1975-1995 ທ່ານປະທານ ສຸພານຸວົງ ໄດ້ນໍາພາປະຊາຊົນຜ່ານຜ່າອຸປະສັກຫຼາຍດ້ານໃນໄລຍະຂ້າມຜ່ານ, ນຳພາປະຊາຊົນດຳເນີນພາລະກິດປ່ຽນແປງໃຫມ່ ແລະນຳພາປະຊາຊົນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງເທື່ອລະກ້າວ. ທຸກໄລຍະຂອງການປະຕິວັດ ປະທານ ສຸພານຸວົງ ໄດ້ສຸມສະຕິປັນຍາ ແລະ ເຫື່ອແຮງຂອງຕົນເພື່ອຊີ້ນຳ-ນໍາພາຂະບວນກາປະຕິວັດລາວ ຍາດເອົາໄຊຊະນະອັນຍິ່ງໃຫຍ່ມາໃຫ້ແກ່ປະເທດຊາດ.
ປະທານ ໄກສອນ ພົມວິຫານ ໄດ້ເວົ້າເຖິງປະທານ ສຸພານຸວົງວ່າ: “ຊື່ສຽງຮຽງນາມຂອງປະທານ ສຸພານຸວົງ ໄດ້ພົ້ນເດັ່ນຂຶ້ນ ໃນຖານະທີ່ເປັນນັກຮົບຮັກຊາດ ຮຸ່ນທຳອິດ ທີ່ໄດ້ເອົາຊີວິດຂອງຕົນ ຜູກພັນກັບການປະຕິວັດຕະຫຼອດມາ ໂດຍບໍ່ງໍ້ງ່ຽງຕໍ່ຄວາມລຳບາກ, ຄວາມເສຍສະຫຼະໃດໆ ກະທັ້ງເຖິງບໍ່ຫວາດຫວັ່ນ ຕໍ່ກັບການຈັບ ກຸມຄຸມຂັງຂອງສັດຕູ, ຍາມໃດກໍ່ຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງ, ເພື່ອຄວາມເປັນເອກະລາດ ແລະຄວາມວັດທະນະຖາວອນຂອງປະເທດຊາດ, ເພື່ອອິດສະຫຼະພາບ ແລະຄວາມຢູ່ດີກິນດີ ຂອງ ປະຊາຊົນ”. ໂອກາດນີ້ ທ່ານ ບຸນສົມ ຄຸນມະນີ ໄດ້ຮຽກຮ້ອງໃຫ້ພະນັກງານທີ່ເກີດໃໝ່ໃຫຍ່ລຸນໃຫ້ຮ່ຳຮຽນເອົາຄຸນສົມ ບັດ ສິິນທຳປະຕິວັດ ອັນດີງາມຂອງປະ ທານ ສຸພານຸວົງ ໂດຍສະເພາະກໍແມ່ນຄວາມດຸໝັ່ນຂະຫຍັ້ນພຽນ, ບໍ່ຫວັ່ນເກງຕໍ່ອຸປະສັກໃດໆ ເພື່ອພັດທະນາຕົນເອງໃຫ້ມີຄວາມກ້າວໜ້າຢູ່ສະເໝີ. ພາຍຫຼັງສຳເລັດການປາຖະກະຖາ ຜູ້ເຂົ້າຮ່ວມ ໄດ້ພ້ອມກັນປ່ອຍປາລົງໜອງຂ້າງຕຶກສຳ ນັກງານອະທິການບໍດີ ເພື່ອສະເຫຼີມສະຫຼອງວັນອານຸວັກ ສັດນ້ຳ – ສັດປ່າ ແຫ່ງຊາດ ຕື່ມອີກ.
ຂ່າວ: ສົມສຸກ ຄູນສະຫວັດ (ມສ ສຸພານຸວົງ)
