ວັນທີ 13 ກໍລະກົດ 2023 ທີ່ ຈາກາກຕາ, ອິນໂດເນເຊຍ, ທ່ານ ສະເຫຼີມໄຊ ກົມມະສິດ, ຮອງນາຍົກ ລັດຖະມົນຕີ, ລັດຖະ ມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ກັບ ບັນດາປະເທດຄູ່ເຈລະຈາ ຊຶ່ງປະກອບດ້ວຍ: ກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ, ກອງປະຊຸມລັດຖະມົນຕີຕ່າງປະເທດອາຊຽນ-ຈີນ, ກອງປະຊຸມລັດຖະມົນຕີຕ່າງປະເທດອາຊຽນ-ສ. ອາເມລິກາ, ກອງປະຊຸມ ລັດຖະມົນຕີຕ່າງປະເທດອາຊຽນ-ຍີ່ປຸ່ນ, ກອງປະຊຸມລັດຖະມົນຕີຕ່າງປະເທດອາຊຽນ-ສ. ເກົາຫຼີ, ກອງປະຊຸມລັດຖະມົນຕີຕ່າງປະເທດອາຊຽນ-ອິນ ເດຍ, ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ, ກອງປະຊຸມລັດຖະມົນຕີຕ່າງປະເທດອາຊຽນ-ສະ ຫະພາບເອີຣົບ (ອີຢູ), ກອງປະຊຸມລັດຖະມົນຕີຕ່າງປະເທດອາຊຽນ-ກາ ນາດາ, ກອງປະຊຸມລັດຖະມົນຕີຕ່າງປະເທດອາຊຽນ-ລັດເຊຍ, ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ແລະ ກອງປະຊຸມລັດຖະມົນຕີຕ່າງປະເທດອາຊຽນບວກສາມ ຄັ້ງທີ 24 ຕາມລໍາດັບ.
ໃນນາມ ສປປ ລາວ ເປັນປະເທດປະສານງານການພົວພັນອາຊຽນ-ອົດສະຕຣາລີ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ເປັນປະທານກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ຮ່ວມກັບ ທ່ານ ນາງ ເພັນນີ ວອງ (Penny Wong), ລັດຖະມົນຕີຕ່າງປະເທດອົດສະຕຣາລີ. ກອງປະຊຸມ ໄດ້ຕີລາຄາສູງຕໍ່ຄວາມຄືບໜ້າຂອງການຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ ໂດຍຜ່ານການຈັດຕັ້ງປະຕິບັດເອກະສານຊ້ອນທ້າຍຂອງແຜນປະຕິບັດງານ ອາຊຽນ-ອົດສະຕຣາລີ (2020-2024) ແລະ ຂໍ້ລິເລີ່ມ “ອົດສະຕຣາລີ ເພື່ອອະນາຄົດຂອງອາຊຽນ” (Aus4ASEAN Futures). ພ້ອມນີ້, ກອງປະຊຸມ ຍັງໄດ້ເຫັນດີຮ່ວມກັນໃນການເລີ່ມຮ່າງແຜນປະຕິບັດງານ ອາຊຽນ-ອົດສະຕຣາລີ ສະບັບໃໝ່ (2025-2029) ເພື່ອຈັດຕັ້ງຜັນຂະຫຍາຍຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ. ພິເສດ, ສອງຝ່າຍ ໄດ້ເຫັນດີຈັດກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ ເພື່ອສະເຫຼີມສະຫຼອງ 50 ປີ ແຫ່ງການພົວພັນຮ່ວມມືອາຊຽນ-ອົດສະຕຣາລີ ໃນວັນທີ 4-6 ມີນາ 2024 ທີ່ ເມວເບີນ, ອົດສະຕຣາລີ.
ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ ໄດ້ຮັບຮອງເອົາເອກະສານຊ້ອນທ້າຍຂອງແຜນປະຕິບັດງານອາຊຽນ-ອິນເດຍ (2021-2025) ເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານ ລະຫວ່າງ ອາຊຽນ ແລະ ອິນເດຍ ແນ່ໃສ່ສົ່ງເສີມການພົວພັນຮ່ວມມືອາຊຽນ-ອິນເດຍ ໃນອານາຄົດ. ນອກນັ້ນ, ກອງປະຊຸມ ໄດ້ຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມືດ້ານການເຊື່ອມຈອດຕ່າງໆ ໃຫ້ເປັນຮູບປະທໍາ ເປັນຕົ້ນແມ່ນ: ໂຄງການທາງດ່ວນສາມຝ່າຍ ອິນເດຍ-ມຽນມາ-ໄທ ແລະ ການຂະຫຍາຍທາງດ່ວນດັ່ງກ່າວ ເພື່ອເຊື່ອມຕໍ່ມາຍັງ ສປປ ລາວ, ກໍາປູເຈຍ ແລະ ຫວຽດນາມ ໃຫ້ສໍາເລັດໂດຍໄວ.
ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ ໄດ້ຮັບຮອງເອົາຖະແຫຼງການຮ່ວມອາຊຽນ-ນິວຊີແລນ ວ່າດ້ວຍການຮ່ວມມືພາຍໃຕ້ແນວຄວາມຄິດອາຊຽນ ກ່ຽວກັບອິນໂດ-ປາຊີຟິກ (AOIP) ແລະ ໄດ້ຊຸກຍູ້ໃຫ້ເລັ່ງລັດຂະບວນການພາຍໃນ ເພື່ອໃຫ້ສາມາດລົງນາມອານຸສັນຍາ ສະບັບທີ 2 ເພື່ອຍົກລະດັບການຄ້າເສລີ ອາຊຽນ-ອົດສະຕຣາລີ-ນິວຊີແລນ (AANZFTA) ພາຍໃນປີນີ້.
ກອງປະຊຸມລັດຖະມົນຕີຕ່າງປະເທດອາຊຽນ-ລັດເຊຍ ໄດ້ທົບທວນຄືນການພົວພັນຮ່ວມມືອາຊຽນ-ລັດເຊຍ ໃນໄລຍະ 1 ປີ ທີ່ຜ່ານມາ ກໍຄືຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານຮອບດ້ານ ເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດອາຊຽນ-ລັດເຊຍ (2021-2025). ພິເສດ, ສອງຝ່າຍ ໄດ້ຮັບຮອງເອົາຖະແຫຼງການຮ່ວມ ເນື່ອງໃນໂອກາດຄົບຮອບ 5 ປີ ແຫ່ງການເປັນຄູ່ຮ່ວມຍຸດທະສາດ ລະຫວ່າງອາຊຽນ ແລະ ລັດເຊຍ ແລະ ຍິນດີຕໍ່ຂໍ້ສະເໜີຂອງ ລັດເຊຍ ເພື່ອຈັດບັນດາກິດກະກໍາສະເຫຼີມສະຫຼອງໃນໂອກາດສໍາຄັນດັ່ງກ່າວ. ພ້ອມນີ້, ສອງຝ່າຍ ໄດ້ເຫັນດີຮ່ວມກັນກໍານົດທິດທາງການຮ່ວມມືໃນຕໍ່ໜ້າ ໂດຍເນັ້ນໃສ່ບັນດາຂົງເຂດບູລິມະສິດ ເປັນຕົ້ນແມ່ນ: ການຄ້າ-ການລົງທຶນ, ວິທະຍາສາດ ແລະ ເຕັກໂນໂລຊີ, ການທ່ອງທ່ຽວ, ການສຶກສາ ແລະ ຂົງເຂດອື່ນໆທີ່ສອງຝ່າຍມີຄວາມສົນໃຈຮ່ວມກັນ.
ກອງປະຊຸມລັດຖະມົນຕີຕ່າງປະເທດອາຊຽນ-ຈີນ ໄດ້ຕີລາຄາສູງຕໍ່ຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານ ເພື່ອຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດອາຊຽນ-ຈີນ ແລະ ເອກະສານຊ້ອນທ້າຍ ເພື່ອເສີມຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ. ໃນໂອກາດນີ້, ສອງຝ່າຍ ໄດ້ຮັບຮອງເອົາຖະແຫຼງການຮ່ວມ ກ່ຽວກັບການເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ ໃນໂອກາດຄົບຮອບ 20 ປີ ຂອງ ສປ ຈີນ ແລະ ລະບຽບການເພື່ອເລັ່ງລັດການເຈລະຈາກົດແຫ່ງການປະພຶດ ຫຼື ຊີໂອຊີ ຢ່າງມີປະສິດທິພາບ ແລະ ມີເນື້ອໃນ. ກອງປະຊຸມ ໄດ້ຮັບຊາບຄວາມຄືບໜ້າຂອງການເຈລະຈາບັນດາຖະແຫຼງການຮ່ວມ ທີ່ຈະຮັບຮອງເອົາຢູ່ໃນກອງປະຊຸມສຸດຍອດອາຊຽນ-ຈີນ ຄັ້ງທີ 26 ໃນເດືອນກັນຍາ 2023 ນີ້. ພ້ອມນີ້, ກອງປະຊຸມ ຍັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການເຈລະຈາ ຊີໂອຊີ ຮອບທີ່ສອງ, ລວມທັງຄວາມຄືບໜ້າຂອງການຈັດຕັ້ງປະຕິບັດຖະແຫຼງການ ແຫ່ງການປະພຶດຂອງບັນດາຝ່າຍຢູ່ທະເລຈີນໃຕ້ ຫຼື ດີໂອຊີ.
ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ ໄດ້ເຫັນດີດ້ານຫຼັກການເພື່ອຮັບຮອງເອົາຖະແຫຼງການຮ່ວມ ວ່າດ້ວຍການສ້າງຕັ້ງຄູ່ຮ່ວມຍຸດທະສາດຮອບດ້ານອາຊຽນ-ຍີ່ປຸ່ນ ໃນໂອກາດກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 26 ທີ່ຈະຈັດຂຶ້ນໃນເດືອນກັນຍາ 2023. ພ້ອມນີ້, ກອງປະຊຸມ ໄດ້ເຫັນດີເຮັດວຽກຮ່ວມກັນເພື່ອກະກຽມໃຫ້ແກ່ກອງປະຊຸມສຸດຍອດສະເຫຼີມສະຫຼອງການພົວພັນຮ່ວມມືອາຊຽນ-ຍີ່ປຸ່ນ ຄົບຮອບ 50 ປີ ແຫ່ງມິດຕະພາບ ແລະ ການຮ່ວມມື ຊຶ່ງຈະຈັດຂຶ້ນໃນວັນທີ 16-18 ທັນວາ 2023, ທີ່ ໂຕກຽວ, ຍີ່ປຸ່ນ.
ກອງປະຊຸມລັດຖະມົນຕີຕ່າງປະເທດອາຊຽນ-ສ. ເກົາຫຼີ ໄດ້ສະແດງຄວາມຍິນດີຕໍ່ແຜນຂອງ ສ. ເກົາຫຼີ ເພື່ອເພີ່ມການປະກອບສ່ວນງົບປະມານ ເປັນເງິນຈໍານວນ 48 ລ້ານໂດລາສະຫະລັດ ເຂົ້າໃນບັນດາກອງທຶນການຮ່ວມມື ອາຊຽນ-ສ.ເກົາຫຼີ ຈົນຮອດປີ 2027 ແນໃສ່ຈັດຕັ້ງປະຕິບັດບັນດາແຜນການຮ່ວມມືໃນຕໍ່ໜ້າ ພາຍໃຕ້ຂໍ້ລິເລີ່ມ ວ່າດ້ວຍ ຄວາມສາມັກຄີ ເກົາຫຼີ-ອາຊຽນ (KASI). ພ້ອມນີ້, ອາຊຽນ ໄດ້ເຫັນດີຕໍ່ການສະເໜີຂອງ ສ. ເກົາຫຼີ ເພື່ອຍົກລະດັບການພົວພັນການຮ່ວມມືອາຊຽນ-ສ. ເກົາຫຼີ ຂຶ້ນເປັນຄູ່ຮ່ວມມືຍຸດທະສາດຮອບດ້ານ ໃນໂອກາດກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 24 ທີ່ຈະຈັດຂຶ້ນໃນເດືອນ ກັນຍາ 2023.
ກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ໄດ້ປຶກສາຫາລື ກ່ຽວກັບການຈັດຕັ້ງຜັນຂະຫຍາຍຖະແຫຼງການ ຜູ້ນໍາຮ່ວມຂອງກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ-ອີຢູ ຄົບຮອບ 45 ປີ ໃນທ້າຍປີ 2022 ທີ່ຜ່ານມາ ແລະ ໄດ້ເຫັນດີຮັດແໜ້ນການຮ່ວມມືໃນຂົງເຂດການເຊື່ອມຈອດພາກພື້ນ, ການຄ້າ, ການລົງທຶນ, ການໄປມາຫາສູ່ກັນລະຫວ່າງປະຊາຊົນ, ສິ່ງແວດລ້ອມ ແລະ ການປ່ຽນແປງດິນຟ້າອາກາດ ເປັນຕົ້ນ.
ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ໄດ້ທົບທວນຄືນການຮ່ວມມືອາຊຽນ-ອັງກິດ ໃນໄລຍະ 1 ປີທີ່ຜ່ານມາ ໂດຍສະເພາະການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນ-ອັງກິດ (2022-2026) ແລະ ໄດ້ຊຸກຍູ້ໃຫ້ສືບຕໍ່ການຈັດຕັ້ງປະຕິບັດແຜນປະຕິບັດງານດັ່ງກ່າວ ຢ່າງມີປະສິດຕິພາບ ແລະ ຄົບຖ້ວນ ໂດຍເນັ້ນໃສ່ຂົງເຂດທີ່ມີຄວາມສົນໃຈຮ່ວມກັນ ເຊັ່ນ: ການຮ່ວມມືດ້ານເສດຖະກິດ, ການພັດທະນາພື້ນຖານໂຄງລ່າງ, ການເຊື່ອມຈອດ, ການສຶກສາ ແລະ ການໄປມາຫາສູ່ກັນລະຫວ່າງປະຊາຊົນຂອງສອງພາກພື້ນ.
ກອງປະຊຸມລັດຖະມົນຕີຕ່າງປະເທດອາຊຽນ-ການາດາ ໄດ້ເຫັນດີຈັດກອງປະຊຸມສຸດຍອດອາຊຽນ-ການາດາ ໃນເດືອນກັນຍາ 2023, ລວມທັງການປະກາດການຍົກລະດັບການພົວພັນຮ່ວມມືອາຊຽນ-ການາດາ ຂຶ້ນເປັນຄູ່ຮ່ວມຍຸດທະສາດ ໃນໂອກາດກອງປະຊຸມດັ່ງກ່າວ.
ກອງປະຊຸມລັດຖະມົນຕີຕ່າງປະເທດອາຊຽນບວກສາມ (ສປ. ຈີນ, ຍີ່ປຸ່ນ ແລະ ສ. ເກົາຫຼີ) ຄັ້ງທີ 24 ໄດ້ທົບທວນຄືນການຮ່ວມມືໃນຂອບອາຊຽນບວກສາມ ໃນໄລຍະຜ່ານມາ ແລະ ຊຸກຍູ້ການຈັດຕັ້ງຜັນຂະຫຍາຍແຜນວຽກການຮ່ວມມືອາຊຽນບວກສາມ ສໍາລັບໄລຍະ 2023-2027 ຢ່າງມີປະສິດທິພາບ ແລະ ຄົບຖ້ວນ. ກອງປະຊຸມ ໄດ້ຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ຂອບອາຊຽນບວກສາມ ໃນຖານະທີ່ເປັນເວທີການຮ່ວມມືທີ່ສໍາຄັນຂອງພາກພື້ນ ເພື່ອຮັບມືກັບສິ່ງທ້າທາຍຕ່າງໆ ເຊັ່ນ: ພະຍາດລະບາດ, ວິກິດການທາງການເງິນ, ຄວາມໝັ້ນຄົງທາງດ້ານສະບຽງອາຫານ ແລະ ອື່ນໆ. ພ້ອມນີ້, ຍັງເຫັນດີໃຫ້ມີການຮ່ວມມືໃນດ້ານການພັດທະນາລົດໄຟຟ້າໃນພາກພື້ນ ອີກດ້ວຍ.
ໃນວັນດຽວກັນ ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ພົບປະສອງຝ່າຍກັບ ລັດຖະມົນຕີຕ່າງປະເທດນອກແວ ແລະ ລັດຖະມົນຕີຕ່າງປະເທດອີຢູ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
