ວັນທີ 13 ກໍລະກົດ 2023 ທີ່ຫ້ອງວ່າການນະຄອນຫຼວງວຽງຈັນ (ນວ) ສະຫາຍ ອານຸພາບ ຕຸນາລົມ ເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນ ນວ ໄດ້ຕ້ອນຮັບການເຂົ້າຢ້ຽມຄໍານັບສະຫາຍ ທ່າຍ ແທງ ກຸ່ຍ ກໍາມະການສູນກາງພັກ ເລຂາພັກແຂວງ ປະທານສະພາປະຊາຊົນແຂວງ ຫົວໜ້າຄະນະຜູ້ແທນສະພາແຫ່ງຊາດແຂວງເຫງະອ່ານ ສສ ຫວຽດນາມ ພ້ອມຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ນວ.
ໂອກາດນີ້ສະຫາຍ ອານຸພາບ ຕຸນາລົມ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ນວ ຂອງສະຫາຍ ທ່າຍ ແທງ ກຸ່ຍ ພ້ອມຄະນະໃນຄັ້ງນີ້ ເຊິ່ງເປັນການເສີມຂະຫຍາຍສາຍພົວພັນການຮ່ວມມືຮອບດ້ານ ທັງເປັນການຮັດແໜ້ນຄວາມສາມັກຄີຮັກແພງໃຫ້ການຊ່ວຍເຫຼືອເຊິ່ງກັນ ແລະ ກັນລະຫວ່າງສອງພັກ-ສອງລັດກໍ່ປະຊາຊົນສອງຊາດລາວ-ຫວຽດນາມ ເວົ້າສະເພາະ ນວ ແລະ ແຂວງເຫງະອ່ານ ທີ່ມີມາແຕ່ດົນນານໃຫ້ນັບມື້ແໜ້ນແຟ້ນຍິ່ງໆຂຶ້ນ ນອກນີ້ຍັງໄດ້ລາຍງານສະພາບການພັດທະນາເສດຖະກິດ-ສັງຄົມ ນວ ແລະ ທ່າແຮງການຜະລິດເປັນສິນຄ້າ ແລະ ການບໍລິການຂອງ ນວ ເພື່ອເປັນການແລກປ່ຽນບົດຮຽນ ແລະ ຮ່ວມມືກັນໃນຕໍ່ໜ້າ.
ໃນຕອນທ້າຍສະຫາຍ ທ່າຍ ແທງ ກຸ່ຍ ໄດ້ສະແດງຄວາມຂອບໃຈຕໍ່ສະຫາຍ ອານຸພາບ ຕຸນາລົມ ພ້ອມຄະນະທີ່ໃຫ້ການຕ້ອນຮັບຢ່າງອົບອຸ່ນ ພ້ອມນັ້ນຍັງໄດ້ລາຍງານໃຫ້ຮູ້ກ່ຽວກັບສະພາບລວມຂອງແຂວງເຫງະອ່ານ ແລະ ໄດ້ແຈ້ງຈຸດປະສົງຂອງການມາຢ້ຽມຢາມ ນວ ໃນຄັ້ງນີ້ໃຫ້ຊາບຕື່ມອີກ ນອກນີ້ຍັງໄດ້ມອບເງິນ 500 ລ້ານດົງ ປະກອບສ່ວນຊຸກຍູ້ການຈັດຕັ້ງປະຕິບັດວຽກງານຂອງ ນວ.
