ກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ ສະໄໝທີ II ໄດ້ສຳເລັດວັນທີ 13 ກໍລະກົດ 2023 ພາຍຫຼັງດຳເນີນມາເປັນເວລາ 3 ວັນ ຈັດຂຶ້ນຢູ່ສະຖາບັນເຕັກໂນໂລຊີ ແລະ ການສື່ສານ ໂດຍເປັນປະທານຂອງທ່ານ ບໍ່ວຽງຄຳ ວົງດາລາ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ມີທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ບັນດາຄະນະປະຈຳພັກ ຄະນະພັກ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບໍ່ວຽງຄໍາ ວົງດາລາ ໄດ້ລາຍງານຜົນການດໍາເນີນກອງປະຊຸມວ່າ: ກອງປະຊຸມຄັ້ງນີ້ໄດ້ທາບທາມຄວາມໄວ້ວາງໃຈ ຕໍ່ການນໍາພາລວມ ແລະ ບຸກຄົນຄະນະບໍລິຫານພັກ ກອງປະຊຸມເປີດກວ້າງຄົບຄະນະກາງສະໄໝ ແລະ ກອງປະຊຸມພາຍໃນ (ດໍາເນີນຊີວິດການເມືອງ) ສໍາຫຼວດການນໍາພາລວມ ແລະ ບຸກຄົນພາຍໃນຄະນະພັກ ຜ່ານການດໍາເນີນກອງປະຊຸມສາມາດຕີລາຄາໄດ້ແຕ່ລະໜ້າວຽກເປັນຕົ້ນການດຳເນີນຜົນກອງປະຊຸມທາບທາມຕໍ່ການນໍາພາລວມ ເຫັນວ່າຜູ້ເຂົ້າຮ່ວມສ່ວນຫຼາຍຍັງໃຫ້ຄວາມເຊື່ອ ໝັ້ນໄວ້ວາງໃຈ ຕໍ່ການນໍາພາລວມຂອງຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານໃນເຄິ່ງສະໄໝຜ່ານມາ ພ້ອມນັ້ນຜູ້ເຂົ້າຮ່ວມຍັງໄດ້ສະເໜີໃຫ້ຄະນະບໍລິຫານງານພັກ ເພີ່ມທະວີນໍາພາວຽກງານ ການເມືອງແນວຄິດ ປັບປຸງແບບແຜນນໍາພາ ສຸມໃສ່ນໍາພາ-ຊີ້ນໍາ ປະຕິບັດໜ້າທີ່ການເມືອງໃຫ້ບັນລຸ ຕາມຄາດໝາຍທີ່ກໍານົດໄວ້ ສຳລັບຕໍ່ບຸກຄົນບັນດາສະຫາຍພາຍໃນຄະນະບໍລິຫານງານພັກສະໄໝທີ II ຍັງສືບຕໍ່ໄດ້ຮັບຄວາມເຊື່ອໝັ້ນໄວ້ວາງໃຈ ໂດຍໄດ້ຮັບຄະແນນຄວາມໄວ້ວາງໃຈສູງພໍສົມຄວນ ເຊິ່ງເປັນອັດຕາສ່ວນຫຼາຍກວ່າເຄິ່ງໜຶ່ງຂອງຈໍານວນຜູ້ເຂົ້າຮ່ວມທາບທາມ ເຊິ່ງໝາກຜົນດັ່ງກ່າວ ສະແດງໃຫ້ເຫັນເຖິງຄວາມພະຍາຍາມຂອງຄະນະບໍລິຫານງານພັກກະຊວງ ທີ່ໄດ້ເອົາໃຈໃສ່ປັບປຸງຕົນເອງ ນໍາພາຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ ແຜນພັດທະນາເສດຖະກິດ-ສັງຄົມ ຢ່າງມີຜົນສໍາເລັດຕົວຈິງ.
ຄຽງຄູ່ກັບດ້ານດີກໍຍັງມີດ້ານອ່ອນ-ຂໍ້ຄົງຄ້າງທີ່ຄະນະພັກຈະຕ້ອງ ເອົາໃຈໃສ່ປັບປຸງແກ້ໄຂໃນຕໍ່ໜ້າເປັນຕົ້ນ ການນໍາພາດ້ານການເມືອງແນວຄິດ ຄຸນສົມບັດ ແບບແຜນວິທີເຮັດວຽກ ຄວາມຮັບຜິດຊອບການເມືອງຂອງຄະນະພັກ ແບບແຜນດໍາລົງຊີວິດ ຄວາມເປັນແບບຢ່າງ ນໍາພາຮອບດ້ານ ກໍຄືຄວາມເປັນແບບຢ່າງການປະຕິບັດໜ້າ ເຕົ້າໂຮມຄວາມສະມັກຄີ ການດໍາລົງຊີວິດ ແລະ ການຮັບຜິດຊອບຕໍ່ໜ້າທີ່ການເມືອງ ທີ່ໄດ້ຮັບການມອບໝາຍ ແລະ ແບບຢ່າງໃນການກໍ່ສ້າງເຊິ່ງກັນ ແລະ ກັນ ຄວາມເປັນເຈົ້າການໃນການປ້ອງກັນ ແກ້ໄຂຈຸດອ່ອນຄົງຄ້າງ ແລະ ອື່ນໆ.
ຈາກນັ້ນທ່ານ ໄຊສົມພອນ ພົມວິຫານ ໄດ້ໂອ້ລົມເນັ້ນໃຫ້ອົງຄະນະພັກເອົາໃຈໃສ່ເຂົ້ານຳພາຈັດຕັ້ງປະຕິບັດວຽກງານແຕ່ລະດ້ານມີຜົນສຳເລັດ ເປັນຕົ້ນເອົາໃຈໃສ່ສືບຕໍ່ນໍາພາ-ຊີ້ນຳວຽກງານປັບປຸງກົງຈັກການຈັດຕັ້ງ ຕາມທິດກະທັດຮັດ ມີບົດບາດ ໜ້າທີ່ ແລະ ຂອບເຂດສິດຖືກຕ້ອງ ແລະ ສອດຄ່ອງກັບສະພາບຕົວຈິງ ບໍ່ປົນເປ ບໍ່ທັບຊ້ອນກັນ ຫຼື ກ້າວກ່າຍພາກສວນອື່ນ ປັບປຸງແລ້ວໃຫ້ສາມາດດໍາເນີນການໄປຢ່າງຄ່ອງຕົວ ແລະ ບັນລຸໜ້າທີ່ການເມືອງໃນແຕ່ລະໄລຍະຢ່າງມີປະສິດທິຜົນສູງ ສຸມໃສ່ນໍາພາ-ຊີ້ນໍາປັບປຸງ ນິຕິກໍາເກົ່າທີ່ບໍ່ສອດຄ່ອງ ແລະ ສ້າງນິຕິກໍາໃໝ່ ໃຫ້ພຽງພໍ ສາມາດຮັບຮອງວຽກງານເຕັກໂນໂລຊີ ແລະ ການສື່ສານ ທີ່ນັບມື້ນັບເຕີບໃຫຍ່ຂະຫຍາຍຕົວຢ່າງວ່ອງໄວໃນຍຸກອຸດສາຫະກຳ 4.0 ເອົາໃຈໃສ່ໂຄສະນາເຜີຍແຜ່ກ່ຽວກັບການປະຕິວັດອຸດສາຫະກຳຄັ້ງທີ 4 ກາລະໂອກາດ ແລະ ສິ່ງທ້າທາຍ ສຳລັບລາວເຮົາ ແລະ ການຫັນເປັນດິຈິຕ໋ອນຂອງປະເທດເຮົາໃຫ້ສັງຄົມຮັບຮູ້ ແລະ ເຂົ້າໃຈຢ່າງກວ້າງຂວາງ ພັດທະນາພື້ນຖານໂຄງລ່າງເຕັກໂນໂລຊີ ແລະ ການສື່ສານ ສືບຕໍ່ຊຸກຍູ້ບັນດາບໍລິສັດລັດວິສາຫະກິດດ້ານໄປສະນີ ແລະ ໂທລະຄົມມະນາຄົມ ຂະຫຍາຍເຄືອຂ່າຍການບໍລິການໄດ້ຢ່າງທົ່ວເຖິງ ເພີ່ມທະວີການພົວ ພັນ ແລະ ຮ່ວມມືກັບຕ່າງປະເທດໃນຂະແໜງການດັ່ງກ່າວ ເອົາໃຈໃສ່ຮ່ວມມືກັບບັນດາປະເທດເພື່ອນມິດຍຸດທະສາດ ໂດຍມີການເລືອກເຟັ້ນເຕັກໂນໂລຊີໃຫ້ຕິດພັນກັບຄວາມໝັ້ນຄົງຂອງລະບອບການເມືອງ ແລະ ຂອງປະເທດຊາດ ຄຽງຄູ່ກັນນັ້ນໃຫ້ຖືເອົາວິໄສທັດຍຸດທະສາດ ແລະ ແຜນພັດທະນາເສດຖະກິດດິຈິຕ໋ອນ ເປັນປາຍແຫຼມ ແລະ ເປັນວຽກບູລິມະສິດໃນການພັດທະນາເສດຖະກິດ-ສັງຄົມໃຫ້ຈະເລີນກ້າວໜ້າ.
