ສປປ ລາວ ເຂົ້າຮ່ວມແຂ່ງຂັນສີມືແຮງງານ ອາຊຽນ ຄັ້ງທີ 13 ທີ່ປະເທດສິງກະໂປ ໃນ 5 ສາຂາວິຊາຊີບຄື: ສາຂາ ກຣາບຟິກດີຊາຍ(Graphics Design), ສາຂາ ເວບເທັກໂນໂລຢີ (Web Technology), ສາຂາ ຕັດຫຍິບ ແລະ ອອກແບບເຄື່ອງນຸ່ງ (Fashion Technology), ສາຂາຕິດຕັ້ງໄຟຟ້າອາຄານ (Electrical Installation) ແລະ ສາຂາປຸງແຕ່ງອາຫານ (Cooking). ໃນນັ້ນ, ມີນັກແຂ່ງຂັນ 10 ທ່ານ, ຄູຝຶກ ແລະ ຊ່ຽວຊານ 16 ທ່ານ ແລະ ຄະນະຜູ້ແທນ ແລະ ຜູ້ສັງເກດການ 11 ທ່ານ.
ທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານ, ໜ້າຫົວໜ້າຄະນະຮັບຜິດຊອບງານແຂ່ງຂັນດັ່ງກ່າວໄດ້ໃຫ້ຮູ້ ໃນພິທີ ຈັດສົ່ງຄະນະຜູ້ແທນ ແລະ ຄະນະນັກແຂ່ງຂັນດັ່ງກ່າວ ໃນວັນທີ 12 ກໍລະກົດ 2023 ວ່າ: ທຸກໆ 2 ປີໃດຈະມີການແຂ່ງຂັນສີມືແຮງງານອາຊຽນ ແລະ ບັນ ດາປະເທດສະມາຊິກອາຊຽນ ຕ້ອງໄດ້ປະຕິບັດພັນທະໃນການເຂົ້າຮ່ວມການແຂ່ງຂັນ ໂດຍນຳໃຊ້ງົບ ປະມານຂອງຕົນ. ການແຂ່ງຂັນສີມືແຮງງານ ແມ່ນການແຂ່ງຂັນທາງດ້ານຄວາມຮູ້, ຄວາມສາມາດ, ສີມືແຮງງານຊ່າງເຕັກນິກ ໂດຍປະຕິບັດຕາມຂັ້ນຕອນ, ມີຄວາມປອດໄພ ແລະ ຮັກສາສິ່ງແວດລ້ອມ, ພ້ອມທັງໄດ້ເປີດໂອກາດໃຫ້ບັນດາຊາວໜຸ່ມ-ໄວໜຸ່ມ, ກຳມະກອນລາວບັນດາເຜົ່າໄດ້ສະແດງສີມື, ທັງເປັນການຊຸກຍູ້ສົ່ງເສີມການປູກຈິດສຳນຶກທີ່ຕິດພັນກັບການຝຶກວິຊາຊີບ ແລະ ພັດທະນາສີມືແຮງງານຫລາຍຂຶ້ນ. ຜ່ານມາ ສປປ ລາວ ໄດ້ເຂົ້າຮ່ວມການແຂ່ງຂັນສີມືແຮງງານລະດັບອາຊຽນ ຄັ້ງທີ I ທີ່ຈັດຂຶ້ນໃນປີ 1995 ທີ່ປະເທດມາເລເຊຍ ໂດຍມີ 4 ປະເທດ ແລະ 6 ສາຂາວິຊາຊ່າງເປັນຕົ້ນມາ. ລວມທັງໝົດ 10 ຄັ້ງ. ໃນນີ້, ເປັນຜູ້ສັງເກດການ 1 ຄັ້ງ, ເຂົ້າຮ່ວມແຂ່ງຂັນ 9 ຄັ້ງ, ສາມາດຍາດມາໄດ້ 1 ຫລຽນເງິນຈາກສາຂາວິຊາຊ່າງຕິດຕັ້ງໄຟຟ້າໃນອາຄານ ໃນການແຂ່ງຂັນສີມືແຮງງານອາຊຽນ ຄັ້ງທີ X ທີ່ຮ່າໂນ້ຍ ແລະ ໄດ້ຮັບໃບຢັ້ງຢືນສີມືແຮງງານລະດັບອາຊຽນ ນຳອີກ.
ໂອກາດນີ້, ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ແຮງງານ ແລະ ສະຫວັດດີການສັງຄົມ ໄດ້ສະແດງຄວາມຍ້ອງຍໍຊົມເຊີຍ ຄະນະຮັບພິຊອບ, ຄູຝຶກ ແລະ ນັກແຂ່ງຂັນ ທີ່ມີຄວາມພະຍາຍາມຝຶກຝົນຫລໍ່ຫລອມຕົນເອງເພື່ອໄດ້ເຂົ້າຮ່ວມແຂ່ງຂັນລະດັບອາຊຽນ ກໍຄື ລະດັບຊາດ. ພ້ອມ ນີ້, ທ່ານຍັງໄດ້ຮຽກຮ້ອງໃຫ້ຄະນະຮັບຜິດຊອບແຕ່ລະສາຂາວິຊາຊ່າງ ລວມທັງນັກແຂ່ງຂັນ, ໃຫ້ມີການມອບໝາຍຄວາມຮັບຜິດຊອບແຕ່ລະໜ້າວຽກ ແລະ ກໍານົດແຜນການເຄື່ອນໄຫວຢ່າງລະອຽດ ເພື່ອເຮັດແນວໃດ ໃຫ້ການແຂ່ງຂັນສີມືແຮງງານມີຄວາມຍຸຕິທຳ, ຄວາມສາມັກຄີ, ມີບັນຍາກາດຟົດຟື້ນ, ມີຄວາມສະຫງົບປອດໄພ ແລະ ມີຜົນສຳເລັດ ຕາມຄາດໝາຍທີ່ກຳນົດໄວ້. ພ້ອມທັງເຊື່ອໝັ້ນວ່າ ດ້ວຍຄວາມຮູ້, ຄວາມສາມາດ, ປະສົບການ ບວກກັບຄວາມຮັບຜິດຊອບຮ່ວມກັນ ຈະເຮັດໃຫ້ການຈັດຕັ້ງແຂ່ງຂັນສີມືແຮງງານຄັ້ງນີ້ ປະສົບຜົນສໍາເລັດ ແລະ ນໍາເອົາໄຊຊະນະ ມາສູ່ປະເທດ.
ຂ່າວ-ພາບ: ຂ່າວສານ ຮສສ
