ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 12 ກໍລະກົດ 2023, ທ່ານ ໄຊຍະເດດ ຜຸຍຍະວົງ ສສຊ ເຂດເລືອກຕັ້ງທີ 13 ແຂວງສະຫວັນນະເຂດ ໄດ້ກ່າວວ່າ: ກົດໝາຍວ່າດ້ວຍ ທະນາຄານທຸລະກິດ ມີຄວາມສຳຄັນຫລາຍ ທັງເປັນບ່ອນອີງ ໃນການຄຸ້ມຄອງເສດຖະກິດ ຕິດພັນກັບການຈັດຕັ້ງປະຕິບັດນະໂຍບາຍເງິນຕາ ຂອງສປປ ລາວ. ແຕ່ໃນມາດ ຕາ 40 ການແລກປ່ຽນເງິນຕາ ສະເໜີໃຫ້ລັດຖະບານ ກຳ ນົດຈະແຈ້ງບັນດາມາດຖານ, ເງື່ອນໄຂຂອງ ທະນາຄານທຸ ລະກິດ ທີ່ດຳເນີນການແລກປ່ຽນເງິນຕາ ຕ້ອງຮັບປະກັນໃຫ້ສາມາດແລກປ່ຽນ ເອົາເງິນຕາຕ່າງປະເທດ ເພື່ອຊຳລະສະສາງສິນຄ້າ ບໍ່ວ່າຈະເປັນວັດຖຸດິບ ກໍຄື ວັດຖຸອຸປະກອນຮັບໃຊ້ການຜະລິດ ແລະ ການນຳເຂົ້າ-ສົ່ງອອກສິນຄ້າ ຂາຍຍົກ-ຂາຍຍ່ອຍ ຂອງບັນດາບໍລິສັດ, ລວມທັງຫົວໜ່ວຍທຸ ລະກິດຂະໜາດໃຫຍ່ ກໍຄື ຂະໜາດກາງ ແລະ ຂະໜາດນ້ອຍ MSME’s ທີ່ສປປ ລາວ ມີອັດຕາສ່ວນສູງເຖິງ 99% ຂອງຫົວໜ່ວຍທັງໝົດ. ຢ່າງໃດກໍຕາມ ໃນສະພາບປັດຈຸ ບັນ ພວກເຮົາສາມາດແລກປ່ຽນເອົາເງິນກີບໄດ້ ແຕ່ແລກ ປ່ຽນເງິນຕາຕ່າງປະເທດບໍ່ໄດ້ ເຊິ່ງເປັນບັນຫາທີ່ຕ້ອງໄດ້ຮັບການແກ້ໄຂ ແລະ ຄວນກຳນົດເປັນມາດຖານເງື່ອນ ໄຂໜຶ່ງ ຂອງການດຳເນີນທຸລະກິດ ແລະ ແລກປ່ຽນເງິນຕາ.
ທ່ານ ໄຊຍະເດດ ຜຸຍຍະວົງ ຍັງໄດ້ສະເໜີໃຫ້ແຍກການດຳເນີນທຸລະກິດທະນາຄານ ອອກຈາກ ກຸ່ມບໍລິສັດ ເພື່ອຮັບປະກັນຄວາມໂປ່ງໃສ, ຍຸຕິທຳ, ກວດສອບໄດ້ງ່າຍ ເພາະເງິນໃນລະບົບທະນາຄານທຸລະກິດ ມີທັງເງິນຈາກທະ ນາຄານ ແຫ່ງ ສປປ ລາວ ທີ່ທະນາຄານທຸລະກິດ ຢືມມາປ່ອຍກູ້ ແລະ ເງິນຝາກຂອງສັງຄົມ ທີ່ໝູນວຽນໃນລະບົບທະນາຄານ. ສະນັ້ນ, ຄວນກຳນົດໃຫ້ລະອຽດ ຈະແຈ້ງ ເຮັດສັງຄົມເພີ່ມຄວາມເຊື່ອໝັ້ນຕື່ມ ບໍ່ຢາກໃຫ້ທະນາຄານທຸລະກິດ ເປັນຄືກັບທຸລະກິດຄອບຄົວທົ່ວໄປ; ພ້ອມນັ້ນ ສະເໜີປັບປຸງມາດຕາ 83 ເພື່ອໃຫ້ການບໍລິຫານຈັດການທະນາຄານທຸລະກິດ ເປັນລັກສະນະມືອາຊີບ, ມີຜູ້ຮັບຜິດ ຊອບໂດຍກົງຕໍ່ໜ້າກົດໝາຍ ຫາກເກີດກໍລະນີບໍ່ເພິ່ງປາຖະ ໜາ ກັບທະນາຄານທຸລະກິດ; ການລົ້ມລະລາຍຂອງທະນາ ຄານທຸລະກິດ ໃດໜຶ່ງ ເປັນບັນຫາໃຫຍ່ຂອງປະເທດ ເຊິ່ງຈະສົ່ງຜົນກະທົບໃນວົງກວ້າງ ໃຫ້ແກ່ສັງຄົມ ດ້ວຍເຫດນັ້ນ ຄວນກຳນົດວິທີການແກ້ໄຂໃຫ້ຮັດກຸມ. ຕໍ່ກັບການແກ້ໄຂວິກິດ ຂອງທະນາຄານທຸລະກິດ ໃນມາດຕາ 80 ການແກ້ໄຂທະນາຄານທຸລະກິດ ທີ່ຢູ່ໃນພາວະວິກິດ ສະ ເໜີ ໃຫ້ລັດຖະບານ ມີການແຕ່ງຕັ້ງຄະນະກຳມະການລະ ດັບຊາດ ເຊິ່ງປະກອບມີບັນດາກະຊວງ/ອົງການທຽບເທົ່າເຂົ້າຮ່ວມ ແນໃສ່ເຮັດໃຫ້ການແກ້ໄຂບັນຫາໄດ້ຢ່າງຄອງຕົວ ຮັບປະກັນບໍ່ໃຫ້ຜູ້ຝາກເງິນອັບປະໂຫຍດ.
ຂ່າວ:ກິດຕາ
