ຕາມຂ່າວຈາກວິທະຍຸສາກົນຫວຽດນາ, ກອງປະຊຸມສຸດຍອດ ອົງການອັດລັງຕິກເໜືອ (NATO) ຖືກໄຂຂຶ້ນ ໃນວັນທີ 11-12 ກໍລະກົດນີ້, ຢູ່ ນະຄອນຫລວງ Vilnius ຂອງລິດວາ. ຈາກນັ້ນ ບັນດາ ການນຳ NATO ໄດ້ໃຫ້ບຸລິມະສິດ ແກ້ໄຂ ສິ່ງທ້າທາຍຕ່າງໆ ເປັນຕົ້ນແມ່ນ: ແຜນການ ຮັບເອົາ ຊູແອັດ ແລະ ອູແກຣນ ເຂົ້າເປັນສະມາຊິກ; ຄວາມຄືບໜ້າ ໃນການເພີ່ມກຳລັງ ປະຈຳການ ຢູ່ເຂດ ທາງທິດຕາເວັນອອກ.ນອກນີ້ ຍັງໄດ້ອອກ ຖະແຫລງການ ກ່ຽວກັບ ອະນາຄົດ ຂອງເລື່ອງ ອູແກຣນ ເຂົ້າເປັນສະມາຊິກ NATO. ບັນດາການນຳ NATO ຍັງໄດ້ເຫັນດີ ເປັນເອກະ ພາບກັບ ມາດຕະການ ທີ່ມີ 3 ປັດໄຈ ຊ່ວຍໃຫ້ ອູແກຣນ ເຂົ້າເປັນສະມາຊິກ NATO, ລວມມີ: ລາຍການ ໜູນຊ່ວຍໃໝ່ ແກ່ຍາວ ໃນຫລາຍປີ ເພື່ອແນ ໃສ່ ສ້າງເງື່ອນໄຂ ສະດວກ ໃຫ້ແກ່ ວິວັດການ ຫັນປ່ຽນ ກຳລັງ ປະກອບ ອາວຸດ ອູແກຣນ ໃຫ້ບັນລຸມາດຖານຂອງ NATO, ຊ່ວຍສ້າງຄືນ ຂົງເຂດ ປ້ອງກັນຊາດ ແລະ ປ້ອງກັນ ຄວາມສະຫງົບຂອງ ອູແກຣນ, ຕອບ ສະ ໜອງ ບັນດາຄວາມຕ້ອງການ ສຳຄັນຄື ເຊື້ອໄຟ, ອຸປະກອນ ເກັບກູ້ ລູກລະເບີດ ຍັງບໍ່ທັນແຕກ ແລະ ອຸປະກອນການແພດ ພ້ອມທັງ ເຫັນດີເປັນ ເອກະ ພາບ ສ້າງສະພາ NATO-ອູແກຣນ ໃໝ່./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
