ຫ້ອງການກະຊວງການເງິນ ຮ່ວມກັບ ບໍລິສັດໄຊຍະສິດ ໄອທີ ທີ່ປຶກສາ ຈໍາກັດຜູ້ດຽວ ເຊັນສັນຍາ ວ່າດ້ວຍການພັດທະນາ ແລະ ຈັດຕັ້ງປະຕິບັດລະບົບຄຸ້ມຄອງການເກັບລາຍຮັບຄ່າທໍານຽມທາງແບບເອເລັກໂຕຣນິກ (RTMS) ໃນວັນທີ 11 ກໍລະກົດ ຜ່ານມາ ໂດຍດານຮ່ວມລົງນາມ ລະ ຫວ່າງ ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ ແລະ ທ່ານ ນາງ ຈັນສຸດາ ສີສະຫວັດ ຮອງປະທານ ບໍລິສັດໄຊຍະສິດ ໄອທີ ທີ່ປຶກສາຈໍາກັດ ຜູ້ດຽວ ໂດຍມີພາກສ່ວນກ່ຽວຂ້ອງສອງຝ່າຍຮ່ວມເຊັນເປັນສັກຄີພະຍານ.
ໃນພິທີ, ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ໄດ້ໃຫ້ຮູ້ວ່າ: ເພື່ອແນໃສ່ຮັບປະກັນການເກັບລາຍຮັບລວມສູນ ໃນຂອບເຂດທົ່ວປະເທດ ດ້ວຍການນຳໃຊ້ເຄື່ອງມືທັນສະໄໝ ໃຫ້ມີຄວາມສະດວກ, ວ່ອງໄວ, ຍຸຕິທຳ, ໂປ່ງໄສ, ສາມາດກວດສອບໄດ້ ແລະ ສະຫລຸບລາຍງານ ໃຫ້ທັນກຳນົດເວລາ, ຄະນະຮັບຜິດຊອບການຕັ້ງປະຕິບັດໂຄງການ, ຄະນະນຳ ແລະ ຄະນະວິຊາການໄດ້ເອົາໃຈໃສ່ເຮັດວຽກຮ່ວມກັນໃນການພັດທະນາ ລະບົບຄຸ້ມຄອງ ການເກັບລາຍຮັບຄ່າທຳນຽມທາງ ແບບເອເລັກໂຕຣນິກ, ຊຶ່ງໃຊ້ເວລານັບແຕ່ເດືອນ ມິຖຸນາ 2022 ເປັນຕົ້ນມາ ໃນການພັດທະນາລະບົບ ແລະ ປັດຈຸບັນ ໄດ້ສຳເລັດການຜັນຂະຫຍາຍ ລະບົບຄຸ້ມຄອງການເກັບລາຍຮັບຄ່າທຳນຽມທາງ ແບບເອເລັກໂຕຣນິກ (RTMS) ສ່ວຍສາອາກອນປະຈຳ 18 ແຂວງ, ສ່ວຍສາອາກອນ 148 ເມືອງ, ກອງຄຸ້ມຄອງພາຫະນະ ແລະ ການຂັບຂີ່ ໃນຂອບເຂດທົ່ວເທດ ແລະ ພ້ອມທັງຊຳລະຜ່ານລະບົບຂອງທະນາຄານທຸລະກິດ ໂດຍຜ່ານລະບົບ FinLink. ຜ່ານການຈັດຕັ້ງປະຕິບັດຈັດເກັບລາຍຮັບຄ່າທໍານຽມທາງ ມາຮອດປັດຈຸບັນ , ສາມາດຈັດເກັບຄ່າທໍານຽມທາງໄດ້ປະມານ 68,8 ຕື້ກີບ, ຈໍານວນພາຫະນະ 372.159 ຄັນ, ທຽບໃສ່ແຜນການປີ 2023 ໄດ້ 55%.
ທ່ານ ອາລຸນຍະເດດ ສະຣິດທິລາດ ຜູ້ອໍານວຍການ ບໍລິສັດໄຊຍະສິດ ໄອທີ ທີ່ປຶກສາ ຈໍາກັດຜູ້ດຽວ ໄດ້ໃຫ້ຮູ້ວ່າ: ໃນດ້ານການພັດທະນາ ແລະ ການຈັດຕັ້ງປະຕິບັດຕົວຈິງ, ບໍລິສັດ ໄດ້ພັດທະນາລະບົບຄຸ້ມຄອງການຈັດເກັບຄ່າ ທໍານຽມທາງເອເລັກໂຕຣນິກແບບໃໝ່ ສໍາເລັດ ແລະ ຊ່ວຍສະໜັບສະໜູນການຜັນຂະຫຍາຍການນໍາໃຊ້ລະບົບດັ່ງກ່າວ ໃນຂອບເຂດທົ່ວປະເທດ ຮ່ວມກັບຄະນະຮັບຜິດຊອບຂອງກະຊວງການເງິນ, ໂດຍລະບົບ RTMS ສາມາດຮັບຊຳລະຄ່າທໍານຽມທາງດ້ວຍ 2 ຮູບແບບຄື: 1. ຊໍາລະຜ່ານລະບົບທະນາຄານໂດຍເຊື່ອມຕໍ່ຜ່ານລະບົບ FinLINk, 2. ຊໍາລະດ້ວຍເງິນສົດຜ່ານລະບົບຄັງເງິນ ແລະ ໄດ້ນໍາໃຊ້ໃບເສຍຄ່າທຳນຽມທາງ 2 ຮູບແບບຄື: ແບບແຜ່ນເຈ້ຍ (ສະຕິກເກີ້) ແລະ ແບບເອເລັກໂຕຣນິກ (E-Sticker) ເພື່ອເປັນເອກະສານຢັ້ງຢືນຕໍ່ເຈົ້າໜ້າທີ່ຜູ້ຮັບຜິດຊອບກວດກາ, ຜູ້ທີ່ນໍາໃຊ້ພາຫະນະສາມາດຊໍາລະຄ່າທໍານຽມທາງ ແລະ ຮັບເອົາສະຕິກເກີ້ໃບເສຍຄ່າທໍານຽມທາງ ໄດ້ຢ່າງສະດວກສະບາຍ ໂດຍຜ່ານປ່ອງບໍລິການຂອງບັນດາທະນາຄານທີ່ເປັນຕົວແທນ ຫລື ເຂົ້າຮ່ວມໂຄງການໃນການຈັດເກັບຄ່າທໍານຽມທາງ, ຫ້ອງການຂະແໜງສ່ວຍສາອາກອນ, ຫ້ອງການກອງຄຸ້ມຄອງພາຫະນະ ແລະ ການຂັບຂີ່, ສູນກວດກາເຕັກນິກ ແລະ ຫ້ອງການປົກຄອງບ້ານ ໃນຂອບເຂດທົ່ວປະເທດ.
