ກອງປະຊຸມສະໄໝສາມັນເທື່ອທີ 8 ຂອງຄະນະກໍາມະການ ໄອຍະການປະຊາຊົນສູງສຸດ ຊຸດທີ II ຈັດຂຶ້ນໃນວັນທີ 13 ກໍລະກົດ 2023 ໂດຍການເປັນປະທານຂອງ ທ່ານ ໄຊຊະນະ ໂຄດພູທອນ ຫົວໜ້າອົົງການໄອຍະການປະຊາຊົນສູງສຸດ, ປະທານຄະນະກຳມະການໄອຍະການປະຊາ ຊົນສູງສຸດ, ມີຮອງປະທານ, ຄະນະກຳມະການ ແລະ ກອງເລຂາຄະນະກໍາມະການໄອຍະການປະຊາ ຊົນສູງສຸດ ເຂົ້າຮ່ວມ.
ໃນກອງປະຊຸມ, ຜູ້ເຂົ້າຮ່ວມໄດ້ພ້ອມກັນປຶກສາຫາລື, ປະກອບຄວາມເຫັນ ຕໍ່ກັບບັນຫາທີ່ພົ້ນເດັ່ນ ເປັນຕົ້ນ ການປັບປຸງພາລະບົດບາດວຽກງານຫ້ອງການໃຫ້ຄຳປຶກສາ; ການປ່ຽນແປງໃໝ່ໃນລະ ບົບອົງການໄອຍະການປະຊາຊົນ; ປັບປຸງຂໍ້ຕົກລົງຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍພະນັກງານໄອຍະການປະຊາຊົນ ແລະ ສະເໜີເປັນກົດໝາຍໃນຕໍ່ໜ້າ; ການສ້າງຕັ້ງຫ້ອງການໄອຍະການປະຊາຊົນເຂດ ປະຈຳເມືອງເພີ້ມຕື່ມ 5-7 ເຂດ ພາຍໃນປີ 2023; ການປະຕິບັດນະໂຍບາຍຕໍ່ພະນັກງານໄອຍະການປະຊາຊົນ; ປຶກສາກ່ຽວກັບພາລະບົດບາດ ການຕິດຕາມກວດກາການດຳເນີນຄະດີແພ່ງ ແລະ ການສັ່ງຟ້ອງຜູ້ຖືກຫາຂຶ້ນສານໂດຍກົງ.
ໂອກາດນີ້, ທ່ານປະທານກອງປະຊຸມ ໄດ້ໃຫ້ທິດຊີ້ນໍາ ແລະ ເນັ້ນໜັກໃຫ້ຄະນະກຳມະການ ໄອຍະການປະຊາຊົນສູງສຸດ ຕ້ອງເພີ່ມທະວີຄວາມເອົາໃຈໃສ່ໃນການຄົ້ນຄວ້າ, ເຊື່ອມຊຶມ ແລະ ກຳແໜ້ນເນື້ອໃນຈິດໃຈຜົນຂອງກອງປະຊຸມ ແລະ ບັນດາແຜນວຽກຈຸດສຸມໃນໄຕມາດ III ປີ 2023 ຢ່າງເລິກເຊິ່ງ, ຫັນເປັນອັນລະອຽດ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ. ນອກນັ້ນ, ກໍຕ້ອງເພີ່ມທະວີໃນການນຳພາ-ຊີ້ນຳ ຂອງຄະນະກຳມະການໄອຍະການປະຊາຊົນສູງສຸດ ຢ່າງມີຈຸດສຸມ ແທດເຖິງຕໍ່ການປະຕິບັດໜ້າທີ່ວຽກງານຂອງສະມາຊິກພັກ ແລະ ພະນັກງານ, ເອົາໃຈໃສ່ຕິດຕາມ, ຊຸກຍູ້ບັນດາວຽກງານປິ່ນອ້ອມ, ສິ່ງເອື້ອອຳນວຍຄວາມສະດວກໃຫ້ແກ່ການ ເຄື່ອນໄຫວວຽກງານໃຫ້ດີ ແລະ ທັນເວລາ ເພື່ອເຮັດໃຫ້ການດຳເນີນຄະດີໄປຕາມກົດໝາຍ ແລະ ລະບຽບຫລັກການ, ຮັບປະກັນໃຫ້ການດຳເນີນຄະດີໄປ ຕາມຂະບວນການຍຸຕິທຳ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.
ຂ່າວ-ພາບ: ຈະເລີນສິນ
