ໃນວັນທີ 11 ກໍລະກົດ ຜ່ານມາ, ທ່ານ ວັນແສງ ແກ້ວບຸນພັນ ວ່າການຫົວໜ້າພະແນກອຸດສາຫະກຳ ແລະ ການຄ້າແຂວງສະຫວັນນະເຂດ, ທ່ານ ແກ້ວອຸດອນ ສິດທິຊົນ ຫົວໜ້າຂະແໜງການຄ້າພາຍໃນ ພ້ອມຄະນະຂະແໜງ ແລະ ວິຊາການທີ່ກ່ຽວຂ້ອງ ໄດ້ລົງຕິດຕາມຊຸກຍູ້ການປັບປຸງຕະຫຼາດຫຼັກ 8 ບ້ານອຸດົມວິໄລ ນະຄອນໄກສອນ ພົມວິຫານ ແຂວງສະຫວັນນະເຂດ ໃຫ້ມີການຈັດສັນຄວາມເປັນລະບຽບ ເພື່ອໃຫ້ຖືກຕ້ອງຕາມມາດຕະຖານເງື່ອນໄຂ ແລະ ກາຍເປັນຕະຫຼາດຕົວແບບອີກແຫ່ງໜຶ່ງຂອງແຂວງ. ພ້ອມນີ້, ກໍຍັງເປັນການຕິດຕາມ, ກວດກາສະພາບການດຳເນີນທຸລະກິດຂອງຕະຫຼາດດັ່ງກ່າວ ໃຫ້ມີຄວາມຖືກຕ້ອງສອດຄ່ອງຕາມລະບຽບກົດໝາຍ. ໂອກາດນີ້, ທ່ານ ວັນແສງ ແກ້ວບຸນພັນ ກໍໄດ້ຍົກໃຫ້ຮູ້ເຖິງຈຸດປະສົງໃນການລົງເຄື່ອນໄຫວວຽກງານໃນຄັ້ງນີ້ ຊຶ່ງອີງຕາມທິດທາງແຜນການຂອງທາງພະແນກອຸດສາຫະກຳ-ການຄ້າແຂວງ ທີ່ມີເປົ້າໝາຍຢາກປັບປຸງ ແລະ ຍົກລະດັບຕະຫຼາດຫຼັກ 8 ໃຫ້ໄດ້ມາດຕະຖານ ພ້ອມທັງຂໍຄວາມຮ່ວມມືນຳຜູ້ບໍລິຫານຕະຫຼາດ ໃຫ້ເອົາໃຈໃສ່ໃນການຈັດສັນ ແລະ ຄຸ້ມຄອງພາຍໃນຕະຫຼາດ ເພື່ອໃຫ້ມີຄວາມເປັນລະບຽບຮຽບຮ້ອຍ, ຊຸກຍູ້ການແລກປ່ຽນຊື້-ຂາຍພາຍໃນຕະຫຼາດ, ຮັບປະກັນການສະໜອງສິນຄ້າທີ່ມີຄຸນນະພາບ ແລະຄວາມປອດໄພໃຫ້ແກ່ສັງຄົມ ແລະ ສິ່ງແວດລ້ອມ ປະກອບສ່ວນເຂົ້າໃສ່ການແກ້ໄຂຄວາມທຸກຍາກ ແລະຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນກວ່າເກົ່າ.
ຈາກນີ້, ທ່ານ ວັນແສງ ແກ້ວບຸນພັນ ກໍໄດ້ສະແດງຄວາມເສຍໃຈນຳຕໍ່ຄວາມເສຍຫາຍຈາກໄຟໄໝ້ຕະຫຼາດ ທີ່ໄດ້ສ້າງຄວາມສູນເສຍຢ່າງມະຫາສານບໍ່ວ່າຈະເປັນເຈົ້າຂອງຕະຫຼາດ ຕະຫຼອດເຖິງພໍ່ຄ້າຊາວຂາຍພາຍໃນຕະຫຼາດ ແລະ ກໍຍິນດີໃຫ້ການຊ່ວຍເຫຼືອໃນສິ່ງທີ່ພໍຊ່ວຍໄດ້ ເປັນຕົ້ນວ່າ: ຖ້າຫາກທາງຕະຫຼາດຢາກໃຫ້ຊ່ວຍເລື່ອງການຍົກເວັ້ນພາສີໃນການນຳເຂົ້າເຫຼັກ ເພື່ອຮັບໃຊ້ການກໍ່ສ້າງຕະຫຼາດ ແມ່ນໃຫ້ເຮັດໜັງສືສະເໜີຫາພະແນກພວກເຮົາ ທັງນີ້ກໍເພື່ອຫຼຸດຕົ້ນທຶນການກໍ່ສ້າງ; ຈາກນັ້ນ, ທ່ານ ນາງ ນ້ອຍ ບຸບຜາ ຜູ້ບໍລິຫານຕະຫຼາດຫຼັກ 8 ກໍໄດ້ກ່າວສະແດງຄວາມຕ້ອນຮັບຄະນະນຳຂອງພະແນກອຸດສາຫະກຳ ແລະ ການຄ້າແຂວງ ພ້ອມທັງກ່າວລາຍງານສະພາບການເຄື່ອນໄຫວຂອງຕະຫຼາດຫຼັກ 8 ໃນໄລຍະຜ່ານມາ ຊຶ່ງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍບາງປະການ ເພື່ອໃຫ້ຂັ້ນເທິງຮັບຊາບ ແລະ ແກ້ໄຂຊ່ວຍໃນຕໍ່ໜ້າ. ຕະຫຼາດຫຼັກ 8 ມີຂະໜາດຄວາມກວ້າງ 42 ແມັດ ແລະ ຍາວ 82 ແມັດ, ໄດ້ເປີດໃຫ້ບໍລິການໃນປີ 2018 ແລະມາໃນວັນທີ 11/8/2022 ໄດ້ເກີດເຫດໄຟໄໝ້ຕະຫຼາດ ຊຶ່ງໄດ້ສ້າງຄວາມເສຍຫາຍຕໍ່ຕະຫຼາດປະມານ 15 ຕື້ກີບ ແລະ ຕໍ່ແມ່ຄ້າປະມານ 20-30 ຕື້ກີບ, ສຳລັບການກໍ່ສ້າງປັບປຸງຕະຫຼາດຫຼັງໃໝ່ ໄດ້ເລີ່ມໃນເດືອນມັງກອນ 2023 ແລະ ຄາດວ່າຊ້າສຸດ ຕົ້ນປີ 2024 ຈະເປີດນຳໃຊ້ຕະຫຼາດຫຼັງໃໝ່. ນາງ ນ້ອຍ ບຸບຜາ ຍັງກ່າວຕື່ມວ່າ: ຕະຫຼາດຫຼັກ 8 ເປັນຕະຫຼາດແບບຄອບຄົວ ໂດຍໄດ້ມີຄວາມຮັກແພງຊ່ວຍເຫຼືອຊຶ່ງກັນ ແລະ ກັນ ທັງຜູ້ຄຸ້ມຄອງຕະຫຼາດ ແລະ ຜູ້ຄ້າຂາຍ ແລະ ໃນໄລຍະໄຟໄໝ້ຕະຫຼາດ ກໍໄດ້ໃຫ້ກຳລັງໃຈກັນ ພ້ອມທັງຂຸ້ນຂ້ຽວປັບປຸງແກ້ໄຂເພື່ອໃຫ້ພໍ່ຄ້າແມ່ຄ້າ ໄດ້ມີພື້ນທີ່ຄ້າຂາຍ ເພື່ອແກ້ໄຂຊີວິດການເປັນຢູ່ຂອງເຂົາເຈົ້າ; ຕໍ່ກັບບັນຫາເງິນບາດແຂງຄ່າ ແຕ່ທາງຕະຫຼາດຫຼັກ 8 ພວກເຮົາ ແມ່ນບໍ່ໄດ້ຫວັ່ນໄຫວ ໂດຍຍັງເກັບຄ່າເຊົ່າໃນລາຄາເກົ່າຄື 15 ພັນກີບ/ມື້. ຈາກນີ້, ໃນນາມຜູ້ບໍລິຫານຕະຫຼາດ ກໍມີຄວາມຍິນດີ ແລະພ້ອມທີ່ຈະໃຫ້ການຮ່ວມມືນຳພາກລັດໃນການສ້າງຕະຫຼາດຫຼັກ 8 ໃຫ້ເປັນຕະຫຼາດທີ່ໄດ້ມາດຕະຖານ ແລະເປັນຕະຫຼາດຕົວແບບອີກແຫ່ງໜຶ່ງຂອງແຂວງສະຫວັນນະເຂດ.
ສຳລັບມາດຕະຖານ ແລະ ເງື່ອນໄຂການສ້າງຕະຫຼາດຕົວແບບຂະໜາດໃຫຍ່ ແລະ ກາງ ປະກອບມີທັງໝົດ 18 ຂໍ້ ຊຶ່ງຕະຫຼາດຫຼັກ 8 ແມ່ນຈັດຢູ່ໃນປະເພດຕະຫຼາດກາງ.
(ຂ່າວ-ພາບ: ສະຫວັນນະເຂດ)
