ກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກກະຊວງແຮງງານ ແລະສະຫວັດດີການສັງຄົມ ສະໄໝທີ VI ໄດ້ເປີດຂຶ້ນໃນວັນທີ 13 ກໍລະກົດ ນີ້ ທີ່ເຮືອນຮັບແຂກກະຊວງແຮງງານ ແລະ ສະຫວັດດີການສັງຄົມ ໃຫ້ກຽດເຂົ້າຮ່ວມຂອງ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັກດຕັ້ງສູນກາງ, ໂດຍການເປັນປະທານຂອງ ສະຫາຍ ນາງ ໃບຄຳ ຂັດທິຍະ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ມີບັນດາຄະນະພັກ ແລະ ສະມາຊິກພັກອ້ອມຂ້າງກະຊວງແຮງງານ ແລະ ສະຫວັດດີການສັງຄົມເຂົ້າຮ່ວມ.
ສະຫາຍ ນາງ ໃບຄຳ ຂັດທິຍະ ໄດ້ກ່າວວ່າ: ກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກກະຊວງແຮງງານ ແລະ ສະຫວັດດີການສັງຄົມ ສະໄໝທີ VI ແມ່ນເພື່ອເປັນການສະຫຼຸບຕີລາຄາວຽກງານກາງສະໄໝ (2 ປີເຄິ່ງ) ຜົນການຊີ້ນໍາ-ນໍາພາປະຕິບັດບັນດາຄາດໝາຍສູ້ຊົນໃນມະຕິກອງປະຊຸມໃຫຍ່ຄັ້ງ 11 ຂອງພັກ, ແຜນວຽກຈຸດສຸມ, ຕົວຊີ້ບອກ ຂອງຂະແໜງ ຮສສ ໃນແຜນພັດທະນາເສດຖະກິດ – ສັງຄົມ 5 ປີ ຄັ້ງທີ 9, ມະຕິກອງປະຊຸມໃຫຍ່ຄັ້ງທີ 6 ຂອງອົງຄະນະພັກ ຮສສ, ແຜນພັດທະນາ ຮສສ 5 ປີ ຄັ້ງທີ 5, ຕິດພັນກັບ ສອງວາລະແຫ່ງຊາດ. ພວກເຮົາຈະໄດ້ພ້ອມກັນຕີລາຄາຢ່າງພາວະວິໄສ ດ້ານຜົນສຳເລັດ, ຂໍ້ຄົງຄ້າງ, ສາເຫດ ໃຫ້ຈະແຈ້ງຊັດເຈນ ສອດຄ່ອງກັບສະພາບເງື່ອນໄຂຄວາມເປັນຈິງ, ຊອກໃຫ້ເຫັນບັນຫາທີ່ຕິດພັນກັບຄວາມຮັບຜິດຊອບ ລວມຂອງອົງຄະນະພັກ, ບັນດາສະຫາຍໃນຄະນະພັກ, ບັນດາໜ່ວຍພັກ ແລະ ບັນດາສະຫາຍຄະນະໜ່ວຍພັກ ເພື່ອສັງລວມເປັນບົດຮຽນທີ່ດີ, ສາເຫດຂໍ້ຄົງຄ້າງ, ຊອກຫາທາງອອກເພື່ອແກ້ໄຂບັນຫາ, ທັງເປັນການກຳນົດທິດທາງ, ຄາດໝາຍສູ້ຊົນໃນໄລຍະສອງປີເຄິ່ງໃຫ້ສອດຄ່ອງກັບຄວາມເປັນຈິງ, ສາມາດຈັດຕັ້ງປະຕິບັດມີຜົນສຳເລັດ, ທັງເປັນການສ້າງການຫັນປ່ຽນໃໝ່ ຮອບດ້ານ, ແຂງແຮງ, ເລິກເຊິ່ງຢ່າງແທ້ຈິງ. ກອງປະຊຸມຄົບຄະນະກາງສະໄໝຂອງອົງຄະນະພັກກະຊວງ ຮສສ ໃນຄັ້ງນີ້, ໄດ້ເປີດໂອກາດໃຫ້ບັນດາສະຫາຍສະມາຊິກພັກ, ໄດ້ປະກອບຄໍາຄິດຄໍາເຫັນຕໍ່ການຊີ້ນຳ-ນຳພາຂອງອົງຄະນະພັກ, ບັນດາສະຫາຍໃນຄະນະໜ່ວຍພັກ ຕິດພັນກັບຄວາມຮັບຜິດຊອບລວມ ແລະ ສະເພາະບຸກຄົນ. ເພື່ອກ້າວເຂົ້າສູ່ລວງເລິກ, ກອງປະຊຸມໃນຄັ້ງນີ້ ໄດ້ພ້ອມກັນຄົ້ນຄວ້າປະກອບຄຳຄິດ ຄຳເຫັນໃສ່ບົດສະຫຼຸບຕີລາຄາການເຄື່ອນໄຫວ ນຳພາ-ຊີ້ນຳວຽກງານຂອງອົງຄະນະພັກ ໄລຍະກາງສະໄໝ ແລະ ກຳນົດທິດທາງແຜນການ ເຄິ່ງສະໄໝ ໃນຕໍ່ໜ້າ;
ໃນໂອກາດນີ້, ທ່ານ ນາງ ສີໄສ ລືເດດມູນສອນ ໄດ້ມີຄຳເຫັນຕໍ່ການທາບທາມຢັ່ງຫາງສຽງຄວາມເຊື່ອໝັ້ນໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ກະຊວງແຮງງານ ແລະ ສະຫວັດດີການສັງຄົມ ເພື່ອໃຫ້ພະນັກງຫຼັກແຫຼ່ງໄດ້ປະກອບຄຳຄິດຄຳເຫັນຂອງຕົນ ຕໍ່ຄວາມຮັບຜິດຊອບລວມຂອງຄະນະພັກໂດຍສະເພາະໃຫ້ລົງເລິກປະກອບຄິດຄຳເຫັນໃຫ້ບັນດາສະຫາຍຄະນະພັກດ້ວຍຄວາມຈິງໃຈ ເພື່ອຊ່ວຍປັບປຸງກໍ່ສ້າງພະນັກງານນຳພາຄຸ້ມຄອງຂອງຕົນໃຫ້ມີຄວາມປອດໃສເຂັ້ມແຂງ, ໜັກແໜ້ນຮອບດ້ານ, ການປະກອບຄຳຄິດຄຳເຫັນຕຳນິສົ່ງຂ່າວ ເພື່ອຊ່ວຍໃຫ້ພະນັກງານນຳພາຄຸ້ມຄອງໄດ້ປັບປຸງປ່ຽນແປງຕົນເອງ, ແກ້ໄຂຈຸດອ່ອນ ແລະ ຂໍ້ຄົງຄ້າງເພື່ອກ້າວຂຶ້ນເຮັດສຳເລັດໜ້າທີ່ໆພັກ-ລັດມອບໝາຍໃຫ້.
ຂ່າວ-ພາບ: ບຸນຕອມ
