ປີ 2023 ນີ້ ແຂວງອັດຕະປື ມີແຜນການກຽມປ່ອຍປາ ກັບຄືນສູ່ແຫຼ່ງນໍ້າທໍາມະຊາດໃຫ້ໄດ້ ຈໍານວນ 4.942.000 ໂຕ,ໃນນີ້ ຈະປ່ອຍໃນວັນທີ 13 ກໍລະກົດ ວັນປ່ອຍປາ ແລະ ອະນຸລັດສັດນໍ້າ-ສັດປ່າ ແຫ່ງຊາດ ມີຈໍານວນ 558.000 ໂຕ, ເຊິ່ງປາທີ່ຈະປ່ອຍ ມີ: ປາປາກ, ປາໃນ, ປານິນ, ປາກິນຫຍ້າ, ປາເກັດແລບ,ໃນນັ້ນ: ຢູ່ເມືອງສາມັກຄີໄຊ ຈະປ່ອຍປາ ລົງວັງທ່າວັດ ບ້ານໃຫຍ່ໝື່ນຫົວເມືອງ, ເມືອງໄຊເສດຖາ ຈະປ່ອຍລົງ ວັງສະຫງວນ ທ່າວັດ ບ້ານສະແຄະ, ເມືອງສະໜາມໄຊ ຈະປ່ອຍລົງ ທ່າບ້ານ ມິດສຳພັນ, ເມືອງພູວົງ ປ່ອຍລົງ ຫ້ວຍປຣອກ, ເມືອງຊານໄຊ ປ່ອຍລົງອ່າງເກັບນໍ້າເຂື່ອນໄຟຟ້າເຊກະໝານ 1.
ທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງອັດຕະປື ໄດ້ໃຫ້ສໍາພາດຕໍ່ສື່ມວນຊົນຂອງແຂວງ ເມື່ອວັນທີ 12 ກໍລະກົດ 2023 ນີ້ວ່າ: ເພື່ອເຮັດໃຫ້ຂະບວນການປ່ອຍປາໃນປີນີ້ ເປັນຂະບວນການຟົດຟື້ນ ແລະ ມີສ່ວນຮ່ວມໃນທົ່ວສັງຄົມ ທາງພະແນກກະສິກຳ ແລະ ປ່າໄມ້ ແຂວງ ໄດ້ສະເໜີໃຫ້ທ່ານເຈົ້າແຂວງອອກເປັນຄໍາສັ່ງ ວ່າດ້ວຍ ການສ້າງຂະບວນການອະນຸລັກສັດນໍ້າ-ສັດປ່າ ແລະ ປ່ອຍປາຄືນສູ່ທໍາມະຊາດ, ໄດ້ແນະນໍາໃຫ້ຂະແໜງການກ່ຽວຂ້ອງ, ອົງການ ປົກຄອງເມືອງ-ບ້ານ ໃຫ້ມີມາດຕະການປົກປັກຮັກສາ ແລະ ຄຸ້ມຄອງວັງສະຫງວນ, ກໍຄືປົກປັກຮັກສາອະນຸລັກສັດນໍ້າ-ສັດປ່າ ໃຫ້ເຂັ້ມງວດຂຶ້ນກວ່າເກົ່າ, ພ້ອມນັ້ນ ຍັງຊິ້ນໍາຂະແໜງລ້ຽງສັດ ແລະ ການປະມົງ ລົງສົມທົບກັບບັນດາສະຖານີ, ຫົວໜ່ວຍຄອບຄົວຜະລິດລູກປາ ໃນທົ່ວແຂວງ ເພື່ອຈໍາໜ່າຍພາຍໃນແຂວງ.
ທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງອັດຕະປື ໄດ້ກ່າວຕື່ມວ່າ: ປະຈຸບັນທົ່ວແຂວງອັດຕະປື ມີແຫຼ່ງນ້ຳທຳມະຊາດ ສໍາຄັນ 6 ແຫ່ງ ຄື: ນໍ້າເຊກອງ, ເຊກະໜານ, ເຊປຽນ, ເຊຊຸ, ເຊນໍ້ານ້ອຍ ແລະ ນໍ້າກົງ, ທົ່ວແຂວງມີວັງສະຫງວນທັງໝົດ 39 ແຫ່ງ,ໃນ 36 ບ້ານ ແລະ ມີເນື້ອທີ່ວັງສະຫງວນທັງໝົດ 285,25 ເຮັກຕາ ແລະ ໃນຕໍ່ໜ້ານີ້ ຈະໄດ້ສົມທົບກັບພາກສ່ວນທີ່ກ່ຽວຂ້ອງໃນການຂະຫຍາຍວັງສະຫງວນຕື່ມອີກ.
ພ້ອມນັ້ນທ່ານ ຍັງໄດ້ຮຽກຮ້ອງໃຫ້ທຸກພາກສ່ວນທົ່ວສັງຄົມ ຈົ່ງພ້ອມກັນເຂົ້າຮ່ວມຂະບວນການປ່ອຍປາ ໃນວັນປ່ອຍປາແຫ່ງຊາດ 13 ກໍລະກົດ ໃຫ້ເປັນຂະບວນຟົດຟື້ນ ພ້ອມກັນເອົາໃຈໃສ່ເຂົ້າຮ່ວມຂະບວນການອະນຸລັກຮັກສາ ສັດນໍ້າ-ສັດປ່າ ແລະ ຊີວະນາໆພັນພາຍໃນທົ່ວແຂວງ ໃຫ້ມີຄວາມອຸດົມສົມບູນເລື້ອຍໆໄປ .
ຂ່າວ: ວັດທະນາ
