ໂດຍປະຕິບັດຕາມແຜນການພົວພັນຕ່າງປະເທດປະຈໍາປີ 2023 ຂອງຄະນະໂຄສະນາອົບຮົມສູນກາງພັກ (ຄອສພ), ແຜນການພົວພັນຮ່ວມມືລະຫວ່າງວາລະສານອະລຸນໃໝ່ ວາລະສານທິດສະດີ ແລະ ພຶດຕິກໍາຂອງສູນກາງພັກປະຊາຊົນ ປະຕິວັດລາວ ແລະ ວາລະສານກົ້ງສານ ວາລະສານທິດສະດີ ແລະ ການເມືອງຂອງຄະນະບໍລິຫານງານສູນກາງພັກກອມມູນິດຫວຽດນາມ ໃນໄລຍະປີ 2023-2027, ຂໍ້ຕົກລົງວ່າດ້ວຍການອະນຸມັດສ້າງວາລະສານ ເອເລັກໂຕຣນິກ ຂອງວາລະສານອະລຸນໃໝ່ ສະບັບເລກທີ 44/ຄອສພ, ລົງວັນທີ 6/3/2023.
ໃນວັນທີ 5 ກໍລະກົດ ນີ້ ທີ່ ຄອສພ ໄດ້ມີພິທີມອບ-ຮັບເຄື່ອງຊ່ວຍເຫຼືອຈາກວາລະສານກົ້ງສານ ແລະ ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (ຫວຽດເທວ) ໃຫ້ແກ່ວາລະສານອະລຸນໃໝ່, ຕາງໜ້າມອບໂດຍ ສະຫາຍ ເລ ຫ່າຍ ຄະນະບັນນາທິການ ຫົວໜ້າກົມວາລະສານເອເລັກໂຕຣນິກ ຂອງວາລະສານກົ້ງສານ ພ້ອມດ້ວຍຄະນະ ແລະ ຮັບໂດຍ ສະຫາຍ ລາວປ່າວຊົ່ງ ນະວົງໄຊ ຮອງຫົວ ໜ້າ ຄອສພ, ມີ ສະຫາຍ ວັນລາຕີ ຄໍາວານວົງສາ ວ່າການຫົວໜ້າບັນນາທິການວາລະສານອະລຸນໃໝ່, ມີບັນດາຫົວໜ້າກົມ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ການມອບເຄື່ອງຊ່ວຍເຫຼືອໃນຄັ້ງນີ້ປະກອບມີ ຄອມພິວເຕີຈໍານວນ 10 ເຄື່ອງ, ກ້ອງຖ່າຍທໍາວິດີໂອ 2 ເຄື່ອງ ແລະ ກ້ອງຖ່າຍຮູບ 2 ເຄື່ອງ. ນອກຈາກນັ້ນ ທາງວາລະສານກົ້ງສ້ານ ຮ່ວມກັບ ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ ຍັງໄດ້ຊ່ວຍຝຶກອົບຮົມກ່ຽວກັບການສ້າງ-ນໍາໃຊ້ວາລະສານເອເລັກໂຕຣນິກ ໃຫ້ກັບພະນັກງານວາລະສານອະລຸນໃໝ່ອີກດ້ວຍ. ໂຄງການຊ່ວຍເຫຼືອສ້າງວາລະສານອະລຸນໃໝ່ເອເລັກໂຕຣນິກມີມູນຄ່າລວມທັງໝົດ 1.050.000.000 ດົງ (ສະກຸນເງິນຫວຽດນາມ).
ໂຄງການຊ່ວຍເຫຼືອໃນຄັ້ງນີ້ໄດ້ສະແດງໃຫ້ເຫັນເຖິງນໍ້າໃຈໄມຕີຈິດມິດຕະພາບ, ຄວາມເປັນຫ່ວງເປັນໃຍດ້ວຍຄວາມຈິງໃຈທີ່ມີຕໍ່ກັນຖານອ້າຍນ້ອງ, ເພື່ອນມິດຮ່ວມອຸດົມການທີ່ມີມາຍາວນານ. ການຊ່ວຍເຫຼືອສ້າງວາລະສານອະລຸນໃໝ່ເອເລັກໂຕຣນິກແມ່ນຄວາມຈໍາເປັນພາວະວິໄສໃນຍຸກແຫ່ງຂໍ້ມູນຂ່າວສານ ແລະ ການເຊື່ອມໂຍງສາກົນ ແນໃສ່ຕອບສະໜອງຄວາມຮຽກຮ້ອງຕ້ອງຂອງການໜ້າທີ່ການເມືອງໃນໄລຍະໃໝ່ໃຫ້ມີຄວາມວ່ອງໄວ, ກວ້າງຂວາງທົ່ວເຖິງກວ່າເກົ່າ ຕາມທິດຫັນເປັນດີຈີຕອນ ທັງເປັນການປະກອບສ່ວນເພີ່ມທະວີຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ໂດຍສະເພາະແມ່ນການພົວພັນຮ່ວມມືທີ່ເປັນມູນເຊື້ອຍາວນານຂອງສອງວາລະສານໃຫ້ນັບມື້ແໜ້ນແຟ້ນ, ເລິກເຊິ່ງ ແລະ ມີຜົນສໍາເລັດສູງຂຶ້ນ.
ຂ່າວ: ວາລະສານ ອະລຸນໃໝ່, ພາບ: ພັດ ລໍວັນໄຊ
