ສຳນັກຂ່າວຊິນຮວາ ຂອງສປ ຈີນ ວັນທີ28 ມິຖຸນານີ້ ທ່ານ ຫລີ ສຽງ ນາຍົກລັດຖະມົນຕີຈີນ ໄດ້ກ່າວຄຳປາໄສໃນພິທີໄຂເວທີ ປຶກສາຫາລືດາວອສ໌ (Summer Forum Davos) ລະດູຮ້ອນ ປີ 2023 ຄັ້ງທີ 14 ໂດຍໄດ້ສະເໜີຄວາມຄິດເຫັນຊ່ວຍໃຫ້ໂລກຜ່ານຜາຄວາມຫຍຸ້ງຍາກດ້ວຍ 4 ມາດຕະການ ສຳຄັນຄື: ມາດຕະການທີ 1 ແມ່ນຮຽກຮ້ອງໃຫ້ມີການພົວພັນ ແລະ ການແລກປ່ຽນພາຍໃນປະຊາຄົມສາກົນໃຫ້ດີຂຶ້ນ ເນື່ອງຈາກຂາດການສື່ສານທີ່ມີປະສິດທິພາບ ລວມທັງການຂາດຄວາມຮັບຮູ້ລວມ ແລະ ເປັນຮູບປະທຳອາດນໍາໄປສູ່ການມີອະຄະຕິ ແລະ ຕົກໃນທ່າຮັບໄດ້ຢ່າງງ່າຍດາຍ.
ມາດຕະການທີ 2 ແມ່ນເນັ້ນເຖິງຄວາມສາມັກຄີ ແລະ ການຮ່ວມມືກັນ ຫລັງຈາກຜະເຊີນກັບຫລາຍວິກິດລະດັບໂລກ ເພາະໃນຖານະປະຊາຄົມທີ່ມີອະນາຄົດຮ່ວມກັນທຸກປະເທດ ຈະຕ້ອງຮັກສາຜົນປະໂຫຍດຈາກການຮ່ວມມືຍຶດໝັ້ນແນວທາງການຮ່ວມມືແບບໄດ້ປະໂຫຍດທຸກຝ່າຍເຮັດວຽກຮ່ວມກັນ ເພື່ອຮັບມືກັບສິ່ງທ້າທາຍລະດັບໂລກ ແລະ ຊຸກຍູ້ຄວາມກ້າວໜ້າຂອງມະນຸດ. ມາດຕະການທີ 3 ເນັ້ນໃຫ້ທຸກປະເທດຄວນຮັກສາການເປີດກວ້າງ ແລະ ການຮ່ວມມືກັນຫລາຍຂຶ້ນ ຫລັງຈາກເສດຖະກິດຜະເຊີນກັບວິກິດການຕ່າງໆ ຍັງຄົງຮັກສາທິດທາງການພັດທະນາຕໍ່ໄປ ແລະ ມາດຕະການທີ 4 ອັນສຸດທ້າຍນີ້ແມ່ນເນັ້ນໃຫ້ທຸກຝ່າຍຄວນຮັກສາສັນຕິພາບ ແລະ ສະຖຽນລະພາບຫລາຍຂຶ້ນທ່າມວິກິດອັນເກີດຈາກຄວາມຂັດແຍ້ງ ແລະ ຄວາມບໍ່ໝັ້ນຄົງ. ດັ່ງນັ້ນ ຈຶ່ງຂໍໃຫ້ພະຍາຍາມຮັກສາຄວາມເປັນທຳ ແລະ ຄວາມຍຸດຕິທໍາຢ່າງແນນອນເຮັດວຽກໜັກ ເພື່ອແກ້ໄຂສະພາບຄວາມຫຍຸ້ງຍາກ ແລະ ຮ່ວມກັນປົກປັກຮັກສາສະພາບແວດລ້ອມການພັດທະນາທີ່ສະຫງົບ ແລະ ຄວາມໝັ້ນຄົງເປັນກົກ.
ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
