ການເຊົາສູບຢາອາດເປັນເລື່ອງຍາກສຳລັບຜູ້ທີ່ຕິດສູບຢາແລ້ວ, ສະນັ້ນທ່ານຈະເຊົາສູບຢາໄດ້ຕ້ອງມີການຕັດສິນໃຈສູງ, ມີຄວາມອົດທົນແທ້ໆ. ດັ່ງນັ້ນ, ຜູ້ຂຽນຈຶ່ງໄດ້ຊອກຫາມາຝາກ ທ່ານຜູ້ອ່ານເລື່ອງ ແນະນຳວິທີເຊົາສູບຢາ ແລະ ເຊົາສູບຢາໄຟຟ້າ ມີດັ່ງນີ້:
ຂໍ້ມູນຈາກ ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໃຫ້ຮູ້ວ່າ: ການເຊົາສູບຢາ ແລະ ເຊົາສູບຢາໄຟຟ້າ ແມ່ນຕ້ອງປະຕິບັດຄື: ຫາທີ່ປຶກສາທີ່ດີເຊັ່ນ: ພະຍາຍາມຂໍຄໍາປຶກສາຄົນທີ່ເຊົາສູບຢາຢ່າງຖາວອນ ຫຼື ຂໍຄຳແນະນຳໄດ້ທີ່ໂຮງໝໍກ່ຽວຂ້ອງ; ຫາກຳລັງໃຈບອກຄົນໃກ້ຊິດຮູ້ເຖິງຄວາມຕັ້ງໃຈເຊົາສູບຢາ ເພື່ອເປັນກຳລັງໃຈໃຫ້ຕົນເອງ; ຫາເປົ້າໝາຍວາງແຜນ ແລະ ກຳນົດມື້ລົງມືເຊົາສູບອາດເລືອກມື້ສຳຄັນແຕ່ບໍ່ຄວນກຳນົດມື້ທີ່ຫ່າງໄກກັນເກີນໄປ; ບໍ່ລໍຖ້າຄວນກຽມໂຕໃຫ້ພ້ອມ ລວມເຖິງອຸປະສັກທີ່ກ່ຽວຂ້ອງກັບຢາສູບທັນທີ, ພ້ອມປ່ຽນກິດຈະກຳທີ່ມັກເຮັດຮ່ວມກັບຄົນສູບຢາ; ບໍ່ຫວັ່ນໄຫວ ເມື່ອເຖິງມື້ລົງມືຄວນຕື່ນນອນ ດ້ວຍຄວາມສົດຊື່ນຄິດເຖິງເຫດຜົນທີ່ເຮັດໃຫ້ຕັດສິນໃຈເຊົາສູບຢາ; ບໍ່ກະຕຸ້ນລະຫວ່າງການເຊົາສູບຢາ, ຫຼີກລ່ຽງກິດຈະກໍາທີ່ຈະເຮັດໃຫ້ຢາກສູບຢາ ເຊັ່ນ: ງົດດື່ມກາເຟ ແລະ ງົດດື່ມແອວກໍຮໍ; ບໍ່ໝົກໝຸ້ນເມື່ອຮູ້ສຶກຄຽດຢາກສູບຢາ ໃຫ້ຢຸດພັກຜ່ອນຄາຍຄຽດໂດຍການໂອ້ລົມກັບໝູ່ເພື່ອນ, ຄິດເຖິງຄົນທີ່ເຊົາສູບຢາຢ່າງຖາວອນ; ບໍ່ເມີນເສຍຫາກິດຈະກຳຕ່າງໆເຮັດ ຫຼື ອອກກຳລັງກາຍເພື່ອຊ່ວຍໃຫ້ສະໝອງປອດໂປ່ງ ເພື່ອປະສິດທິພາບຂອງຫົວໃຈ ແລະປອດ; ບໍ່ທ້າທາຍຢ່າຄິດວ່າການກັບມາສູບເປັນບາງຄັ້ງຄາວອາດບໍ່ເປັນຫຍັງເພາະສູບຢາພຽງກອກດຽວ ອາດໝາຍເຖິງການຫວນກັບຄືນມາສູ່ການສູບອີກຄັ້ງຕໍ່ໄປ; ບໍ່ທໍ້ແທ້ຖ້າຫັນກັບໄປສູບບໍ່ໄດ້ໝາຍເຖິງເຈົ້າລົ້ມເຫຼວຢ່າງນ້ອຍເຈົ້າກະຮູ້ຈຸດອ່ອນທີ່ຈະປັບປຸງການຕັ້ງໃຈເຊົາສູບຢາຄັ້ງຕໍ່ໄປ ແລະ ໃຫ້ບອກຕົນເອງວ່າສູ້ສູ້ໆ.
ເຊື່ອແນວ່າທີ່ກ່າວມານັ້ນຈະເປັນປະໂຫຍດໃຫ້ແກ່ທ່ານຜູ້ອ່ານ ຫຼື ຜູ້ທີ່ຄິດຢາກເຊົາສູບຢາບໍ່ຫຼາຍກໍໜ້ອຍ ແລະ ຖ້າທ່ານປະຕິບັດໄດ້ສິ່ງທີ່ກ່າວມານັ້ນຍັງຈະເຮັດໃຫ້ທ່ານສາມາດເຊົາສູບຢາສູບ ແລະ ເຊົາສູບຢາສູບໄຟຟ້າໄດ້ຢ່າງຖາວອນ, ຫຼັງຈາກນັ້ນທ່ານຈະມີສຸຂະພາບທີ່ດີ ແລະ ແຂງແຮງນັ້ນເອງ.
