ຕາມຂ່າວຈາກວິທະຍຸສາກົນຫວຽດນາມ ທ່ານ ຟ້າມ ມິນຈີງ, ນາຍົກລັດຖະມົນຕີ ສສ ຫວຽດນາມ ພວມປະຕິບັດການຢ້ຽມຢາມ ສປ ຈີນ ຢ່າງເປັນທາງການ ແລະ ເຂົ້າຮ່ວມກອງປະຊຸມປະຈຳປີບັນດາຜູ້ນຳໜ້າ ຄັ້ງທີ 14 ຂອງເວທີປາໄສ ເສດຖະກິດໂລກ (WEF) ເພື່ອປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງ ສສ ຫວຽດນາມ-ສປ ຈີນ ໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະ ບັນລຸປະສິດທິຜົນ. ສຳລັບການໄປຢ້ຽມຢາມຖືກດຳເນີນໄປໃນສະພາບ ການພົວພັນຄູ່ຮ່ວມມືຍຸດທະສາດຮອບດ້ານ ສສ ຫວຽດນາມ-ສປ ຈີນ ພວມຮັກສາທ່າອ່ຽງພັດທະນາ ແລະ ບັນລຸຜົນງານ ຕັ້ງໜ້າຫລາຍຢ່າງ. ຄວາມໄວ້ເນື້ອເຊື່ອໃຈດ້ານການເມືອງ ສສ ຫວຽດນາມ-ສປ ຈີນ ໄດ້ຮັບການເພີ່ມທະວີ; ການຮ່ວມມື ດ້ານການຄ້າ, ການລົງທຶນຮັກສາທ່າເຕີບໂຕ.
ສຳລັບກອງປະຊຸມປະຈຳປີບັນດາຜູ້ນຳໜ້າ ຄັ້ງທີ 14 ຂອງເວທີປາໄສ ເສດຖະກິດໂລກ (WEF), ກອງປະຊຸມໂດຍ WEF ສົມທົບກັບ ລັດຖະບານຈີນ ຈັດຂຶ້ນ, ມີຂອບ ຂະໜາດໃຫຍ່ ອັນດັບທີ 2 ຖັດຈາກ ກອງປະຊຸມ ຂອງເວທີ ປາໄສ ຢູ່Davos (ສະວິດ). ຂະນະທີ່ ບັນດາ ປະເທດ, ອົງການ ຈັດຕັ້ງ ແລະ ກຸ່ມບໍລິສັດ ແຖວໜ້າໂລກ ຈະປະກອບສ່ວນ ສະເໜີ ບັນດາ ມາດຕະການ ແກ້ໄຂຢູ່ ລະດັບ ທົ່ວໂລກ, ພາກພື້ນ, ປະເທດຊາດ ແລະ ວິສາຫະກິດ ເນັ້ນ ໜັກເຖິງ ບົດບາດ ຂອງພາກເອກະຊົນ ແລະ ການຮ່ວມມື ພາກ ລັດ- ເອກະຊົນ, ຊຸກຍູ້ບັນດາ ກຳລັງໜູນ ການເຕີບໂຕໃໝ່ຄື: ການພັດ ທະນາ ສີຂຽວ, ການຫັນເປັນ ດີຈີຕອນ, ນະວັດຕະກຳໃໝ່ ຢູ່ພາກພື້ນ ອາຊີ, ພິເສດ ແມ່ນ ສປ ຈີນ, ອິນເດຍ ແລະ ອາຊຽນ, ໃນນັ້ນມີ ສສ ຫວຽດນາມ. ໃນໄລຍະຜ່ານມາ ໄດ້ຕັ້ງໜ້າ ປ່ຽນແປງໃໝ່, ເປີດປະຕູ, ຮັກສາ ທ່າເຕີບໂຕ ໃຫ້ມີ ສະຖຽນ ລະພາບ, ກາຍເປັນ ກຳລັງໜູນ ສຳຄັນ ໃຫ້ແກ່ ການຟື້ນຟູ ແລະ ພັດທະນາ ເສດຖະກິດ ຂອງພາກພື້ນ ແລະ ໃນໂລກ, ພ້ອມທັງ ຮັກສາ ບົດບາດ ເປັນສູນກາງ ເຊື່ອມຕໍ່ ດ້ານການຄ້າ, ການລົງທຶນ, ລະບົບສະໜອງທົ່ວໂລກ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
