ໃນໂອກາດເດີນທາງ ຢ້ຽມຢາມ ແລະ ເຮັດວຽກ ຢູ່ ສປ ຈີນ ໃນລະຫ່ວາງວັນທີ 25 ມິຖຸນາ ຫາວັນທີ 1 ກໍລະ ກົດ 2023, ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ພ້ອມດ້ວຍຄະນະ, ໄດ້ເຂົ້າຢ້ຽມຢາມ ແລະ ພົບປະກັບ ສະຫາຍ ຢິ່ງ ຢົງ ກໍາມະການສູນກາງພັກກອມມູນິດຈີນ, ຫົວໜ້າອົງການໄອຍະການປະຊາຊົນສູງ ສຸດ ແຫ່ງ ສປ ຈີນ ພ້ອມດ້ວຍຄະນະ ທີ່ນະຄອນຫລວງປັກກິ່ງ.
ການພົບປະໃນຄັ້ງນີ້, ສອງຝ່າຍໄດ້ປຶກສາຫາລື ແລກປ່ຽນຄວາມຄິດຄວາມເຫັນ ໃນຫລາຍບັນຫາທີ່ສໍາຄັນ ທີ່ຕ່າງຝ່າຍຕ່າງມີຄວາມສົນໃຈນໍາກັນ, ພ້ອມທັງຕີລາຄາສູງຕໍ່ຜົນສຳເລັດໃນການພົວພັນຮ່ວມມືລະຫວ່າງ ສປປ ລາວ ແລະ ສປ ຈີນ ໂດຍສະເພາະແມ່ນສອງອົງການໄອຍະການປະຊາຊົນສູງສຸດຂອງສອງປະເທດ ໃນໄລຍະຜ່ານມາ ແລະ ໄດ້ເຊັນບົດບັນທຶກຊ່ວຍຈຳ ເພື່ອສືບຕໍ່ພົວພັນຮ່ວມມືກັນ ລະຫວ່າງສອງອົງການໄອຍະການປະຊາຊົນຂອງສອງປະ ເທດ ໃຫ້ນັບມື້ນັບກ້າວສູ່ລວງເລິກ ເຊີ່ງເນຶ້ອໃນບົດບັນທຶກຊ່ວຍຈໍານັ້ນ ທັງສອງຝ່າຍຈະໄດ້ເພີ່ມທະວີການແລກປ່ຽນຢ້ຽມຢາມຄະນະຜູ້ແທນ ເຊິ່ງກັນ ແລະ ກັນ ໂດຍຜັດປ່ຽນກັນເປັນເຈົ້າພາບສອງປີຕໍ່ຄັ້ງ; ສອງຝ່າຍເຫັນດີແລກປ່ຽນຄະນະຜູ້ແທນ ທາງດ້ານວິຊາການ ເພື່ອຖອດຖອນບົດ ຮຽນທີ່ຕົນເອງສົນໃຈໃນດ້ານຕ່າງໆ ກ່ຽວກັບວຽກງານຂອງ ອົງການໄອຍະການປະຊາຊົນສອງຝ່າຍ; ອົງການໄອຍະການປະຊາຊົນ ແຫ່ງ ສປ ຈີນ ເຫັນດີຕ້ອນຮັບພະນັກ ງານໄອຍະການປະຊາຊົນ ສປປ ລາວ ໄປຝຶກອົບຮົມໃນຫົວຂໍ້ຕ່າງໆ ຢູ່ ສປ ຈີນ ປີລະ 15 ທ່ານ ໂດຍມອບໃຫ້ສະຖາບັນຝຶກອົບຮົມວຽກງານໄອຍະການ ຈີນ-ອາຊຽນ ທີ່ນະຄອນນານໜິງ ເຂດປົກຄອງຕົນເອງເຜົ່າຈ້ວາງ ກວາງຊີ ເປັນຜູ້ຈັດຕັ້ງປະຕິບັດ; ສືບຕໍ່ເພີ່ມທະວີການພົວພັນຮ່ວມມື ທາງອາຍາ ຂອງ ອົງການໄອຍະການປະຊາຊົນ 5 ແຂວງ ພາກເໜືອ ສປປ ລາວ ແລະ ອົງການໄອຍະການປະຊາຊົນແຂວງຢຸນນານ ສປ ຈີນ ໃນລະຫ່ວາງເດືອນ ພະຈິກ 2023. ພ້ອມນັ້ນ, ສອງຝ່າຍຍັງເຫັນດີ ແລກປ່ຽນຂໍ້ມູນຂ່າວສານ ແລະ ສະໜອງຂໍ້ມູນກ່ຽວກັບກົດໜາຍ, ນິຕິກໍາ ແລະ ວາລະສານ ທີ່ຕິດພັນກ່ຽວກັບວຽກງານໄອຍະການ ເພື່ອເປັນພື້ນຖານໃຫ້ແກ່ການຮ່ວມມື, ການຄົ້ນຄວ້າ ແລະ ນໍາໃຊ້ເຂົ້າໃນການປະຕິບັດໜ້າທີ່ວິຊາສະເພາະ ໃຫ້ນັບມື້ດີຂຶ້ນຢ່າງບໍ່ຢຸດຢັ້ງ ແລະ ສອງຝ່າຍເຫັນດີມອບໃຫ້ ກົມແຜນການ ແລະ ຮ່ວມ ມືກັບຕ່າງປະເທດ ອົງການໄອຍະການປະຊາຊົນສູງສຸດ ສປປ ລາວ ແລະ ກົມພົວພັນຕ່າງປະເທດ ອົງການໄອຍະການປະຊາຊົນສູງສຸດ ສປ ຈີນ ເປັນໃຈກາງໃນການຈັດຕັ້ງປະຕິບັດ ໃຫ້ເກີດດອກອອກຜົນ.
ໃນການຢ້ຽມຢາມ ແລະ ເຮັດວຽກຢູ່ ສປ ຈີນ ໃນຄັ້ງນີ້, ນອກຈາກພົບປະເຮັດວຽກຮ່ວມກັບອົງການໄອຍະການປະຊາຊົນສູງສຸດແຫ່ງ ສປ ຈີນ ຢ່າງເປັນທາງການ ແລ້ວ, ຄະນະຜູ້ແທນ ອົງການໄອຍະການປະຊາຊົນສູງສຸດແຫ່ງ ສປປ ລາວ ຍັງໄດ້ທ່ຽວຊົມສະຖານທີ່ປະຫວັດສາດ, ອານຸສອນສະຖານອາດີດຜູ້ນຳ ສປ ຈີນ ແລະ ສະຖານທີ່ວັດທະນະທຳທີ່ມີຊື່ສຽງຂອງ ສປ ຈີນ ຈຳນວນໜຶ່ງ.
ຂ່າວ: ວົງເດືອນ
