ພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ຈັດພິທີເປີດບັ້ນສອບເສັງຈົບຊັ້ນມັດທະຍົມສຶກສາຕອນປາຍ (ມ.7) ປະຈຳສົກຮຽນ 2022-2023 ທົ່ວແຂວງ ໃນວັນທີ 20 ມິຖຸນາ 2023 ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍການເປັນປະທານຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ມີທ່ານ ພຸດທອງ ຄຳວິໄລ ຮອງຫົວໜ້າພະແນກບໍລິຫານຄົ້ນຄວ້າສັງລວມ ກົມກວດກາ ກະຊວງສຶກສາທິການ ແລະ ກິລາ ພ້ອມດ້ວຍບັນດາຄູອາຈານ, ຄະນະກຳມະການສອບເສັງ ແລະ ນ້ອງນັກຮຽນທົ່ວແຂວງໄຊສົມບູນເຂົ້າຮ່ວມ.
ໃນພິທີ, ທ່ານ ພຸດລໍາໄພ ທຽມພະສອນ ຮອງຫົວໜ້າພະແນກສຶກສາທິການ ແລະ ກິລາແຂວງ ໄດ້ລາຍງານຫຍໍ້ການກະກຽມຄວາມພ້ອມການສອບເສັງຈົບຊັ້ນມັດທະຍົມສຶກສາຕອນປາຍ (ມ.7) ປະຈຳສົກຮຽນ 2022-2023 ຊຶ່ງທົ່ວແຂວງມີສູນສອບເສັງທັງໝົດ 9 ສູນ, ຫ້ອງສອບເສັງມີ 47 ຫ້ອງ, ນັກສອບເສັງທັງໝົດ 983 ຄົນ, ຍິງ 383 ຄົນ. ການສອບເສັງແມ່ນໄດ້ດຳເນີນແຕ່ວັນທີ 21 ຫາ 23 ມິຖຸນາ 2023 ໂດຍປະກອບມີ 5 ວິຊາສອບເສັງ ຄື: ວິຊາພາສາລາວ-ວັນນະຄະດີ, ວິຊາຄະນິດສາດ, ກຸ່ມວິຊາວິທະຍາສາດທໍາມະຊາດ, ກຸ່ມວິຊາວິທະຍາສາດສັງຄົມ ແລະ ວິຊາພາສາອັງກິດ.
ພ້ອມດຽວກັນນີ້, ທ່ານ ລີປາວ ໄຊຍະຊ້າງ ຮອງຫົວໜ້າພະແນກສຶກສາທິການ ແລະ ກິລາ ແຂວງ ໄດ້ຜ່ານກົດລະບຽບຂອງການສອບເສັງ ເປັນຕົ້ນແມ່ນ ສິດ, ໜ້າທີ່ ແລະ ຂໍ້ຫ້າມຕ່າງໆຂອງຄະນະກຳມະການສອບເສັງ ແລະ ນັກສອບເສັງ ເພື່ອໃຫ້ບັນດາຄູອາຈານ ແລະ ນ້ອງນັກຮຽນໄດ້ຮັບຮູ້, ເຂົ້າໃຈ ແລະ ພ້ອມກັນເອົາໃຈໃສ່ຈັດຕັ້ງປະຕິບັດໃຫ້ໄດ້ຮັບຜົນດີ.
ໂອກາດດັ່ງກ່າວ, ທ່ານ ຕົ່ງມົວ ຊົວໂກ້ ໄດ້ເນັ້ນໜັກໃຫ້ຄະນະກໍາມະການສອບເສັງທຸກພາກສ່ວນ ຈົ່ງຍົກສູງສະຕິຄວາມຮັບຜິດຊອບຕໍ່ການຈັດຕັ້ງປະຕິບັດໜ້າທີ່ຂອງຕົນ, ການປະຕິບັດລະບຽບຂອງການສອບເສັງ ໂດຍຕ້ອງມີຄວາມຊື່ສັດບໍລິສຸດ, ໂປ່ງໃສ ແລະ ຍຸຕິທຳ ພ້ອມທັງຕັດສິນຜົນການສອບເສັງບົນພື້ນຖານຄວາມຖືກຕ້ອງຂອງລະບຽບຫຼັກການ ເພື່ອຫຼີກລ້ຽງທຸກຫາງສຽງທີ່ຈະເກີດຂຶ້ນໃນສັງຄົມ. ພ້ອມກັນນີ້, ຍັງຮຽກຮ້ອງໃຫ້ນ້ອງນັກຮຽນທຸກຄົນ ຈົ່ງເອົາໃຈໃສ່ປະຕິບັດລະບຽບ ຫຼັກການຂອງການສອບເສັງ, ຕ້ອງນໍາໃຊ້ຄວາມຮູ້ຄວາມສາມາດຂອງຕົນເຂົ້າໃນການຕອບທຸກຂໍ້ສອບ ເພື່ອຮັບປະກັນໃຫ້ຜົນການສອບເສັງ ໄດ້ມາຈາກຄວາມຮູ້ ແລະ ຄວາມສາມາດຂອງຕົນຢ່າງແທ້ຈິງ.
ໂດຍ: ສີລິພອນ ສົງຄຳ
