ບັນດາສະມາຊິກສະພາແຫ່ງຊາດ (ສສຊ ) ຈາກເຂດເລືອກຕັ້ງຕ່າງໆ ສຸມໃສ່ປະກອບຄຳເຫັນຕໍ່ບົດລາາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ເພື່ອໃຫ້ມີເນື້ອໃນຄົບຖ້ວນ ຂຶ້ນໃນວັນທີ 26 ມິຖຸນານີ້ ທີ່ສະພາແຫ່ງຊາດ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານນາງ ອໍາໄພວອນ ລ້ອມບຸນແພງ ສສຊ ເຂດເລືອກຕັ້ງທີ 8 ແຂວງຫົວພັນ ປະກອບຄໍາເຫັນຕໍ່ບົດລາຍງານຂອງລັດຖະບານກ່ຽວກັບການອະນຸມັດການຈັດສັນການລົງທຶນຂອງລັດປີ 2023 ນີ້ເຫັນວ່າມີຄວາມຊັກຊ້າຫຼາຍ, ເຮັດໃຫ້ການຈັດຕັ້ງປະຕິບັດໂຄງການມີຄວາມຊັກຊ້າ ບາງໂຄງການບໍ່ທັນກັບການຜະລິດ ບໍ່ສາມາດຈັດຕັ້ງປະຕິບັດໄດ້, ດັ່ງນັ້ນຈຶ່ງສະເໜີໃຫ້ລັດຖະ ບານເລັ່ງປັບປຸງກົນໄກໃຫ້ຄ່ອງຕົວ ໂດຍສະເພາະຜັນຂະຫຍາຍຈັດຕັ້ງປະຕິບັດຜົນສຳເລັດການສຳມະນາ ກອງປະຊຸມວິທະຍາ ສາດຮ່ວມກັນລະຫວ່າງລັດຖະບານກັບອົງການປົກຄອງທ້ອງຖິ່ນ ກໍຄືພາກສ່ວນກ່ຽວຂ້ອງໃຫ້ປະກົດຜົນເປັນຈິງ. ເພາະວ່າຄຳຄິດຄຳເຫັນມີຫຼາຍອັນເປັນບັນຫາທີ່ດີ ເປັນຕົ້ນອັນທີ 1 : ຢາກໃຫ້ຄົ້ນຄວ້າການຈັດສັນໂຄງການ, ປັດຈຸບັນເຫັນວ່າມີຫຼາຍຮ່ວງ ເຮັດໃຫ້ການຈັດສັນງົບປະມານໃສ່ແຕ່ລະຮ່ວງພົບຄວາມຫຍຸ້ງຍາກ ເປັນຕົ້ນຮ່ວງປົກກະຕິ, ຮ່ວງຟື້ນຟູໄພພິບັດ, ຮ່ວງພັດທະນາຊົນນະບົດ ແລະ ຮ່ວງອື່ນໆ ເຫັນວ່າການມີຫຼາຍຮ່ວງແມ່ນພົບຄວາມຫຍຸ້ງຍາກສະເໜີໃຫ້ເບິ່ງຄືນ.
ທ່ານ ບຸນທາມ ພຸດທະວົງສາ ສສຊ ເຂດເລືອກຕັ້ງທີ 1 ນະຄອນຫຼວງວຽງຈັນ ປະກອບຄຳເຫັນໃນຂົງເຂດວຽກງານເສດຖະກິດ ໂດຍສະເໜີໃຫ້ລັດຖະບານເອົາໃຈໃສ່ແກ້ໄຂບັນຫາດ້ານເສດຖະກິດຢ່າງຮີບດ່ວນ ແລະ ເອົາໃຈໃສ່ຊຸກຍູ້ສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ ການເຂົ້າຫາແຫຼ່ງທຶນເພື່ອທຳການຜະລິດ ຊຶ່ງເຫັນວ່າຍັງມີຄວາມຫຍຸ້ງຍາກໃນການເຂົ້າເຖິງແຫຼ່ງທຶນ. ຜ່ານມາເຫັນວ່າລັດຖະບານໄດ້ມີຄວາມພະຍາຍາມສູງໃນການເຂົ້າເຖິງແຫຼ່ງທຶນ ແຕ່ຍັງບໍ່ສາມາດແກ້ໄຂຢ່າງເປັນຮູບປະທຳ ຖ້າຈະປະຕິບັດຕາມເງື່ອນໄຂການເຂົ້າເຖິງແຫຼ່ງທຶນຂອງບັນດາທະນາຄານທີ່ເປັນຜູ້ຮ່ວມທຶນກັບກະຊວງອຸດສາຫະກຳ ແລະ ການຄ້າ ເຫັນວ່າບັນດາຫົວໜ່ວຍດັ່ງກ່າວແມ່ນພົບຄວາມຫຍຸ້ງຍາກ, ຖ້າຈະສົ່ງເສີມການຜະລິດໃຫ້ເພີ່ມຂຶ້ນ ຄຽງຄູ່ກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນນັ້ນ. ລັດຖະບານຕ້ອງມີມາດຕະການ ມີເງື່ອນໄຂອຳນວຍໃຫ້ການເຂົ້າເຖິງແຫຼ່ງທຶນຢ່າງເໝາະສົມ ເພື່ອຜ່ອນຜັນໃຫ້ບັນດາຈຸນລະວິສາຫະກິດ, ວິສາຫະກິດຂະໜາດນ້ອຍ-ຂະໜາດກາງ ສາມາດເຂົ້າເຖິງແຫຼ່ງທຶນໄດ້ຢ່າງທົ່ວເຖິງ ສະດວກຂຶ້ນຈຶ່ງຈະຊ່ວຍສົ່ງເສີມການຜະລິດພາຍໃນໃຫ້ຂັບເຄື່ອນດີຍິ່ງຂຶ້ນ.
ຂ່າວ: ພູວັນ
