ຣັດເຊຍ ຈະລົງທຶນເຂົ້າໃນການຜະລິດເຮືອບິນມູນຄ່າ 500 ລ້ານໂດລາ

ສຳນັກຂ່າວສານຫວຽດນາມ, ທ່ານ ມິຄາອິລ ມິຊູສຕິນ ນາຍົກລັດຖະມົນຕີຣັດເຊຍ ກ່າວໃນລະຫວ່າງຢ້ຽມຢາມໂຮງງານຜະລິດ ເຮືອບິນ ເມື່ອອາທິດ ຜ່ານມາວ່າ: ປະເທດນີ້ ຈະລົງທຶນ ບ້ວງເງິນເກືອບ 42 ຕື້ຣຸບ (500 ລ້ານໂດລາ ສະຫະລັດ) ເພື່ອປັບປຸງ ເປີດກວ້າງ ໃນຂົງເຂດ ການຜະລິດເຮືອບິນ ຕູໂປແລບ ຕູ-214 ( Tupolev Tu-214) ເພື່ອໃຫ້ບໍລິການ ຜູ້ໂດຍສານ ພາຍໃນ ປະເທດ ເພື່ອທົດແທນ ເຮືອບິນຂອງຕາເວັນຕົກ ເປັນຕົ້ນ: ແອຣບັສ, ໂບອີງ ແລະ ອື່ນໆ. Tu-214 ເປັນເຮືອບິນ ສອງເຄື່ອງຈັກ, ລຳໂຕແຄບ ແບບທັນສະໄໝ ດ້ວຍໄລຍະທາງບິນ 6,500 ກິໂລແມັດ ແລະ ບັນທຸກ ຜູ້ໂດຍສານໄດ້ 210 ຄົນ. ເຮືອບິນ ລຳດັ່ງກ່າວ ໄດ້ເປີດໂຕ ໃນປີ 1996 ເພື່ອທົດແທນTu-154, ຊຶ່ງເປັນ ເຮືອບິນ ທີ່ຖືກນຳໃຊ້ ຫລາຍທີ່ສຸດ ໃນອະດິດ ສະຫະພາບ ໂຊຫວຽດ ແລະ ຣັດເຊຍ ໃນຊຸມປີ 1960 ຈົນເຖິງ ໃນໄລຍະປີ 2000 ຜ່ານມາ./.