ເມື່ອບໍ່ດົນມານີ້, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ຕ້ອນຮັບການເຂົ້າ ຢ້ຽມຂໍ່ານັບຂອງ ທ່ານ ປີເຕີ ເຮມອນ ເອກອັກຄະລັດຖະທູດ ແຫ່ງ ສະຫະລັດອາເມລິກາ ປະຈຳ ສປປ ລາວ ພ້ອມດ້ວຍຄະນະ ໃນໂອກາດທີ່ ທ່ານ ສັນຕິພາບ ພົມວິຫານ ມາຮັບໜ້າທີ່ໃໝ່ ເປັນລັດຖະມົນຕີກະຊວງການເງິນ.
ໂອກາດນີ້, ທ່ານ ປີເຕີ ເຮມອນ ໄດ້ສະແດງຄວາມຍິນດີຕໍ່ການຮັບຕຳແໜ່ງໃໝ່ ຂອງ ທ່ານ ສັນຕິພາບ ພົມວິຫານ ແລະ ສະແດງເຈດຈຳນົງໃນການສືບຕໍ່ການຮ່ວມມືທີ່ແໜ້ນແຟ້ນ ລະຫວ່າງ ສປປ ລາວ ແລະ ສະຫະລັດ ອາເມລິກາ, ພ້ອມທັງລາຍງານກ່ຽວກັບ ໂຄງການຊ່ວຍເຫລືອ ສປປ ລາວ ໃນໄລຍະຜ່ານມາ ໂດຍສະເພາະວຽກງານ ຕ້ານຢາເສບຕິບ ແລະ ການບັງຄັບໃຊ້ກົດໝາຍສາກົນ (INL). ໃນເວລາອັນໃກ້ນີ້ ທ່ານກໍາລັງຈະສິ້ນສຸດການປະຈໍາ ການ ໃນຖານະເອກອັກຄະລັດຖະທູດ ສະຫະລັດອາເມລິກາ ປະຈໍາ ສປປ ລາວ.
ໂອກາດນີ້, ທ່ານ ສັນຕິພາບ ພົມວິຫານ ໄດ້ສະແດງຄວາມຂອບໃຈຕໍ່ການຊ່ວຍເຫລືອຂອງ ສ ອາເມລິກາ ແກ່ ສປປ ລາວ ຕະຫລອດມາ ແລະ ເຊື່ອໝັ້ນວ່າ ການຮ່ວມມືລະຫວ່າງພາກສ່ວນກ່ຽວຂ້ອງຂອງ ສປປ ລາວ ແລະ ສ ອາເມລິກາ ໃນໄລຍະຜ່ານມາແມ່ນມີຫລາຍໝາກຜົນສຳເລັດ ເຊິ່ງ ສ ອາເມລິກາ ກໍແມ່ນອີກໜຶ່ງປະເທດ ທີ່ໄດ້ ປະກອບສ່ວນ ແລະ ມີບົດບາດໂດດເດັ່ນ ໃນການສະໜັບສະໜູນດ້ານຕ່າງໆ ໃຫ້ແກ່ ສປປ ລາວ ແລະ ໝັ້ນໃຈວ່າ ຖ້າຫາກພວກເຮົາ ສືບຕໍ່ການຮ່ວມມືຢ່າງແໜ້ນແຟ້ນ ຈະສາມາດຜ່ານຜ່າບັນດາອຸປະສັກ ແລະ ປະກອບສ່ວນເຂົ້າ ໃນການສ້າງສາພັດທະນາ ສປປ ລາວ. ພ້ອມນີ້, ທ່ານກໍໄດ້ສະແດງຄວາມຊົມເຊີຍ ຕໍ່ຜົນງານດ້ານຕ່າງໆ ທີ່ທ່ານ ເອກອັກຄະລັດຖະທູດ ໄດ້ປະກອບສ່ວນຊ່ວຍເຫລືອ ສປປ ລາວ ເຊິ່ງໃນໄລຍະຜ່ານມາ, ສ ອາເມລິກາ ກໍໄດ້ ໃຫ້ການສະໜັບສະໜູນກະຊວງການເງິນ ໂດຍສະເພາະ ແມ່ນກົມພາສີ ໃນຂົງເຂດການບັງຄັບໃຊ້ກົດໝາຍດ້ານພາສີ ທີ່ໄດ້ຮັບການຊ່ວຍເຫລືອພາຍໃຕ້ ສັນຍາຮ່ວມມືຂອງລັດຖະບານ ລາວ ແລະ ສ ອາເມລິກາ ດ້ານການບັງຄັບ ໃຊ້ ກົດໝາຍ ໂດຍນໍາໃຊ້ທຶນຂອງສໍານັກງານຕ້ານຢາເສບຕິດ ແລະ ການບັງໃຊ້ກົດໝາຍສາກົນ. ນອກນີ້, ໄດ້ຮ່ວມມືກັບ ກົມສ່ວຍສາອາກອນ ເພື່ອປະຕິບັດກະກຽມການເຈລະຈາສັນຍາ ລະຫວ່າງ ລັດຖະບານລາວ ກັບ ສ ອາເມລິກາ ແລະ ການຈັດຕັ້ງປະຕິບັດກົດໝາຍວ່າດ້ວຍອາກອນ ຕໍ່ກັບບັນຊີຕ່າງປະເທດ.
ໂອກາດນີ້, ທ່ານລັດຖະມົນຕີກະຊວງການເງິນ ຍັງໄດ້ອວຍພອນໃຫ້ ທ່ານ ປິເຕີ ເຮມອນ ຈົ່ງປະສົບຜົນ ສໍາເລັດ ໃນໜ້າທີ່ອັນໃໝ່ ພາຍຫລັງສໍາເລັດໜ້າທີ່ ການເປັນເອກອັກຄະລັດຖະທູດ ແຫ່ງ ສ ອາເມລິກາ ປະຈໍາ ສປປ ລາວ ແລະ ຫວັງຢ່າງຍິ່ງວ່າ ສອງປະເທດ ສປປ ລາວ ແລະ ສ ອາເມລິກາ ຈະມີການຮ່ວມມື, ຊ່ວຍເຫລືອ ເຊິ່ງກັນ ແລະ ກັນ ຕະຫລອດໄປ.
ຂ່າວ-ພາບ: ກະຊວງການເງິນ
