ຂ່າວຕ່າງປະເທດລາຍງານ ໃນວັນທີ 18 ມິຖຸນາ ຜ່ານມາ, ທ່ານ ຈາຍານ ກຸມານ ຫົວໜ້າເຈົ້າໜ້າທີ່ການແພດຂອງເຂດບັນເລ ໃນລັດອຸດຕຣາປະເທດ ກ່າວວ່າ: ມີລາຍງານຜູ້ເສຍຊີວິດໃນເຂດບັນເລປະມານ 34 ຄົນ ໃນໄລຍະທ້າຍອາທິດຜ່ານມາ ໂດຍທຸກຄົນເປັນຜູ້ທີ່ມີອາຍຸຫຼາຍກວ່າ 60 ປີ ແລະ ມີພະຍາດທີ່ເປັນມາກ່ອນ ຊຶ່ງອາດຈະເກີດຂຶ້ນອີກຈາກຄວາມຮ້ອນທີ່ຮຸນແຮງ.
ທ່ານ ຈາຍານ ກຸມານ ກ່າວວ່າ: ທຸກຄົນກຳລັງທໍລະມານຈາກໂຣກໄພ ແລະ ອາການຂອງພວກເຂົາຮ້າຍແຮງລົງເພາະອາກາດຮ້ອນໜັກ ໂດຍຜູ້ເສຍຊີວິດສ່ວນໃຫຍ່ເປັນພະຍາດຫົວໃຈວາຍ, ພະຍາດຫຼອດເລືອດສະໝອງ ແລະ ພະຍາດຖອກທ້ອງ. ທັງນີ້, ໂດຍອີງຕາມຂໍ້ມູນຈາກສຳນັກງານອຸຕຸນິຍົມວິທະຍາແຫ່ງຊາດຂອງອິນເດຍ (IMD) ໄດ້ເປີດເຜີຍໃຫ້ຮູ້ວ່າ: ເຂດບັນເລມີລາຍງານອຸນຫະພູມສູງທີ່ສຸດຢູ່ທີ່ 42,2 ອົງສາ ຊຶ່ງສູງກວ່າລະດັບປົກກະຕິເຖິງ 4,7 ອົງສາ ເມື່ອທ້າຍອາທິດຜ່ານມາ. ນອກຈາກນີ້, ລະດູຮ້ອນທີ່ເຜົາໄໝ້ຍັງເຮັດໃຫ້ເກີດບັນຫາໄຟຟ້າດັບທົ່ວລັດ ສົ່ງຜົນໃຫ້ປະຊາຊົນບໍ່ສາມາດເປີດພັດລົມ ຫຼື ເຄື່ອງປັບອາກາດ ຕະຫຼອດຈົນຮອດບໍ່ມີນ້ຳປະປາໃຊ້ດ້ວຍ. ຂະນະທີ່ ທ່ານ ໂຢຄີ ອາທິດຍະນາດ ສະມາຊິກສະພາ ລັດອຸດຕຣາປະເທດ ໃຫ້ຄວາມໝັ້ນໃຈກັບປະຊາຊົນວ່າ: ລັດຖະບານກຳລັງດຳເນີນມາດຕະການທຸກຢ່າງທີ່ຈຳເປັນ ເພື່ອເຮັດໃຫ້ແນ່ໃຈວ່າ ຈະສາມາດຈ່າຍໄຟໄດ້ຢ່າງຕໍ່ເນື່ອງ ພ້ອມທັງຮຽກຮ້ອງໃຫ້ປະຊາຊົນຮ່ວມມືກັບລັດຖະບານ ແລະ ໃຊ້ໄຟຟ້າຢ່າງເໝາະສົມ.
ທ່ານ ໂຢຄີ ອາທິດຍະນາດ ກ່າວຕື່ມວ່າ: ທຸກໝູ່ບ້ານ ແລະ ທຸກເມືອງ ຄວນໄດ້ຮັບໄຟຟ້າຢ່າງພຽງພໍໃນໄລຍະທີ່ມີອາກາດຮ້ອນອົບເອົ້າ ຊຶ່ງຖ້າຫາກເກີດຂໍ້ຜິດພາດໃດໆກໍຄວນໄດ້ຮັບການແກ້ໄຂໂດຍທັນທີ. ອີກຢ່າງໜຶ່ງ, ພື້ນທີ່ສ່ວນໃຫຍ່ຂອງອິນເດຍມີອາກາດຮ້ອນໃນໄລຍະເດືອນເມສາ – ມິຖຸນາ ກ່ອນທີ່ລະດູຝົນຈະເຮັດໃຫ້ອຸນຫະພູມເຢັນລົງ ເຖິງຢ່າງໃດກໍຕາມ, ອຸນຫະພູມໃນອິນເດຍກັບເພີ່ມສູງຂຶ້ນໃນໄລຍະ 10 ປີຜ່ານມາ.
