ແຂວງສະຫວັນນະເຂດ ຈັດສອບເສັງຈົບຊັ້ນມັດທະຍົມສຶກສາຕອນຕົ້ນ (ມ.4) ປະຈຳສົກຮຽນ 2022-2023 ທົ່ວແຂວງ ຢ່າງເປັນທາງການ ໃນວັນທີ 14 ມິຖຸນາ ຜ່ານມາ ທີ່ສະໂມສອນໂຮງຮຽນ ມ.ປາຍ ດົງເຫັນ ເມືອງອາດສະພັງທອງ, ພາຍໃຕ້ການເປັນປະທານຂອງທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ມີຄະນະພະແນກສຶກສາທິການ ແລະ ກິລາແຂວງ, ການນຳ, ຄະນະຫ້ອງການສຶກສາທິການ ແລະ ກິລາ ເມືອງ 14 ເມືອງ 1 ນະຄອນ, ຄະນະອະນຸກຳມະການພ້ອມດ້ວຍນັກສອບເສັງເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາແຂວງໄດ້ກ່າວລາຍງານຄວາມພ້ອມຂອງການກະກຽມການສອບເສັງຈົບ ມ.4 ສົກຮຽນ 2022-2023 ທົ່ວແຂວງສະຫວັນນະເຂດ. ໃນນັ້ນ, ໄດ້ເອົາໃຈໃສ່ບັນດາໜ້າວຽກຕ່າງໆ ເພື່ອໃຫ້ທັນກັບເວລາ ເປັນຕົ້ນແມ່ນການຮ່າງເອກະສານຂໍ້ຕົກລົງແຕ່ງຕັ້ງປະທານການສອບເສັງ, ຄະນະຮັບຜິດຊອບການສອບເສັງ,ກຳມະການຍາມຫ້ອງສອບ, ກຳມະການກວດບົດ, ຂຶ້ນແຜນອຸປະກອນຮັບໃຊ້ການສອບເສັງ, ແຜນງົບປະມານຮັບໃຊ້ ແລະ ວຽກອື່ນໆທີ່ປິ່ນອ້ອມ.
ໂອກາດດຽວກັນ, ທ່ານ ນາງ ຫຼິງທອງ ແສງຕາວັນ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບການສອບເສັງທຸກຂັ້ນ, ທີ່ໄດ້ພ້ອມກັນເອົາໃຈໃສ່ຫ້າງຫາກະກຽມຄວາມພ້ອມດ້ານຕ່າງໆ ເຮັດໃຫ້ບັ້ນສອບເສັງຄັ້ງນີ້ທັນຕາມກຳນົດເວລາ. ພ້ອມດຽວກັນນີ້, ທ່ານຍັງໄດ້ຮຽກຮ້ອງຄະນະຮັບຜິດຊອບຈົ່ງເຮັດໜ້າທີ່ຕາມພາລະບົດບາດ, ສ່ວນກຳມະການຍາມຫ້ອງສອບກໍຕ້ອງສັດຊື່ ທ່ຽງທຳ, ສຳລັບນັກສອບກໍໃຫ້ປະຕິບັດລະບຽບການສອບເສັງເຂັ້ມງວດ. ຫຼັງຈາກນັ້ນ, ພາຍຫຼັງສຳເລັດການສອບເສັງ ຄະນະຮັບຜິດຊອບຕ້ອງມີການສະຫຼຸບຖອດຖອນບົດຮຽນນຳກັນ ເພື່ອເປັນບົດຮຽນໃຫ່ແກ່ການສອບເສັງໃນສົກຕໍໍ່ໄປ.
ສົກຮຽນ 2022-2023, ທົ່ວແຂວງສະຫວັນນະເຂດ ມີນັກສອບເສັງຈົບຊັ້ນມັດທະຍົມຕອນຕົ້ນ (ມ.4) ທັງໝົດ 7.977 ຄົນ, ຍິງ 4.151 ຄົນ, ແບ່ງອອກເປັນ 42 ສູນ ລວມທັງສາຍພະສົງ. ໃນນັ້ນ, ສອບເສັງໃນ 6 ວິຊາ ຄື: ວິຊາພາສາລາວ-ວັນນະຄະດີ, ຄະນິດສາດ, ວິທະຍາສາດທໍາມະຊາດ,ວິທະຍາສາດສັງຄົມ, ສຶກສາພົນລະເມືອງ ແລະ ພາສາອັງກິດ. ການສອບເສັງໄດ້ດຳເນີນເປັນເວລາ 3 ວັນ ໃນລະຫວ່າງວັນທີ 14-16 ມິຖຸນາ 2023 ຈຶ່ງສໍາເລັດ.
ໂດຍ ຄໍາແພງເພັດ
