ວັນທີ 20 ມິຖຸນາ 2023 ທີ່ຫ້ອງປະຊຸມສະພາປະຊາຊົນ ແຂວງອັດຕະປື ໄດ້ຈັດກອງປະຊຸມສ້າງຄວາມເຂັ້ມແຂງໃຫ້ຄະນະກໍາມະທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂັ້ນແຂວງອັດຕະປື ໃຫ້ກຽດເຂົ້າຮ່ວມເປັນປະທານຂອງທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານຄະນະກໍາມະທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂັ້ນແຂວງ, ມີທ່ານ ນາງ ມະນີວອນ ຫຼວງສົມບັດ ຫົວໜ້າຫ້ອງການ ຄະນະກໍາມະທິການແຫ່ງຊາດ ເພື່ອຄວາມກ້າວໜ້າແມ່ຍິງ, ແມ່ ແລະ ເດັກ ພ້ອມດ້ວຍຄະນະກໍາມະທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂັ້ນແຂວງເຂົ້າຮ່ວມ.
ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ທັງເປັນປະທານຄະນະກໍາມະທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂັ້ນແຂວງ ກ່າວວ່າ: ໄລຍະຜ່ານມາກໍ່ຄືໃນປັດຈຸບັນຍາມໃດອົງການປົກຄອງແຂວງກໍ່ໄດ້ເອົາໃຈໃສ່ ແລະ ຖືເປັນສຳຄັນຕໍ່ການປະຕິບັດສິດສະເໝີພາບຍິງ-ຊາຍ, ການປົກປ້ອງ ແລະ ພັດທະນາເດັກ ສະແດງອອກໄດ້ມີກົນໄກການຈັດຕັ້ງປະຕິບັດບັນດາກົດໝາຍ, ນິຕິກຳ, ແຜນຍຸດທະສາດ ແລະ ແຜນດໍາເນີນງານຕ່າງໆ ເພື່ອຮັບປະກັນໃຫ້ເດັກໄດ້ມີຊີວິດຢູ່ລອດ, ໄດ້ຮັບການພັດທະນາການປົກປ້ອງ ແລະ ມີສ່ວນຮ່ວມໃນດ້ານຕ່າງໆ ເພື່ອປະກອບສ່ວນເຂົ້າໃນການແກ້ໄຂບັນຫາຕ່າງໆ ທີ່ສົ່ງຜົນກະທົບຕໍ່ເດັກ, ສົ່ງເສີມທັກສະຊີວິດທີ່ສໍາຄັນໃຫ້ແກ່ເດັກ ແລະ ໄວໜຸ່ມ ເພື່ອຊ່ວຍໃຫ້ເຂົາເຈົ້າຮຽນຮູ້ການໃຊ້ຊີວິດ ຮັບຮູ້ກ່ຽວກັບສິດທິຄວາມສະເໝີພາບທາງເພດ, ວິທີການຮັກສາສຸຂະພາບ, ທັກສະການເປັນຜູ້ນຳ ແລະ ທັກສະຊີວິດສຳຄັນຕ່າງໆ ເພື່ອເປັນການສ້າງໂອກາດໃຫ້ເດັກ, ສ້າງຊັບພະຍາກອນມະນຸດທີ່ມີຄຸນນະພາບໃນອະນາຄົດ .
ໂອກາດດຽວກັນນີ້ ຜູ້ເຂົ້າຮ່ວມກອງປະຊຸມ ໄດ້ຮັບຟັງເອກະສານສໍາຄັນ ເປັນຕົ້ນບັນດາສົນທິສັນຍາ, ອານຸສັນຍາສາກົນ, ກົດໝາຍ ແລະ ນິຕິກຳຕ່າງໆ ທີ່ພົວພັນເຖິງສິດຜົນປະໂຫຍດຂອງແມ່ຍິງເດັກນ້ອຍ ພ້ອມນັ້ນຜູ້ແທນກອງປະຊຸມຍັງໄດ້ຄົ້ນຄວ້າແລກປ່ຽນແນວຄິດປະສົບການ ແລະ ຖອດຖອນບົດຮຽນກ່ຽວກັບການປະຕິບັດສິດສະເໝີພາບຍິງ-ຊາຍ, ການຕ້ານການໃຊ້ຄວາມຮຸນແຮງ ແລະ ການພັດທະນາເດັກ ແລະ ສິ່ງທ້າທາຍໃນສະພາບປະຈຸບັນຕໍ່ເດັກ ເພື່ອໃຫ້ຄະນະກຳມາທິການ ເພື່ອຄວາມກ້າວໜ້າຂອງແມ່ຍິງຂັ້ນແຂວງ, ເມືອງ ໄດ້ນຳເອົາບົດຮຽນຄັ້ງນີ້ໄປຊຸກຍູ້ຕິດຕາມການຈັດຕັ້ງປະຕິບັດວຽກງານພັດທະນາແມ່ຍິງ ແລະ ເດັກນ້ອຍ ດ້ວຍຄວາມເປັນເຈົ້າການ ແລະ ສ້າງເງື່ອນໄຂອຳນວຍຄວາມສະດວກໃຫ້ກອງເລຂາໄດ້ສາມາດເຄື່ອນໄຫວຕາມພາລະບົດບາດ ໂດຍສະເພາະການຕິດຕາມຊຸກຍູ້ການຈັດຕັ້ງປະຕິບັດບັນດາຕົວຊີ້ວັດທີ່ຕິດພັນກ່ຽວກັບເດັກ, ການປະຕິບັດຄວາມໝາຍໝັ້ນຂອງແຂວງ ໃນການແກ້ໄຂຄວາມທຸກຍາກຂອງເດັກ, ການປະຕິບັດສິດສະເໝີພາບຍິງ-ຊາຍ, ການຕ້ານສະກັດກັ້ນການໃຊ້ຄວາມຮຸນແຮງ ເພື່ອຮັບປະກັນໃນການຈັດຕັ້ງປະຕິບັດຢ່າງເປັນຮູບປະທຳ.
ໂດຍ: ພະນົມສອນ
