ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ປຣາກ ຈິນ ລັດຖະມົນຕີການຕ່າງປະເທດ ສ ເກົາຫຼີ ໄດ້ສະເໜີສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານ ກັບ ອາຊຽນ ໃນປີ 2024, ໃນການພົບປະກັບ ທ່ານ ເກົາ ຄິມ ຮຸນ ເລຂາທິການໃຫຍ່ ອາຊຽນ ຢູ່ ນະຄອນຫຼວງເຊອຸນ ປະເທດ ສ ເກົາຫຼີ ຊຶ່ງແມ່ນການຢ້ຽມຢາມ ສ ເກົາຫຼີ ເປັນຄັ້ງທຳອິດນັບແຕ່ດຳລົງຕຳແໜ່ງໃນເດືອນມັງກອນ ຜ່ານມາ.
ຂ່າວລະບຸວ່າ: ທ່ານ ປຣາກ ຈິນ ຍົກອອກຂໍ້ສະເໜີສ້າງບາດລ້ຽວໃໝ່ເພື່ອພັດທະນາການພົວພັນສອງຝ່າຍໃນສະພາບການປີ 2024 ເປັນຂີດໝາຍສະເຫຼີມສະຫຼອງ 35 ປີແຫ່ງວັນສ້າງຕັ້ງການພົວພັນຄູ່ຮ່ວມມືເຈລະຈາລະຫວ່າງສອງຝ່າຍ. ສ່ວນທ່ານ ເກົາ ຄິມ ຮຸນ ປາຖະໜາຢາກໃຫ້ການຮ່ວມມືລະຫວ່າງ ອາຊຽນ ແລະ ສ ເກົາຫຼີ ພັດທະນາຫຼາຍຂຶ້ນກວ່າເກົ່າ ແລະ ຮຽກຮ້ອງໃຫ້ມີການຮ່ວມມືຢ່າງແໜ້ນແຟ້ນໃນວິວັດການສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານ.
