ຂ່າວຕ່າງປະເທດລາຍງານ, ອີງຕາມບົດລາຍງານຂອງແອບັສ “Airbus” ຄາດວ່າການເດີນທາງທາງອາກາດໃນອາຊີ ຈະຂະຫຍາຍຕົວໃນໄລຍະ 20 ປີຂ້າງໜ້າ ເຮັດໃຫ້ຄວາມຕ້ອງການຍົນເພີ່ມຂຶ້ນ, ບໍລິສັດ ແອບັສ ຜູ້ຜະລິດຍົນລາຍໃຫຍ່ຂອງປະເທດຝຣັ່ງ ຄາດວ່າບັນດາຜູ້ຜະລິດຍົນຈະສາມາດສົ່ງອອກຍົນລຸ້ນໃໝ່ໄດ້ເຖິງ 40.850 ລຳ ໃນໄລຍະ 20 ປີຂ້າງໜ້າ.
ສຳນັກຂ່າວ Bloomberg ລາຍງານຫວ່າງບໍ່ດົນມານີ້ວ່າ: ສາເຫດຫຼັກເນື່ອງຈາກລູກຄ້າ ໂດຍສະເພາະໃນອາຊີ ຈະຂະຫຍາຍການບິນ ແລະ ປ່ຽນຍົນໃໝ່ເປັນລຸ້ນທີ່ປະຢັດພະລັງງານຫຼາຍຂຶ້ນ. ທັງນີ້, ແອບັສ ລະບຸໃນລາຍງານການຄາດການຕະຫຼາດໂລກ (Global Market Forecast) ວ່າ: ການບິນທົ່ວໂລກຈະເພີ່ມຈຳນວນຂຶ້ນເປັນເທົ່າຕົວພາຍໃນປີ 2042 ໃນລະດັບ 46.560 ລຳ ໂດຍແບ່ງເປັນຍົນລຳໃໝ່ 23.680 ລຳ ແລະ ຍົນທີ່ຈະມາແທນຍົນລຳເກົ່າອີກ 17.170 ລຳ, ນອກຈາກນີ້ 80% ຂອງຍົນທີ່ຖືກສົ່ງອອກ ຈະເປັນຍົນຂະໜາດແຄບ ເຊັ່ນ: ລຸ້ນ A320neo ແລະ ລຸ້ນ 737 Max ຂອງໂບອິ້ງ ແລະ ການຂະຫຍາຍຕົວຈຳນວນຫຼາຍຂຶ້ນຈະມາຈາກປະເທດຈີນ ແລະ ປະເທດອື່ນໆໃນອາຊີ.
ອຸດສາຫະກຳການບິນມີຄວາມຕ້ອງການສູງຂຶ້ນຫຼາຍ ຫຼັງຈາກໄລຍະການແຜ່ລະບາດຂອງໂຄວິດ-19 ໂດຍຈຳນວນຂອງເສັ້ນທາງການບິນພາຍໃນປະເທດ ເດືອນພຶດສະພາ 2023 ສູງກວ່າລະດັບຂອງປີ 2019 ຂະນະທີ່ການເດີນທາງລະຫວ່າງປະເທດກັບມາຢູ່ໃນລະດັບ 89% ຂອງໄລຍະກ່ອນການແຜ່ລະບາດ.
ລາຍງານຍັງລະບຸວ່າ: ການຄາດການຂອງແອບັສ ມີຂຶ້ນໜຶ່ງວັນຫຼັງຈາກ ທີ່ ບໍລິສັດ ອາໂວລອນ ໂຮລດິງ (Avolon Holdings Ltd) ບໍລິສັດເຊົ່າຍົນ ເປີດເຜີຍການຄາດການທີ່ອອກມາໃນທິດທາງດຽວກັນ ຊຶ່ງເປັນການຕອກຢໍ້າຄວາມເຊື່ອໝັ້ນວ່າອຸດສາຫະກຳການບິນ ໄດ້ກັບເຂົ້າສູ່ເສັ້ນທາງການເຕີບໂຕອີກຄັ້ງ. ທັງນີ້ ແອບັສ ລະບຸວ່າ ສະເພາະຈີນປະເທດດຽວ ຈະມີຍົນ 9.440 ລຳ ພາຍໃນປີ 2042 ໂດຍ 85% ຂອງທັງໝົດ ຈະເປັນຍົນລຳແຄບ.
ນອກຈາກນີ້, ຈີນກຳລັງພັດທະນາຍົນລຳແຄບ ແບບມີທາງຍ່າງດຽວ (Single aisle aircraft) ຂອງຕົນເອງ ຫຼື Comac C919 ໂດຍມີຄວາມພະຍາຍາມທີ່ຈະມ້າງການຜູດຂາດຜົນກຳໄລຂອງ 2 ບໍລິສັດຍັກໃຫຍ່ເຊັ່ນ: ແອບັສ ແລະ ໂບອິ້ງ ທີ່ຄອງຕະຫຼາດໂລກໃນປັດຈຸບັນ.
