ສູນວັດທະນະທຳຈີນ ປະຈຳ ສປປ ລາວ ຮ່ວມກັບ ກົມແຜນການ ແລະ ຮ່ວມມືສາກົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ພາກວິຊາພາສາຈີນ ຄະນະອັກສອນສາດ ມະຫາວິທະຍາໄລແຫ່ງຊາດ ຈັດກິດຈະກຳ “ບຸນຕ່ວນຫວູ-ການຫໍ່ເຂົ້າຕົ້ມ” ໃນວັນ 16 ມິຖຸນາ 2023 ເພື່ອຕ້ອນຮັບບຸນຕ່ວນຫວູທີ່ໃກ້ຈະມາເຖິງ ໂດຍມີ ທ່ານ ນາງ ມະນີພັນ ຫລວງສີສົງຄາມ ຮອງຫົວໜ້າກົມ ແຜນການ ແລະ ການຮ່ວມມືສາກົນ ກະຊວງ ຖວທ, ທ່ານ ນາງ ຫລີຢີ່ຜິງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ ພ້ອມດ້ວຍນັກສຶກສາເຂົ້າຮ່ວມ.
ການຈັດງານຄັ້ງນີ້, ກໍເພື່ອເຮັດໃຫ້ຜູ້ເຂົ້າຮ່ວມ ໄດ້ເຂົ້າໃຈເຖິງຄວາມຄ້າຍຄື ແລະ ຄວາມແຕກຕ່າງກັນ ຂອງວັດທະນະທຳອາຫານ ຂອງສອງປະເທດລາວ-ຈີນ, ເຮັດໃຫ້ປະຊາຊົນສອງຊາດເຂົ້າໃຈ ວັດທະນະທຳຂອງກັນຢ່າງເລິກເຊິ່ງ ຍິ່ງຂຶ້ນ ແລະ ເພີ່ມພູນມິດຕະພາບຄວາມໄວ້ເນື້ອເຊື່ອໃຈ ລະຫວ່າງປະຊາຊົນສອງຊາດໃຫ້ຫລາຍຂຶ້ນກວ່າເກົ່າ. ພ້ອມນີ້, ຜູ້ເຂົ້າຮ່ວມງານຍັງໄດ້ຮຽນຮູ້ວິທີການຫໍ່ເຂົ້າຕົ້ມລາວ-ຈີນ, ພ້ອມທັງຊີມລົດຊາດເຂົ້າຕົ້ມທີ່ແຊບຊ້ອຍ ຕື່ມອີກ.
ການຮ່ວມມືແລກປ່ຽນວັດທະນະທໍາລາວ-ຈີນ ແມ່ນພາກສ່ວນສໍາຄັນຂອງຄວາມສໍາພັນສອງປະເທດ, ກິດຈະກໍາຄັ້ງນີ້, ຖືເປັນເວທີທີ່ໃຫ້ປະຊາຊົນສອງຊາດ ໄດ້ແລກປ່ຽນເຕັກນິກການຫໍ່ເຂົ້າຕົ້ນນໍາກັນ, ໄດ້ແບ່ງປັນປະເພນີອາຫານ ແລະ ການດຳາລົງຊີວິດຂອງຕົນ, ສົ່ງເສີມແລກປ່ຽນອະລິຍະທໍາໂລກ ແລະ ມິດຕະພາບລາວ- ຈີນໃຫ້ເຂົ້າສູ່ລວງເລິກ.
ຂ່າວ: ກິດຕາ
ພາບ: ເກດສະໜາ
