ພະແນກສາທາລະນະສຸກແຂວງ ຮ່ວມກັບ ອົງການກາແດງແຂວງສາລະວັນ ຈັດພິທີສະເຫຼີມສະຫຼອງວັນແພດລາວ ຄົບຮອບ 58 ປີ (ວັນທີ 18 ມິຖຸນາ 1965-18ມິຖຸນາ 2023) ແລະ ວັນບໍລິຈາກເລືອດໂລກ ຄົບຮອບ 18 ປີ (ວັນທີ 14 ມິຖຸນາ 2005 – 14 ມິຖຸນາ 2023), ເປັນກຽດເຂົ້າຮ່ວມໂດຍ ທ່ານ ດາວວົງ ພອນແກ້ວ ເຈົ້າແຂວງສາລະວັນ, ທ່ານ ອາຄົມ ລໍ່າວິຈິດ ຫົວໜ້າພະແນກສາທາລະນະສຸກແຂວງ, ນາງ ກົງສິດ ອຸ່ນຈິດ ຫົວ ໜ້າອົງການກາງແດງແຂວງ, ມີພາກສ່ວນກ່ຽວຂ້ອງພາຍໃນແຂວງເຂົ້າຮ່ວມ.
ໃນພິທີ, ທ່ານ ອາຄົມ ລໍ່າວິຈິດ ໄດ້ກ່າວວ່າ: ຄວາມສຳຄັນຂອງວັນແພດລາວ ແມ່ນວັນໝຶ່ງທີ່ເປັນປະຫວັດສາດ ອັນສຳຄັນຂອງຂະແໜງການສາທາລະນະສຸກເປັນວັນສ້າງຂະບວນການ, ກິດຈະກຳຕ່າງໆ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດກໍຄືສະໄໝປົກປັກຮັກສາ ແລະ ພັດທະນາປະເທດຊາດ ເພື່ອປຸກລະດົມມວນຊົນ ໃຫ້ເຫັນຄວາມສຳຄັນ, ເຂົ້າໃຈ ແລະ ເປັນເຈົ້າການໃນການປ້ອງກັນພະຍາດ, ສົ່ງເສີມ ແລະ ຮັກສາສຸຂະພາບຂອງຕົນເອງ, ຄອບຄົວ ແລະ ສັງຄົມ. ເຫັນໄດ້ຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງຂອງວຽກງານສາທາລະນະສຸກ, ຂອງຖັນແຖວແພດໝໍລາວໃນແຕ່ລະໄລຍະ.
ຈາກນັ້ນ, ຜູ້ເຂົ້າຮ່ວມຍັງໄດ້ຮັບຟັງປະຫວັດຄວາມເປັນມາຂອງວັນຜູ້ບໍລິຈາກເລືອດໂລກ ໃນປະເທດຕ່າງໆຢູ່ທົ່ວໂລກ ເພື່ອເປັນການສະແດງຄວາມຂອບໃຈຕໍ່ຜູ້ບໍລິຈາກເລືອດ ທີ່ເຂົາເຈົ້າໄດ້ມອບຂອງຂວັນທີ່ມີຄ່າຕໍ່ຊີວິດ ຄືການບໍລິຈາກເລືອດ ດ້ວຍຄວາມສະໝັກໃຈບໍ່ຮຽກຮ້ອງສິ່ງຕອບແທນ ເພື່ອຊ່ວຍຄົນເຈັບ ແລະ ສ້າງຈິດສໍານຶກໃນເລື່ອງຄວາມຈໍາເປັນຂອງການບໍລິຈາກເລືອດເປັນປະຈໍາ ແລະ ເປັນວັນຄ້າຍວັນເກີດ ຂອງທ່ານ ຄານ ແລນສະແທນເນີ ນັກຊີວະວິທະຍາ ຄົນໂອຕຣິດ ທີ່ໄດ້ເປັນຜູ້ຄົ້ນພົບ ໝວດເລືອດ ABO ຜູ້ທໍາອິດ, ຖືວ່າເປັນການເປີດສັກກະລາດໃໝ່ຂອງການສົ່ງເລືອດທີ່ປອດໄພໃຫ້ແກ່ຄົນເຈັບ.
ໃນພິທີດັ່ງກ່າວ, ກໍໄດ້ມອບໃບຍ້ອງຍໍໃຫ້ພະນັກງານແພດໝໍຜູ້ທີ່ມີຜົນງານ ໄລຍະ 1 ປີຜ່ານມາ ຈໍານວນ 139 ທ່ານ ຍິງ 79 ທ່ານ, ມອບໃບຍ້ອງຍໍ ແລະ ໃບຂອບໃຈໃຫ້ຜູ້ທີ່ປະກອບສ່ວນຊ່ວຍເຫຼືອສັງຄົມອີກ. ເປັນກຽດມອບໂດຍທ່ານເຈົ້າແຂວງໆສາລະວັນ.
(ຂ່າວ-ພາບ: ທິດລານີ ໂຄດໂຍທາ).
