ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ທ່ານນາງ ຫວູທິເຈິນເຟືອງ ປະທານຄະນະກຳມະການຕະຫຼາດຫຼັກຊັບແຫ່ງລັດ ຫວຽດນາມ ໄດ້ເຂົ້າຮ່ວມ ແລະ ກ່າວປາໄສໃນກອງປະຊຸມປະຈຳປີ ຄັ້ງທີ 48 ອົງການສາກົນບັນດາຄະນະກຳມະການຕະຫຼາດຫຼັກຊັບ (IOSCO) ຊຶ່ງດຳເນີນຢູ່ ບາງກອກ ປະເທດໄທ.
ທ່ານ ນາງ ຫວູທິເຈິນເຟືອງ ກ່າວຄຳເຫັນໃນກອງປະຊຸມວ່າ: ຕະຫຼາດຫຼັກຊັບ ຫວຽດນາມ ມີການພັດທະນາເປັນໜ້າປະທັບໃຈໃນຫຼາຍປີຜ່ານມາ. ຊຸມປີມໍ່ໆມານີ້, ຕະຫຼາດຫຼັກຊັບ ຫວຽດນາມ ແມ່ນຕະຫຼາດທີ່ໜ້າໄວ້ເນື້ອເຊື່ອໃຈສຳລັບນັກລົງທຶນໃນໂລກ, ພິເສດ, ພາກພື້ນ ອາຊີ – ປາຊີຟິກ. ທ່ານເນັ້ນໜັກຕື່ມວ່າ: ການລະດົມທຶນຜ່ານຕະຫຼາດຫຼັກຊັບ ບໍ່ພຽງແຕ່ນັບມື້ນັບມີຄວາມສະດວກຫຼາຍຂຶ້ນເທົ່ານັ້ນ, ບັນດາວິສາຫະກິດ ຫວຽດນາມ ໄດ້ມີບາດກ້າວຈະແຈ້ງໃນການບໍລິຫານ, ຈະແຈ້ງໃນການພັດທະນາແບບຍືນຍົງ. ເພື່ອສືບຕໍ່ຊຸກຍູ້ ວິສາຫະກິດ ແລະ ພັດທະນາຕະຫຼາດຫຼັກຊັບຕາມທິດມີຄຸນນະພາບ, ຍືນຍົງ, ຫວຽດນາມ ພວມສູ້ຊົນຍົກລະດັບໃຫ້ກາຍເປັນຕະຫຼາດພົ້ນເດັ່ນ; ຢຶດໝັ້ນປະຕິບັດການສ້າງໂຄງສ້າງຕະຫຼາດຄືນໃໝ່ ໂດຍອີງໃສ່ 4 ເສົາຄ້ຳຕົ້ນຕໍຄື: ພື້ນຖານສິນຄ້າ, ການຈັດຕັ້ງຕະຫຼາດ, ພື້ນຖານນັກລົງທຶນ ແລະ ຈັດຕັ້ງການດຳເນີນທຸລະກິດຕະຫຼາດຫຼັກຊັບ.
