ວັນທີ 14 ມິຖຸນາ ຜ່ານມາ, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ນໍາພາການນໍາຂັ້ນສູງຈາກສູນກາງ ແລະ ທ້ອງຖິ່ນ ລົງຢ້ຽມຢາມປະຊາຊົນ 2 ບ້ານຄື: ບ້ານລະເບົານໍ້າ ແລະບ້ານລ໊ອຍນໍ້າ ເມືອງນອງ ຊຶ່ງເປັນບ້ານຈັດສັນທີ່ໄດ້ຮັບຜົນກະທົບຈາກໂຄງການເຂື່ອນໄຟຟ້າເຊລະນອງ 1, ເພື່ອເຄື່ອນໄຫວຕິດຕາມຊຸກຍູ້ກ່ຽວກັບການຮັບຮູ້ສິດຄອບຄອງ ແລະ ນໍາໃຊ້ທີ່ດິນຂອງປະຊາຊົນທີ່ອາໄສຢູ່ໃນເຂດ 3 ປະເພດປ່າ, ໂດຍການລົງມາຕິດຕາມວຽກງານຄັ້ງນີ້ມີ ທ່ານ ນາງ ບຸນຄໍາ ວໍລະຈິດ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ພ້ອມທ່ານປະທານສະພາປະຊາຊົນແຂວງ, ທ່ານຫົວໜ້າ-ຮອງຫົວໜ້າກົມ, ຫົວໜ້າພະແນກການທີ່ກ່ຽວຂ້ອງ ແລະ ການນໍາຂອງເມືອງນອງຮ່ວມຊຸກຍູ້ຕິດຕາມ.
ໃນນີ້, ການຈັດຕັ້ງປະຕິບັດການຈັດສັນທີ່ດິນໃຫ້ປະຊາຊົນທີ່ຖືກຜົນກະທົບຈາກໂຄງການເຂື່ອນໄຟຟ້າເຊລະນອງ 1 ແລະ ການກໍານົດຂອບເຂດປະເພດດິນຕ່າງໆ ທີ່ພາຍຫຼັງການປຶກສາຫາລືຂອງຄະນະກໍາມະການຂັ້ນແຂວງ, ຂັ້ນເມືອງ ໄດ້ມີຄວາມເປັນເອກະພາບກັນ ໃນຄັ້ງວັນທີ 18-21 ມິຖຸນາ 2019 ທາງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ໃນຂະແໜງທີ່ດິນ, ພະແນກກະສິກໍາ ແລະ ປ່າໄມ້ແຂວງ ຂະແໜງພັດທະນາຊົນນະບົດ, ພ້ອມໜ່ວຍງານ RMU ປະຈໍາສະໜາມ ໄດ້ລົງສໍາຫຼວດພື້ນທີ່ດິນກະສິກໍາ ເພື່ອຈັດສັນທີ່ດິນທໍາການຜະລິດໃຫ້ປະຊາຊົນທີ່ຖືກຜົນກະທົບ ຍົກຍ້າຍຂຶ້ນມາໃນ 2 ບ້ານ ຊຶ່ງພື້ນທີ່ດັ່ງກ່າວ ນອນໃນປ່າສະຫງວນແຫ່ງຊາດດົງພູວຽງ, ທາງຄະນະກໍາມະການຂັ້ນແຂວງ, ເມືອງ ແລະ ໜ່ວຍງານປະຈໍາພາກສະໜາມ ໄດ້ຈັດສັນທີ່ດິນກະສິກໍາໃຫ້ປະຊາຊົນ 2 ບ້ານ ທີ່ຖືກຜົນກະທົບຈາກໂຄງການຄື: ບ້ານລະເບົານໍ້າ ຈັດສັນທີ່ດິນໃຫ້ປະຊາຊົນຈໍານວນ 56 ຄອບຄົວ ເນື້ອທີ່ 93,4 ເຮັກຕາ, ບ້ານລ໊ອຍນໍ້າ ຈໍານວນ 32 ຄອບຄົວ, ເນື້ອທີ່ 59,5 ເຮັກຕາ.
ໂອກາດນີ້, ກໍໄດ້ຮັບຟັງການລາຍງານຈາກອໍານາດການປົກຄອງບ້ານວ່າ: ບ້ານລະເບົານໍ້າ ແລະ ບ້ານລ໊ອຍນໍ້າ ມີພົນລະເມືອງທັງໝົດ 772 ຄົນ ຍິງ 380 ຄົນ, ມີ 108 ຄອບຄົວ, ມີ 98 ຫຼັງຄາເຮືອນ ເປັນຊົນເຜົ່າມັງກອງ, ປະຊາຊົນສ່ວນຫຼາຍເຊື່ອຖືຜີ ແລະ ອາຊີບຕົ້ນຕໍແມ່ນເຮັດໄຮ່, ສວນມັນຕົ້ນ ແລະເຮັດນາ, ພ້ອມນີ້ຍັງໄດ້ມີຂໍ້ສະເໜີຕໍ່ຂັ້ນເທິງຄື: ສະເໜີສ້າງເສັ້ນທາງແຕ່ບ້ານແກ້ງລີ້ນ ຫາບ້ານລະເບົານໍ້າ, ສ້ອມແປງນໍ້າບາດານຄືນ, ສ້າງຝາຍຫ້ວຍລູ ແລະ ຫ້ວຍລະສາດບ້ານລ໊ອຍນໍ້າ, ສ້າງເສັ້ນທາງລົງເຊບ້ານລະເບົານໍ້າ, ສະເໜີຂັ້ນເທິງຈັດສັນອາຊີບຄົງທີ່, ແບ່ງດິນໃຫ້ປະຊາຊົນໃຫ້ສໍາເລັດ.
ໂອກາດລົງຕິດຕາມ ທ່ານເຈົ້າແຂວງສະຫວັນນະເຂດ ໄດ້ແຈ້ງໃຫ້ຮູ້ກ່ຽວກັບບັນຫາການຈັດສັນເນື້ອທີ່ທໍາການຜະລິດໃຫ້ປະຊາຊົນ ແລະ ອອກໃບຕາດິນ ແມ່ນໃນເດືອນໜ້າ ຫຼື ເດືອນກໍລະກົດນີ້ ທາງພາກສ່ວນທີ່ກ່ຽວຂ້ອງແມ່ນຈະໄດ້ລົງມາກວດຄືນເພື່ອປັກຫຼັກໝາຍໃຫ້ ພ້ອມທັງກວດກາເລື່ອງສຸຂະພາບ ແລະ ໂພຊະນາການນໍາອີກ, ດັ່ງນັ້ນໄຮ່ນາຮົ້ວສວນທີ່ທໍາການຜະລິດຢູ່ແລ້ວ ກໍໃຫ້ສືບຕໍ່ປະຕິບັດໃຫ້ສໍາເລັດ ຖ້າຫາກພົບວ່າບໍ່ແມ່ນດິນຂອງຕົນເອງກໍສັບປ່ຽນກັນຕາມຫຼັງ, ເພື່ອຄວາມສາມັກຄີຂອງບ້ານ, ດັ່ງນັ້ນຕ້ອງມີຄວາມດຸໝັ່ນຫ້າວຫັນ ພ້ອມກັນບຸກບືນສ້າງລາຍຮັບເຂົ້າຄອບຄົວໃຫ້ຫຼາຍ ເພື່ອໃຫ້ເປັນຄອບຄົວພົ້ນທຸກ ແລະ ບ້ານພົ້ນທຸກ.
ໂອກາດລົງມາຢ້ຽມຢາມທາງການນໍາກໍໄດ້ມອບເຂົ້າໃຫ້ແກ່ທັງ 2 ບ້ານ, ພ້ອມນີ້ທ່ານເຈົ້າແຂວງສະຫວັນນະເຂດ ກໍໄດ້ມອບເງິນສ່ວນຕົວ ຈໍານວນ 5 ລ້ານກີບ ເພື່ອນໍາໄປຊື້ລູກປາມາປ່ອຍ. ຈາກນັ້ນທາງຄະນະກໍໄດ້ສືບຕໍ່ເບິ່ງແຜນການກໍ່ສ້າງຂົວແກ້ງລີ້ນ ທີ່ໄດ້ຮັບຜົນກະທົບຈາກໂຄງການເຂື່ອນໄຟຟ້າເຊລະນອງ 1 ເຊັ່ນດຽວກັນ, ພ້ອມສືບຕໍ່ກັບເຂົ້າສູ່ເທດສະບານເມືອງນອງ ເພື່ອຕິດຕາມການປັບປຸງເສັ້ນທາງໃນເທດສະບານເມືອງຈໍານວນ 9 ເສັ້ນ, ລວງຍາວ 4,46 ກິໂລແມັດ ໃນມູນຄ່າ 7 ຕື້ 9 ຮ້ອຍລ້ານກີບ.
ຂ່າວ-ພາບ: ສະຫວັນນະເຂດ
