ໂຮງໝໍມິດຕະພາບໄດ້ຈັດກອງປະຊຸມສະຫຼຸບເປີດຂະບວນແຂ່ງຂັນ-ຍ້ອງຍໍຮັກຊາດ ແລະ ພັດທະນາ, ຍ້ອງ ຍໍຜົນງານ 5 ປີ ແລະ ພິທີປາຖະກະຖາວັນແພດລາວ ຄົບຮອບ 58 ປີຂຶ້ນໃນວັນທີ 16 ມິຖຸນາ ນີ້ ທີ່ໂຮງໝໍດັ່ງ ກ່າວ, ໂດຍການເປັນປະທານຂອງ ທ່ານ ສອນໄຊ ລາດຊະວົງ ຜູ້ອໍານວຍການໂຮງໝໍມິດຕະພາບ, ມີຄະນະພະແນກ, ທ່ານໝໍ, ພະຍາບານເຂົ້າຮ່ວມ.
ທ່ານ ສອນໄຊ ລາດຊະວົງ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອເປັນການສະຫຼຸບ, ເປີດຂະບວນແຂ່ງ ຂັນ-ຍ້ອງຍໍຮັກຊາດ ແລະ ພັດທະນາ, ຍ້ອງຍໍຜົນງານ 5 ປີ (2015-2020) ແລະ ປາຖະກະຖາວັນແພດລາວ ຄົບຮອບ 58 ປີ (ວັນທີ 18 ມິຖຸນາ 1965) ເພື່ອໃຫ້ພະນັກງານ-ລັດຖະກອນມີຄວາມບຸກບືນ, ຫ້າວຫັນ, ມີຫົວຄິດປະດິດສ້າງ, ຮັບຜິດຊອບຕໍ່ໜ້າທີ່ວຽກງານຂອງຕົນ, ພ້ອມທັງສ້າງໃຫ້ໄດ້ວຽກດີຄົນເດັ່ນ, ຜ່ານຂະບວນການແຂ່ງຂັນ ແລະ ຍ້ອງຍໍຕາມ 4 ຄາດໝາຍລວມຄື: ໃຫ້ໄວ, ໃຫ້ດີ, ໃຫ້ຫຼາຍ ແລະ ໃຫ້ຖືກກົດໝາຍ) ແນໃສ່ສ້າງການຫັນ ປ່ຽນຢ່າງແຂງແຮງເລິກເຊິ່ງຮອບດ້ານໃນວຽກງານໂຮງໝໍ ຕິດພັນກັບວຽກງານ ແລະ ແກ້ໄຂຄວາມທຸກຍາກຂອງພະນັກງານ, ໂຮງໝໍໄດ້ວາງຂໍ້ແຂ່ງຂັນໃນແຕ່ລະດ້ານໃຫ້ພະແນກການຕ່າງໆ ແລະ ບຸກຄົນໃນກຸ່ມວຽກດຽວກັນ ຫຼືການຈັດຕັ້ງດຽວກັນເປັນບ່ອນອີງ ເພື່ອນໍາໄປຜັນຂະຫຍາຍເປັນຂໍ້ແຂ່ງຂັນລະອຽດຂອງຕົນໃນແຕ່ລະດ້ານ. ພ້ອມດຽວກັນນັ້ນໄດ້ຈັດພິທີປະດັບຫຼຽນໃຫ້ພະນັກງານແພດໝໍທີ່ມີຜົນງານດີເດັ່ນໃນການປະກອບສ່ວນຮັກສາສຸຂະພາບຂອງປະຊາຊົນ ຊຶ່ງມີຫຼຽນໄຊແຮງງານຊັ້ນ I ຈຳນວນ 9 ຄົນ, ຫຼຽນໄຊແຮງງານຊັ້ນ II ຈຳນວນ 9 ຄົນ, ຫຼຽນໄຊແຮງງານຊັ້ນ III ມີ 6 ຄົນ ຫຼຽນກາແຮງງານ 25 ຄົນ, ໃບຍ້ອງຍໍລັດຖະບານ 59 ຄົນ, ໃບຍ້ອງຍໍຂັ້ນກະຊວງ 48 ຄົນ.
ໂອກາດນີ້, ທ່ານ ສອນໄຊ ລາດຊະວົງ ໄດ້ປາຖະກະຖາວັນແພດລາວວ່າ: ວັນແພດລາວເປັນວັນທີ່ມີຄວາມໝາຍສໍາຄັນຢ່າງຍິ່ງ ເພື່ອລະນຶກເຖິງການກໍາເນີດ, ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງຂອງວຽກງານຮັກສາສຸຂະ ພາບ ແລະ ການພັດທະນາບຸກຄະລາກອນສາທາລະນະສຸກ, ໂດຍສະເພາະເພື່ອຈາລຶກ ແລະ ລະນຶກເຖິງບຸນຄຸນຂອງພະນັກງານແພດໝໍໃນຂອບເຂດທົ່ວປະເທດ ທີ່ໄດ້ປະກອບສ່ວນເສຍສະຫຼະເຫື່ອແຮງສະຕິປັນຍາ ເປັນເຈົ້າການປະຕິບັດໜ້າທີ່ໃນແຕ່ລະໄລຍະ ນັບແຕ່ສະໄໝຕໍ່ສູ້ກູ້ຊາດຈົນເຖິງປັດຈຸບັນ. ທ່ານຍັງໄດ້ເນັ້ນໜັກໃຫ້ພະນັກ ງານແພດໝໍ, ພະຍາບານເອົາໃຈໃສ່ຕໍ່ວຽກງານການບໍລິການໃຫ້ມີຄຸນສົມບັດ, ສິນທໍາປະຕິວັດ, ມີຈັນຍາທໍາ, ຈັນຍາບັນ, ມາລະຍາດທ່າທີການຮັບໃຊ້ໃຫ້ສົມເປັນແພດປະຕິວັດໃນຍຸກປ່ຽນແປງໃໝ່.
ຂ່າວ: ບຸນອູ້ມ, ພາບ: ບຸນຕອມ
