ປັດຈຸບັນເຂດພັດທະນາກວມລວມໄຊເຊດຖາ ໄດ້ສໍາເລັດໄລຍະທີໜຶ່ງ ການກໍ່ສ້າງໂຄງລ່າງພື້ນຖານເປັນຕົ້ນ ຖະໜົນຫົນທາງ, ນໍ້າປະປາ, ໄຟຟ້າ, ການສື່ສານ, ຫ້ອງການພາສີ ແລະ ສິ່ງອໍານວຍຄວາມສະດວກອື່ນໆ. ປັດຈຸບັນເຂດພັດທະນາກໍາລັງສຸມໃສ່ກໍ່ສ້າງເຂດການຄ້າການທ່ອງທ່ຽວ ແລະ ເຂດຕົວເມືອງ ໃໝ່ນະຄອນຫຼວງວຽງຈັນຂອງໄລຍະທີສອງ ເພື່ອເປັນການປັບປຸງສິ່ງອໍານວຍຄວາມສະດວກຂອງໂຄງລ່າງພື້ນຖານ, ເຂດພັດທະນາໄດ້ມີການລົງທຶນໄປແລ້ວທັງໝົດ 1,3 ຕື້ໂດລາ ໃນນີ້ລົງທຶນໃນໂຄງລ່າງພື້ນຖານປະມານ 600 ລ້ານໂດລາ, ມູນຄ່າລົງທຶນຂອງວິສາຫະກິດທີ່ລົງທຶນຢູ່ໃນເຂດລົງທຶນປະມານ 700 ລ້ານໂດລາ.
ທ່ານ ຊຽງ ຈູນ ຜູ້ອໍານວຍການ ບໍລິສັດ ຮ່ວມທຶນລາວ-ຈີນ ໄດ້ກ່່າວໃນງານພິທີສໍາພາດກ່ຽວກັບຜົນສໍາເລັດການຮ່ວມມືໃນການປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນ ທາງລະຫວ່າງ ສອງຊາດ ລາວ-ຈີນ ໃຫ້ປະຊາຊົນລາວ ແລະ ຈີນ ໄດ້ຮັບເມື່ອບໍ່ດົນຜ່ານມາວ່າ: ເຂດພັດທະນາກວມລວມໄຊເຊດຖາ ແມ່ນໂຄງການທີ່ລັດຖະບານສອງປະເທດລາວ – ຈີນ ຕົກລົງເຫັນດີຮ່ວມມືກັນ ເພື່ອເປັນການຮ່ວມມືກັນລະດັບປະເທດ ຊຶ່ງໂຄງການດັ່ງກ່າວແມ່ນເຂດຮ່ວມມືການຄ້າຕ່າງປະເທດແຫ່ງດຽວຂອງຈີນໃນລາວ ແລະ ທັງເປັນເຂດເສດຖະກິດພິເສດຂອງລາວ, ພ້ອມທັງເປັນໂຄງການທີ່ໄດ້ຖືກນໍາເຂົ້າໃນການລິເລີ່ມ “ໂຄງການ ໜຶ່ງແລວ ໜຶ່ງເສັ້ນທາງ” ທີ່ໄວທີ່ສຸດຂອງຈີນ ຊຶ່ງໄດ້ຮັບການສະໜັບສະໜູນ ແລະ ເອົາໃຈໃສ່ຢ່າງສູງຈາກສອງລັດຖະບານລາວ-ຈີນ. ເຂດພັດທະນາແມ່ນບໍລິສັດຮ່ວມທຶນລາວ-ຈີນ (ເອີ້ນຫຍໍ້: LCC) ເປັນຜູ້ຮັບຜິດຊອບການລົງທຶນ, ການກໍ່ສ້າງ ແລະ ການບໍລິຫານພັດທະນາ ຊຶ່ງບໍລິສັດຮ່ວມທຶນລາວ-ຈີນແມ່ນບໍລິສັດທີ່ໄດ້ຮັບການຮ່ວມມືສ້າງຕັ້ງຂຶ້ນລະຫວ່າງ ກຸ່ມບໍລິສັດກໍ່ສ້າງ ແລະ ລົງທຶນແຂວງຢູນນານຫຸ້ນສ່ວນຈໍາກັດ ແລະ ອົງການປົກຄອງນະຄອນຫຼວງວຽງຈັນ.
ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ມີຫົວໜ່ວຍວິສາຫະກິດທີ່ໄດ້ເຊັນສັນຍາທັງໝົດ 126 ບໍລິສັດ, ໃນນີ້ມີ 62 ບໍລິສັດໄດ້ເລີ່ມທໍາການຜະລິດແລ້ວ ແລະ ອີກ 64 ບໍລິສັດແມ່ນຢູ່ໃນຂັ້ນຕອນການກະກຽມເພື່ອດໍາເນີນການກໍ່ສ້າງໂຮງງານ ຊຶ່ງເປັນນັກລົງທຶນທີ່ມາຈາກ 8 ປະເທດ ຄື: ສປ ຈີນ, ໄທ, ຍີ່ປຸ່ນ, ມາເລເຊຍ, ສິງກະໂປ, ລາວ, ສະຫະລັດອາເມຣິກາ ແລະ ສະວິດເຊີແລນ ລວມມີບໍລິສັດທີ່ສໍາຄັນຄື: ສໍານັກງານໃຫຍ່ຂອງບໍລິສັດທາງລົດໄຟລາວ-ຈີນ, ກຸ່ມບໍລິສັດຄວາມຫວັງໃໝ່ ເປັນໂຮງງານຜະລິດຫົວອາຫານທີ່ໃຫຍ່ ແລະ ມີຄຸນນະພາບ, ກຸ່ມບໍລິສັດໂຮຢາ ເປັນບໍລິສັດທີ່ໃຫຍ່ ແລະ ມີຊື່ສຽງ ຂອງປະເທດຍີ່ປຸ່ນ ຊຶ່ງຈະນໍາໃຊ້ແຮງງານ ປະມານ 5.000 ຄົນ, ບໍລິສັດ ເປ້ເຕີເຄື່ອງນຸ່ງຫົ່ມ (ລາວ) ຈຳກັດ ຊຶ່ງເປັນໂຮງງານຜະລິດເຄື່ອງນຸ່ງຫົ່ມທີ່ນໍາໃຊ້ເຕັກໂນໂລຊີສູງ, ມີການຮ່ວມມືກັບຍີ່ຫໍ້ດັງໆລະດັບສາກົນຫຼາຍຍີ່ຫໍ້, ຕ້ອງການນຳໃຊ້ແຮງງານລາວ 1.000 ກວ່າຄົນ ແລະ ບໍລິສັດ ອື່ນໆ. ຂອບເຂດການລົງທຶນຂອງວິສາຫະກິດກວມເອົາຜະລິດຕະພັນເອເລັກໂຕຣນິກ, ຜະລິດຕະພັນອຸປະກອນໄຟຟ້າ, ຜະລິດຕະພັນຢາ, ພະລັງງານສະອາດ, ການປຸງແຕ່ງຜະລິດຕະພັນກະສິກໍາ, ການແປຮູບເຄື່ອງນຸ່ງຫົ່ມ, ເຄື່ອງໂລຫະ, ການຂົນສົ່ງ ແລະ ສາງສິນຄ້າ ລວມທັງໝົດ 8 ຂະແໜງການ.
ພາຍຫຼັງທີ່ບັນດາບໍລິສັດທັງໝົດກ່າວມາໃນຂ້າງເທິງນັ້ນໄດ້ລົງມືທໍາການຜະລິດສາມາດສ້າງມູນຄ່າຜະລິດຕະພັນທັງໝົດ 1,8 ຕື້ໂດລາ, ສາມາດສ້າງວຽກເຮັດງານທໍາໄດ້ຫຼາຍກວ່າ 10.000 ກວ່າຄົນ, ໂຄງການເຂດພັດທະນາກວມລວມໄຊເຊດຖາເປັນໂຄງການທີ່ສໍາຄັນຂອງສອງລັດຖະບານ, ເປັນໂຄງການທີ່ເປັນສັນຍາລັກມິດຕະພາບລະຫວ່າງສອງປະເທດ ລາວ-ຈີນ, ໄດ້ຮັບການເອົາໃຈໃສ່ ແລະ ໃຫ້ການສະໜັບສະໜູນຈາກລັດຖະບານສອງຊາດ ແລະ ເປັນໂຄງການໜຶ່ງທີ່ຖືເອົາການປົກປັກຮັກສາສິ່ງແວດລ້ອມ ແລະ ເຂດຂຽວເປັນຫຼັກ. ດັັ່ງນັ້ນ, ລັດຖະບານສອງຝ່າຍ ກໍຄືກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແຫ່ງ ສປປ ລາວ ແລະ ກະຊວງນິເວດ ແລະ ສິ່ງແວດລ້ອມ ແຫ່ງ ສປ ຈີນ, ຈຶ່ງໄດ້ຮ່ວມກັນສ້າງຕັ້ງເຂດຕົວແບບການປ່ອຍອາຍກາກບອນຕໍ່າຢູ່ເຂດພັດທະນາກວມລວມໄຊເຊດຖາ ຊຶ່ງໃນປີ 2019 ລັດຖະບານຈີນ ໄດ້ອະນຸມັດຊ່ວຍເຫຼືອອຸປະກອນເຂົ້າໃນໂຄງການມີ: ລົດເມໄຟຟ້າ, ລົດເກັງໄຟຟ້າ, ລົດບັນທຸກນ້ອຍໄຟຟ້າ, ດອກໄຟເຍືອງທາງທີ່ໃຊ້ພະລັງງານແສງຕາເວັນ, ອຸປະກອນກວດກາສິ່ງແວດລ້ອມແບບພົກພາສະດວກ.
ໃນຕົ້ນເດືອນພະຈິກ 2022 ກະຊວງນິເວດ ແລະ ສິ່ງແວດລ້ອມຈີນ ໄດ້ອະນຸມັດໂຄງການສະ ໜອງອຸປະກອນ ໄລຍະທີສອງ ຊຶ່ງໄດ້ສືບຕໍ່ຊ່ວຍເຫຼືອ ດອກໄຟເຍືອງທາງທີ່ໃຊ້ພະລັງງານແສງຕາເວັນ ແລະ ອຸປະກອນຜະລິດໄຟຟ້າພະລັງງານແສງຕາເວັນແບບຄົບຊຸດ ລວມມູນຄ່າ 40 ລ້ານຢວນ (ສະກຸນເງິນຈີນ) ຄາດວ່າ ກາງປີ 2023 ອຸປະກອນຊ່ວຍເຫຼືອໄລຍະທີ 2 ຈະຈັດສົ່ງມາຮອດເຂດຂອງພວກເຮົາ; ໃນທ້າຍເດືອນພະຈິກ ປີ 2022, ໃນຄະນະທີ່ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເດີນທາງຢ້ຽມຢາມ ສປ ຈີນ ໄດ້ລະບຸໄວ້ໃນຖະແຫຼງການຮ່ວມ ວ່າດ້ວຍການສືບຕໍ່ສ້າງຄູ່ຮ່ວມຊາຕາກຳ ລາວ-ຈີນ ໃຫ້ເຂົ້າສູ່ລວງເລິກ ວ່າ: ຈະສະໜັບສະໜູນການກໍ່ສ້າງເຂດສາທິດກາກບອນຕ່ຳ ຂອງການຮ່ວມມືໃຕ້-ໃຕ້ ວ່າດ້ວຍການຮັບມືຕໍ່ການປ່ຽນແປງ ຂອງສະພາບດິນຟ້າອາກາດ ລະຫວ່າງ ລາວ ແລະ ຈີນ ໂດຍຊຸກຍູ້ເປົ້າໝາຍການກໍ່ສ້າງໃຫ້ເຂດສາທິດດັ່ງກ່າວ ມີກາກບອນຕ່ຳ ແລະ ສີຂຽວ ຫຼາຍຂຶ້ນກວ່າເກົ່າ ເພື່ອໃຫ້ກາຍເປັນຕົວແບບທີ່ນຳໜ້າ ຂອງການຮັບມືກັບການປ່ຽນແປງຂອງສະພາບດິນຟ້າອາກາດ ແລະ ຊຸກຍູ້ການພັດທະນາສີຂຽວ”.
ໂດຍ: ບຸນອູ້ມ
