ກອງປະຊຸມຄົບຄະນະກາງສະໄໝ ຄະນະບໍລິຫານງານພັກແຂວງເຊກອງ ສະໄໝທີ X ເປີດຂຶ້ນຢ່າງເປັນທາງການ ໃນວັນທີ 13 ມິຖຸນາ 2023 ພາຍໃຕ້ການເປັນປະທານຂອງ ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີສະຫາຍ ເຫລັກໄຫລ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ບັນດາສະຫາຍຄະນະບໍລິຫານງານພັກແຂວງ, ຄະນະປະຈໍາພັກເມືອງ, ຄະນະພັກຮາກຖານ ແລະ ຄະນະໜ່ວຍພັກພະແນກ, ຫ້ອງການ-ອົງການທຽບເທົ່າອ້ອມຂ້າງແຂວງ ເຂົ້າຮ່ວມ.
ສະຫາຍ ເຫລັກໄຫລ ສີວິໄລ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ແມ່ນເຫດການການເມືອງທີ່ມີຄວາມໝາຍສໍາຄັນ ຊຶ່ງໄຂຂຶ້ນທ່າມກາງບັນຍາກາດທົ່ວພັກ-ລັດ, ກໍາລັງປະກອບອາວຸດ ກໍຄືປະຊາຊົນແຂວງເຊກອງ ສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ ກໍຄື ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງລັດຖະບານ ຕິດພັນກັບການສ້າງຂະບວນການ, ສ້າງຜົນງານຂໍານັບຮັບຕ້ອນວັນສໍາຄັນຂອງພັກ, ຂອງຊາດຢ່າງເປັນຂະບວນຟົດຟື້ນ ແລະ ກວ້າງຂວາງ. ກອງປະຊຸມຄັ້ງນີ້, ຈະໄດ້ພ້ອມກັນສະຫລຸບຕີລາຄາ ແລະ ສໍາຫລວດກວດກາການນໍາພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ, ການປະຕິບັດແຜນພັດທະນາເສດຖະກິດ-ສັງຄົມ ຂອງແຂວງໄລຍະກາງສະໄໝທີ X ເພື່ອຊອກໃຫ້ເຫັນຜົນງານດ້ານດີ ທີ່ຄວນສືບຕໍ່ເສີມຂະຫຍາຍ ແລະ ດ້ານອ່ອນ-ຂໍ້ຄົງຄ້າງ ເພື່ອກໍານົດທິດທາງແຜນການ ແລະ ມາດຕະການແກ້ໄຂໃຫ້ແທດຕົວຈິງກັບແຕ່ລະເປົ້າໝາຍ ແນໃສ່ຍົກສູງຄວາມສາມາດນໍາພາພັດ ທະນາແຂວງເຊກອງ ຕາມທິດສ້າງບາດກ້າວບຸກທະລຸຢ່າງແຂງແຮງ, ເລິກເຊິ່ງ ແລະ ຮອບດ້ານໃຫ້ປະກົດຜົນເປັນຈິງ.
ພ້ອມນີ້, ສະຫາຍ ເຫລັກໄຫລ ສີວິໄລ ຍັງໄດ້ຮຽກຮ້ອງມາຍັງບັນດາສະຫາຍຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບການເມືອງຂອງຕົນເພື່ອຄົ້ນຄວ້າ, ປຶກສາຫາລື, ປະກອບຄໍາຄິດຄໍາເຫັນໃສ່ບົດສະຫລຸບ ແລະ ທິດທາງແຜນການໃຫ້ເລິກເຊິ່ງ, ກົງໄປກົງມາ, ມີຄວາມເປັນເອກະພາບ ແລະ ມີເນື້ອໃນຄົບຖ້ວນສົມບູນ ເພື່ອເປັນບ່ອນອີງໃນການປະຕິບັດໃນຕໍ່ໜ້າ ໃຫ້ມີຜົນສໍາເລັດທີ່ໃຫຍ່ຫລວງກວ່າເກົ່າ ແລະ ກ້າວເຂົ້າສູ່ກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງເຊກອງ ໃນປີ 2025 ຢ່າງມີໄຊ.
