ກອງປະຊຸມນໍາສະເໜີໂຄງການ ເດຝລາວ ສົ່ງເສີມການສ້າງຄວາມຮູ້ຄວາມສາມາດ ແລະ ການພັດທະນາແບບມີສ່ວນຮ່ວມ ໃຫ້ກັບຄົນພິການທາງດ້ານການໄດ້ຍິນ ແລະ ການປາກເວົ້າ ຢູ່ແຂວງຫຼວງພະບາງ ໄດ້ຈັດຂຶ້ນຫວ່າງແລ້ວນີ້ ຢູ່ຫ້ອງປະຊຸມສະຫະພັນແມ່ຍິງແຂວງ ໂດຍການເປັນປະທານຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ມີຄະນະຮັບຜິດຊອບ ແລະ ຜູ້ປະສານງານໂຄງການ ເດຟລາວ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ຈຸດປະສົງລວມ ຂອງໂຄງການ ເດຝລາວ ແມ່ນເພື່ອໃຫ້ຄົນພິການ ແລະ ທຸກຄົນໃນສັງຄົມ ເຂົ້າໃຈສິດທິຂອງຄົນພິການ, ກົດໝາຍ ແລະ ນະໂຍບາຍຕ່າງໆ ກ່ຽວກັບຄົນພິການ ໂດຍສະເພາະການສົ່ງເສີມ ແລະ ພັດທະນາຄົນພິການ ທາງດ້ານການໄດ້ຍິນ ແລະ ການປາກເວົ້າ ຢູ່ແຂວງຫຼວງພະບາງ, ທັງເປັນການສ້າງຄວາມຮັບຮູ້ດ້ານສິດທິຂອງຄົນພິການ ອີງຕາມກົດໝາຍ ວ່າດ້ວຍຄົນພິການ, ນິຕິກຳ ແລະ ນະໂຍບາຍຕ່າງໆ ໃຫ້ແກ່ຄົນພິການທາງດ້ານການໄດ້ຍິນ ແລະ ການປາກເວົ້າ ລວມທັງຄອບຄົວຂອງພວກເຂົາໄດ້ຮັບຮູ້ ຢູ່ນະຄອນ-ຫຼວງພະບາງ ແຂວງຫຼວງພະບາງ.
ກຸ່ມເປົ້າໝາຍຂອງໂຄງການ ແມ່ນຄົນພິການທາງດ້ານການໄດ້ຍິນ ແລະ ການປາກເວົ້າ ຢູ່ໃນ 3 ປະເທດ ຄື: ປະເທດລາວ ໂດຍແມ່ນສະມາຄົມແມ່ຍິງພິການ ແລະ ສະມາຄົມຄົນຫູໜວກ ປະເທດຫວຽດນາມ (PARD) ແລະ ປະເທດກໍາປູເຈຍ (CDC), ໂຄງການເດຟລາວ-ສປປ ລາວ ແມ່ນເນັ້ນໃສ່ການສົ່ງເສີມ ແລະ ເຜີຍແຜ່ການໃຊ້ພາສາມືລາວ; ສ້າງຕົວແບບຄົນຫູໜວກດ້ານການນໍາພາ ແລະ ເປັນຕົວແທນຕາງໜ້າໃຫ້ຄົນຫູໜວກໃນການປະສານງານຂັ້ນແຂວງ, ເມືອງ ແລະ ຊຸມຊົນ.
(ຂ່າວ-ພາບ: ເພັດສາຄອນ ສິມມະວົງ)
