ສື່ມວນຊົນຂອງກາຕາ ປະກາດຂ່າວໃຫຍ່ວ່າ ທ່ານ ຊິກ ຢາສຊິມ ບິນ ຮາໝັດ ອັນທານີ ໄດ້ປະສົບຄວາມສໍາເລັດໃນການເຂົ້າຊື້ກິດຈະການສະໂມສອນ ແມນເຊັສເຕີ ຢູໄນເຕັດ ແລ້ວ ແລະ ກຽມຈະປະກາດໃນໄວໆນີ້.
ກ່ອນໜ້ານີ້ ມີກະແສວ່າ ທ່ານ ຊິກ ຢາສຊິມ ຈະເປັນຝ່າຍເສຍໄຊໃນການຊື້ສະໂມສອນ ແມນເຊັສເຕີ ຢູໄນເຕັດ ແຕ່ຫຼັງຈາກຍື່ນຂໍ້ສະເໜີທີ 5 ໄປຕັ້ງແຕ່ອາທິດທີ່ຜ່ານມາ ຝ່າຍກາຕາໝັ້ນໃຈວ່າພວກເຂົາຈະພິກເອົາຊະນະ ເຊີ ຈິມ ແຣດຄລິຟ ໄດ້.
ຫຼ້າສຸດ ຫວິດເຕີ Al watan Qatar ສື່ຈາກກາຕາ ເຊິ່ງມີທ່ານ ຮາເໝັດ ຢາສຊິມ ອັນທານີ ພໍ່ຂອງທ່ານ ຊິກ ຢາສຊິມ ຖືຫຸ້ນຢູ່ 50% ລາຍງານວ່າ ການຊື້ກິດຈະການຂອງຝ່າຍກາຕາປະສົບຜົນສໍາເລັດແລ້ວ.
ໃນຂະນະດຽວກັນ ລາຄາຫຸ້ນຂອງແມນເຊສເຕີ ຢູໄນເຕັດ ກໍພຸ່ງຂຶ້ນເປັນ 24 ໂດລາສະຫະລັດ ຫຼື ຄິດເປັນ 16,74% ອີກດ້ວຍ.
ຕອນນີ້ ສື່ມວນຊົນທີ່ມີຊື່ສຽງຈາກເອີຣົບຍັງບໍ່ໄດ້ຢືນຢັນຂ່າວດັ່ງກ່າວ ແຕ່ເຊື່ອກັນວ່າ ຫຼັງຈາກການຍື່ນຂໍ້ສະເໜີຫຼ້າສຸດຂອງທ່ານ ຊິກ ຢາສຊິມ ຈະເຮັດໃຫ້ການເຈລະຈາຊື້ກິດຈະການທີ່ຍືດເຍື້ອຈະສິ້ນສຸດລົງໃນໄວໆນີ້.
