ກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກ ນະຄອນຫຼວງວຽງຈັນ (ນວ) ສະ ໄໝທີ VII ເປີດຂຶ້ນວັນທີ 12 ມິຖຸນາ ນີ້ ທີ່ກອງບັນຊາການທະຫານ ນວ ໂດຍການເປັນປະທານຂອງ ສະຫາຍ ອານຸພາບ ຕຸນາລົມ ຄະນະເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນ ນວ ໃຫ້ກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ມີຜູ້ຕາງໜ້າຄະນະຈັດຕັ້ງສູນກາງພັກ, ຄະນະກຳມະການກວດກາສູນກາງພັກ, ບັນດາຄະນະບໍລິຫານງານພັກ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ອານຸພາບ ຕຸນາລົມ ໄດ້ກ່າວວ່າ: ຕະຫຼອດໄລຍະກາງສະໄໝຜ່ານມາ ຄະນະບໍລິຫານງານພັກ ນວ ໄດ້ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ ດ້ວຍຫຼາຍວິທີການ ຕາມພາລະບົດບາດ ໜ້າທີ່ ຂອບເຂດສິດຂອງຕົນ ອັນພົ້ນເດັ່ນໄດ້ນຳພາສຶກສາອົບຮົມການເມືອງ-ແນວຄິດພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າຊາວ ນວ ທີ່ຢູ່ໃນຂອບເຂດຄວາມຮັບຜິດຊອບຂອງຕົນ ໃຫ້ມີຄວາມເຂົ້າໃຈແຈ້ງຕໍ່ແນວທາງນະໂຍບາຍຂອງພັກ ກົດໝາຍ ລະບຽບການຕ່າງໆຂອງລັດ; ເອົາໃຈໃສ່ຄຸ້ມຄອງກໍ່ສ້າງ-ບໍາລຸງພະນັກງານຢ່າງຕໍ່ເນື່ອງ ເຕົ້າໂຮມຄວາມສາມັກຄີພາຍໃນພັກ ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນຊາວ ນວ ໃຫ້ມີຄວາມເປັນປຶກແຜ່ນ ແລະ ປັບປຸງການຈັດຕັ້ງພັກ-ລັດ ພາຍໃນນະຄອນຫຼວງວຽງຈັນ ບັນດາພະແນກການ, ອົງການທຽບເທົ່າ ແລະ ບັນດາເມືອງຢ່າງເປັນລະບົບຄົບຊຸດ ຕໍ່ເນື່ອງ ດ້ວຍຄວາມພະຍາຍາມດັ່ງກ່າວ ນວ ຈຶ່ງມີສະຖຽນລະພາບທາງດ້ານການເມືອງ, ມີຄວາມເປັນລະບຽບຮຽບຮ້ອຍດີ, ປະຊາຊົນມີຄວາມສາມັກຄີປອງດອງ, ມີແນວຄິດອຸ່ນອ່ຽນທຸ່ນທ່ຽງ, ມີຄວາມເຊື່ອໝັ້ນຕໍ່ແນວທາງປ່ຽນແປງໃໝ່ທີ່ມີຫຼັກການຂອງພັກ, ປົວແປງ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆດ້ວຍຈິດໃຈເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ບໍລິການຮັບໃຊ້ປະຊາຊົນດ້ວຍຄວາມບໍລິສຸດສັດຊື່ ລະບົບການຈັດຕັ້ງໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງຂຶ້ນເປັນກ້າວໆ ຖັນແຖວພະນັກງານ-ສະມາຊິກພັກ ມີທັດສະນະຫຼັກໝັ້ນທາງດ້ານການເມືອງໜັກແໜ້ນ ແລະ ສາມາດເຮັດ ຫຼ້ອນໜ້າທີ່ການເມືອງທີ່ຂັ້ນເທິງມອບໝາຍໃຫ້ໃນລະດັບດີສົມຄວນ.
ກອງປະຊຸມຄັ້ງນີ້ໄດ້ຮັບຟັງການເຊື່ອມຊຶມເອກະສານຄຳສັ່ງ ເລກທີ 268/ຄລສພ ວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກ ແຕ່ລະຂັ້ນ, ມະຕິຂອງກົມການ ເມືອງສູນກາງພັກ ສະບັບເລກທີ 030/ກມສພ ລົງ ວັນທີ 3 ມັງກອນ 2018 ແລະ ບັນດາຂໍ້ຫ້າມຂອງສະມາຊິກພັກທີ່ກົດລະບຽບພັກປະຊາຊົນປະຕິວັດລາວ ສະໄໝທີ XI ໄດ້ກຳນົດໄວ້ ພ້ອມນັ້ນໄດ້ ປະກາດບົ່ງຕົວແຕ່ງຕັ້ງກຳມະການພັກ ນວ 3 ສະຫາຍຄື: ສະຫາຍ ແສງອາລຸນ ສຸລິຍະວົງ ຫົວໜ້າພະແນກ ກະສິກຳ ແລະ ປ່າໄມ້ ນວ, ສະຫາຍ ເສີມຄຳ ທຸມມະວົງສາ ຫົວໜ້າພະແນກພະລັງງານ ແລະ ບໍ່ແຮ່ ແລະ ສະຫາຍ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນວ, ຈາກນັ້ນກອງປະຊຸມກໍໄດ້ມີການທາບທາມຢັ່ງຫາງສຽງຄວາມໄວ້ວາງໃຈຕໍ່ຄະນະບໍລິຫານງານພັກ ນວ.
ໂອກາດນີ້, ສະຫາຍ ທອງລຸນ ສີສຸລິດ ໄດ້ມີຄໍາເຫັນຊີ້ນໍາວ່າ: ການທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ໃນຄະນະບໍລິຫານງານພັກ ນວ ກາງສະໄໝທີ VII ມີຄວາມສໍາຄັນຫຼາຍ ເປັນການເປີດກວ້າງປະຊາທິປະໄຕພາຍໃນພັກ ທັງເປັນໂຕຊີ້ວັດອັນໜຶ່ງຂອງການຊີ້ນໍາ-ນຳພາ ທົ່ວ ນວ ເພື່ອພ້ອມກັນທົບທວນຄືນການນໍາພາ-ຊີ້ນຳຂອງຄະນະບໍລິຫານງານພັກ ນວ ພ້ອມນັ້ນການລົງຄະແນນສຽງທາບທາມໃຫ້ເອົາໃຈໃສ່ຫຼີກເວັ້ນແນວຄິດອັກຄະຕິຕໍ່ບຸກຄົນ ການພົວພັນສ່ວນຕົວ ໃຫ້ລົງເລິກປະກອບຄຳເຫັນໃນຄະນະພັກດ້ວຍຄວາມຈິງໃຈ ເພື່ອຊ່ວຍປັບປຸງກໍ່ສ້າງພະນັກງານນຳພາ-ຄຸ້ມຄອງຂັ້ນຂອງຕົນ ແລະ ເຊື່ອໝັ້ນວ່າ ບັນດາສະຫາຍ ຜູ້ແທນກອງປະຊຸມຈະໃຊ້ສິດຂອງຕົນຢ່າງຖືກຕ້ອງ ແລະ ມີຄວາມຮັບຜິດຊອບສູງຕໍ່ພັກຕໍ່ການ ຈັດຕັ້ງ ແລະ ຕໍ່ຜົນປະໂຫຍດລວມຂອງພັກ ຂອງປະຊາຊົນ.
ກອງປະຊຸມຄັ້ງນີ້ຈະດໍາເນີນໄປຮອດວັນທີ 15 ມິຖຸນາ 2023.
(ຂ່າວ-ພາບ: ວຽງຈັນໃໝ່)
