ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ໄດ້ລົງຢ້ຽມຢາມຕິດຕາມໂຄງການກໍ່ສ້າງ ຂົວຂ້າມນ້ຳຂອງມິດຕະພາບ ລາວ-ໄທ ແຫ່ງທີ 5 (ບໍລິຄຳໄຊ-ບຶງການ) ໃນວັນທີ 12 ມິຖຸນາ ຜ່ານມາ ໂດຍມີທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີຂະແໜງການທີ່ກ່ຽວຂ້ອງຮ່ວມພາທາງ.
ທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງ ຂົວຂ້າມນ້ຳຂອງມິດຕະພາບ ລາວ-ໄທ ແຫ່ງທີ 5 (ບໍລິຄຳໄຊ-ບຶງການ) ຝ່າຍລາວ ໄດ້ລາຍງານສະພາບໂດຍລວມ ຕະຫຼອດໄລຍະການກໍ່ສ້າງຜ່ານມາ ຊຶ່ງທ່ານໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ. ການສຳຫຼວດ, ອອກແບບ ໄດ້ເລີ່ມແຕ່ປີ 2014, ສໍາເລັດ ໃນປີ 2016 ແລະ ໄດ້ຮັບຮອງຈາກລັດຖະບານ 2 ຝ່າຍໃນປີ 2018.
ຈຸດທີ່ຕັ້ງຂອງໂຄງການກໍ່ສ້າງຂົວບໍລິຄຳໄຊ-ບຶງການ ແມ່ນຕັ້ງຢູ່ເຂດບ້ານກ້ວຍອຸດົມ ເມືອງປາກຊັນ ແຂວງບໍລິຄຳໄຊ ຫ່າງຈາກເທດສະບານ ແຂວງບໍລິຄຳໄຊ ມາທາງທິດເໜືອຕາມທາງເລກ 13 ໃຕ້ປະມານ 10 ກິໂລແມັດ ແລະ ຫ່າງຈາກທາງເລກ 13 ໃຕ້ເຂົ້າໄປຫານໍ້າຂອງປະມານ 2.775 ແມັດ, ໂຄງການກໍ່ສ້າງໄດ້ເລີ່ມລົງມື ແຕ່ວັນທີ 4 ມັງກອນ 2021 ເປັນຕົ້ນມາ. ໂຄງການດັ່ງກ່າວ, ໄດ້ຮັບເງິນກູ້ຢືມດອກເບ້ຍຜ່ອນຜັນຈາກອົງການ NEDA ປະເທດໄທ ໃນມູນຄ່າທັງໝົດ 1.380,067 ລ້ານບາດ (ສະກຸນເງິນໄທ), ໄດ້ແບ່ງອອກເປັນສອງສັນຍາຄື: ສັນຍາທີ 1 ແມ່ນສັນຍາກໍ່ສ້າງຂົວຂ້າມນໍ້າຂອງ ລວງຍາວ 535 ແມັດ ໂດຍແມ່ນບໍລິສັດ ນະພາ ກໍ່ສ້າງ ຈໍາກັດ (ຜູ້ຮັບເໝົາຫຼັກ) ບໍລິສັດ SIAM BBR ຮ່ວມກັບ ບໍລິສັດ VK International ຈຳກັດ ຜູ້ດຽວ (ຄູ່ຮ່ວມສັນຍາ) ມູນຄ່າສັນຍາ 379.197.622,7 ບາດ ແລະ ສັນຍາທີ 2 ແມ່ນສັນຍາກໍ່ສ້າງທາງເຂົ້າຂົວ ແລະ ກໍ່ສ້າງອາຄານດ່ານກວດຄົນເຂົ້າ-ອອກເມືອງ ຮັບເໝົາໂດຍ ບໍລິສັດ ສະຫຼວງ ກໍ່ສ້າງ ຈຳກັດ ຮ່ວມກັບ ບໍລິສັດ ກໍ່ສ້າງວິສະວະກຳ ສາກົນ ທັນສະໃໝ ຈຳກັດ (AIEC) ມູນຄ່າສັນຍາ 773.180.000 ບາດ. ຂົວມີລວງຍາວທັງໝົດ 1.350 ແມັດ, ປະເພດແຂວນ (Extradosed Prestressed Concrete Bridge) ຊ່ວງຍາວ, ສ່ວນຊ່ວງສັ້ນເປັນປະເພດຂົວເບຕົງອັດແຮງ (Prestressed Concrete Bridge), ຊ່ວງຂົວກາງນ້ຳ ມີ 9 ຊ່ວງ, ມີລວງຍາວທັງໝົດ 810 ແມັດ, ໃນນັ້ນ, ຮັບຜິດຊອບ ຝ່າຍລະ 4 ຊ່ວງ ສ່ວນຊ່ວງກາງ ແມ່ນຮັບຜິດຊອບຮ່ວມກັນສອງຝ່າຍ, ປັດຈຸບັນສຳເລັດຈ່າຍຄ່າຊົດເຊີຍຜົນກະທົບເນື້ອທີ່ທຳການຜະລິດຂອງປະຊາຊົນທີ່ນອນໃນໂຄງການ 52 ກວ່າເຮັກຕາ ມູນຄ່າ 5 ຕື້ກວ່າກີບ. ສຳລັບການກໍ່ສ້າງໂຄງການສັນຍາ 1 ຄືການກໍ່ສ້າງສ້າງຂົວສໍາເລັດແລ້ວ 60%, ສັນຍາ 2 ການກໍ່ສ້າງທາງເຂົ້າຂົວ ແລະ ກໍ່ສ້າງອາຄານດ່ານກວດຄົນເຂົ້າ-ອອກເມືອງສຳເລັດແລ້ວ 89% ລວມສອງສັນຍາ 70% ຄາດວ່າຈະໃຫ້ໄດ້ເປີດນໍ້າໃຊ້ໃນຕົ້ນປີ 2024.
(ຂ່າວ-ພາບ: ສາຍສະໝອນ)
