ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຮ່ວມກັບຄະນະຮັບຜິດຊອບການຄົ້ນຄວ້າ ແນວຄິດໄກສອນ ພົມວິຫານ, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດກອງປະຊຸມສຳມະນາ ວິທະຍາສາດ ພາຍໃຕ້ຫົວຂໍ້: “ແນວຄິດໄກສອນ ພົມວິຫານ ກ່ຽວກັບວຽກງານຖະແຫຼງຂ່າວ” ຂຶ້ນໃນວັນທີ 13 ມິຖຸນາ ນີ້ ທີ່ຫໍວັດທະນະທຳແຫ່ງຊາດ ໂດຍການເປັນປະທານຮ່ວມຂອງທ່ານ ສົມສະຫວາດ ເລັ່ງສະຫວັດ ທີ່ປຶກສາສະພາທິດສະສູນກາງພັກແທີ່ປຶກສາຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ ແລະ ທ່ານ ພູວົງ ອຸ່ນຄຳແສນ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຮອງປະທານສະພາທິດ ສະດີສູນກາງພັກ, ຮອງຫົວໜ້າ, ຜູ້ປະຈຳການຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ, ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ, ມີບັນດາຄະນະພັກ, ຄະນະນຳ, ນັກຄົ້ນຄວ້າ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອຮັບຟັງການລາຍງານຜົນການຄົ້ນຄວ້າຈາກນັກວິທະຍາສາດ ແລະ ລະດົມ ຄວາມຄິດເຫັນຂອງບັນດາຜູ້ເຂົ້າຮ່ວມກອງປະຊຸມເພື່ອປະກອບໃສ່ບົດວິທະຍາສາດ ໃຫ້ມີຄວາມອຸດົມສົມບູນຍິ່ງ ຂຶ້ນ ແລະ ຮັບປະກັນລັກສະນະວິທະຍາສາດ.
ໃນໂອກາດນີ້, ທ່ານ ສົມສະຫວາດ ເລັ່ງສະຫວັດ ໄດ້ເນັ້ນໜັກບາງບັນຫາວ່າ: ກອງປະຊຸມຄັ້ງນີ້ມີຄວາມ ໝາຍສໍາຄັນທັງໃນດ້ານທິດສະດີ ແລະ ພຶດຕິກຳ, ເປັນປະໂຫຍດໃຫຍ່ຫຼວງຕິດແທດຕົວຈິງໃນການຮໍ່າຮຽນເອົາແບບແຜນການຊີ້ນຳ-ນຳພາ, ຜົນງານການປະກອບສ່ວນເຂົ້າໃນການເພີ່ມພູນຄູນສ້າງຄັງທິດສະດີ-ພຶດຕິກໍາ ຂອງພັກເຮົາ ເພື່ອເປັນພື້ນຖານຮັບໃຊ້ໃຫ້ແກ່ການປັບປຸງ, ບູລະນະແນວທາງນະໂຍບາຍຂອງພັກ ແລະ ລັດ, ເປັນການສຶກສາອົບຮົມພະນັກງານ, ສະມາຊິກພັກເພື່ອຮັບໃຊ້ໃນວຽກງານຖະແຫຼງຂ່າວໂຄສະນາໃຫ້ສົມບູນຍິ່ງໆຂຶ້ນ. ພ້ອມນັ້ນ, ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ຍັງໄດ້ຍົກໃຫ້ເຫັນບົດບາດ
ຄວາມສຳຄັນຂອງວຽກງານຖະແຫຼງຂ່າວ ຊຶ່ງຂົງເຂດດັ່ງກ່າວໄດ້ກາຍເປັນພາຫະນະທີ່ສຳຄັນໃນການຫັນປ່ຽນ ຈາກສະພາບແນວຄິດດັ່ງເດີມຂອງປະຊາຊົນ ແລະ ຕ້ານກົນອຸບາຍອັນເລິກແລບຂອງອິດທິກຳລັງປໍລະປັກທີ່ ຫວັງດຶງດູດເອົາປະຊາຊົນເປັນຂໍກຸນແຈຫຼັກໃນການເຄື່ອນໄຫວມ້າງເພທຳລາຍລະບອບໃໝ່ຂອງລາວ. ວຽກງານຖະແຫຼງຂ່າວ ມີບົດບາດສໍາຄັນໃນການສຶກສາອົບຮົມແນວຄິດ, ສ້າງຄວາມສາມັກຄີປອງດອງ ທົ່ວປວງຊົນທັງຊາດ, ເສີມຂະຫຍາຍປະຊາທິປະໄຕ, ສ້າງທັດສະນະຫຼັກໝັ້ນ ແລະ ຄວາມເຊື່ອໝັ້ນຕໍ່ການນຳພາ ຂອງພັກ, ໂຄສະນາປຸກລະດົມ, ຊຸກຍູ້ການສ້າງເສດຖະກິດ-ສັງຄົມຂອງປະເທດເຮົາ, ປຸກລະດົມທົ່ວປວງຊົນເຮັດໜ້າທີ່ປ້ອງກັນຊາດ, ປ້ອງກັນຄວາມສະຫງົບ, ຕ້ານປະກົດການຫຍໍ້ທໍ້ທີ່ເກີດຂຶ້ນ ແລະ ອື່ນໆ.
ກອງປະຊຸມໄດ້ຮັບຟັງການນໍາສະເໜີ 6 ຫົວຂໍ້ຍ່ອຍຄື: ແນວຄິດໄກສອນ ພົມວິຫານ ກ່ຽວກັບວຽກງານ ໂຄສະນາໃນສະໄໝຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ, ແນວຄິດໄກສອນ ພົມວິຫານ ກ່ຽວກັບວຽກງານໂຄສະ ນາ, ຖະແຫຼງຂ່າວ ແລະ ສື່ມວນຊົນໃນໄລຍະປົກປັກສາ ແລະ ສ້າງສາປະເທດຊາດ; ແນວຄິດໄກສອນ ພົມວິ ຫານກ່ຽວກັບການກໍ່ສ້າງຖັນແຖວພະນັກງານຖະແຫຼງຂ່າວ; ແນວຄິດໄກສອນ ພົມວິຫານ ກ່ຽວກັບວິທີຜະລິດເນື້ອ ໃນໂຄສະນາ; ແນວຄິດໄກສອນ ພົມວິຫານ ກ່ຽວກັບການນຳພາ-ຊີ້ນຳຂອງພັກຕໍ່ວຽກງານສື່ມວນຊົນ; ແນວຄິດໄກ ສອນ ພົມວິຫານ ກ່ຽວກັບການນຳໃຊ້ພາຫະນະທັນສະໄໝເຂົ້າໃນວຽກງານໂຄສະນາ.
ຕອນທ້າຍກອງປະຊຸມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຈາກທ່ານ ສົມສະຫວາດ ເລັ່ງສະ ຫວັດ ແລະ ທ່ານ ພູວົງ ອຸ່ນຄຳແສນ ໄດ້ເນັ້ນໜັກໃຫ້ຄະນະພັກທີ່ກ່ຽວຂ້ອງ ຕ້ອງເພີ່ມທະວີການນໍາພາ-ຊີ້ນຳ ບັນດາອົງການ, ຂະແໜງການຮັບຜິດຊອບວຽກງານສື່ມວນຊົນ ໃນການປັບປຸງກົນໄກການຄຸ້ມຄອງພາຫະນະ ແລະ ເຄື່ອງມືໃນການຮັບໃຊ້ໃຫ້ແກ່ການເຄື່ອນໄຫວວຽກງານຂອງຕົນໃຫ້ມີປະສິດທິພາບ ແລະ ມີຄຸນນະພາບ.
(ຂ່າວ-ພາບ: ວັນເພັງ)
