ການຈັດຕັ້ງປະຕິບັດວຽກງານອົງການກວດສອບແຫ່ງລັດ ປີ 2023 ຍັງສືບຕໍ່ພົບຄວາມຫຍຸ້ງຍາກ ແລະ ສິ່ງທ້າທາຍໃນຫຼາຍດ້ານ, ສະພາບການຂອງໂລກ, ພາກພື້ນ ຍັງຈະສືບຕໍ່ເປັນອຸປະສັກ ແລະ ສ້າງຄວາມຫຍຸ້ງຍາກ, ຄວາມຫຍຸ້ງຍາກຂອງເສດຖະກິດ-ການເງິນ ແລະ ງົບປະມານຍັງຈະສືບຕໍ່ແກ່ຍາວ ແລະ ສົ່ງຜົນກະທົບ ຕໍ່ແຜນການເຄື່ອນໄຫວ, ແຕ່ໃນຂະນະດຽວກັນອົງການກວດສອບແຫ່ງລັດ ຈະສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ຕິດພັນກັບແຜນພັດທະນາເສດຖະກິດ-ສັງຄົມແຫ່ງລັດ ຂອງລັດຖະບານ ໂດຍສະເພາະແມ່ນການ ເຄື່ອນໄຫວວຽກງານກວດສອບ ໃຫ້ຕິດພັນກັບ 5 ວຽກຈຸດສຸມຂອງລັດຖະບານ ໃນການແກ້ໄຂຂໍ້ຫຍຸ້ງຍາກ ໃນການແກ້ໄຂເສດຖະກິດ-ການເງິນ ບົນຈິດໃຈຕາມທິດປະຢັດ ຮັບປະກັນປະສິດທິພາບ ແລະ ປະສິດທິຜົນ ຂອງການກວດສອບ ເທື່ອລະກ້າວ.
ທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດໃຫ້ຮູ້ວ່າ: ໃນປີ 2023 ຈະສືບຕໍ່ປັບປຸງກົງຈັກການຈັດຕັ້ງຕາມທິດຂອງລັດຖະບານໄດ້ກຳນົດໄວ້ ໃຫ້ສຳເລັດ, ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ ໂດຍຫັນຄຸນນະພາບນັກກວດສອບ, ສ້າງການຫັນປ່ຽນທີ່ແຂງແຮງ ແລະ ເລິກເຊິ່ງ ກ່ຽວກັບການຍົກສູງຄຸນນະພາບວຽກງານການກວດສອບ ຊຶ່ງກວມເອົາການຍົກສູງຄຸນນະພາບການກວດສອບຢ່າງຮອບດ້ານ, ສ້າງ ແລະ ປັບປຸງນິຕິກຳ ຂອງວຽກງານກວດສອບ ໃຫ້ມີຄວາມຄົບຖ້ວນ ເພື່ອເປັນເຄື່ອງມືໃນການກວດສອບ ແລະ ປະສານສົມທົບແກ້ໄຂຜົນການກວດສອບ ໃຫ້ໄດ້ຮັບຜົນດີເທື່ອລະກ້າວ, ຫັນທິດການກວດສອບໄປສູ່ຄຸນນະພາບ ແລະ ສ້າງຄຸນປະໂຫຍດໃຫ້ແກ່ລາຍຮັບ-ລາຍຈ່າຍງົບປະມານແຫ່ງລັດ, ຫັນການກວດສອບເປັນຫົວຂໍ້ສະເພາະແບບລົງເລິກໃຫ້ໄດ້ຫຼາຍຂຶ້ນເທື່ອລະກ້າວ, ຍູ້ແຮງການກວດສອບຜົນການຈັດຕັ້ງປະຕິບັດ, ຍູ້ແຮງການຫັນເປັນທັນສະໄໝ ວຽກງານບໍລິຫານຄຸ້ມຄອງ ແລະ ວຽກງານກວດສອບ ໃນເງື່ອນໄຂສະພາບການໃໝ່, ຮ່ວມມືກັບສາກົນ, ພາກພື້ນ ແລະ ປະເທດຮ່ວມມືຍຸດທະສາດ ຕາມທິດຊອກຫາແຫຼ່ງທຶນການສະໜັບສະໜູນ ກ່ຽວກັບການກວດສອບຜົນການຈັດຕັ້ງປະຕິບັດ ແລະ ບົດຮຽນການແກ້ໄຂຜົນການກວດສອບ.
ທ່ານກ່າວຕື່ມວ່າ: ໃນປີ 2023 ອົງການກວດສອບແຫ່ງລັດ ຈະສູ້ຊົນປະຕິບັດ 6 ຄາດໝາຍ ຄື:ອີງໃສ່ຄວາມຫຍຸ້ງຍາກທາງດ້ານເສດຖະກິດມະຫາພາກ, ບຸກຄະລາກອນມີຄວາມຈຳກັດ ແລະ ເພື່ອເຮັດໃຫ້ຜົນການກວດສອບມີຄຸນນະພາບ ອົງການກວດສອບແຫ່ງລັດ ຈະສູ້ຊົນດຳເນີນການກວດສອບ ໃຫ້ສຳເລັດ ຈຳນວນ 103 ເປົ້າໝາຍ ໃນນັ້ນ: ຕາມແຜນສະເໜີຫາສະພາແຫ່ງຊາດ 99 ເປົ້າໝາຍ, ສະພາແຫ່ງຊາດ ມອບໃຫ້ 2 ເປົ້າໝາຍ, ກວດສອບຕາມການສະເໜີ 1 ເປົ້າໝາຍ ແລະ ເປົ້າໝາຍເກົ່າ ປີ 2022 ມີ 1 ເປົ້າໝາຍ, ສ້າງບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ເພື່ອລາຍງານຕໍ່ຄະນະປະຈໍາສະພາແຫ່ງຊາດ ຈໍານວນ 2 ຄັ້ງ (ບົດ) ແລະ ກອງປະຊຸມສະໄໝສາມັນສະພາແຫ່ງຊາດ 1 ຄັ້ງ (ບົດ), ສ້າງບົດລາຍງານການເຄື່ອນໄຫວວຽກງານ ປະຈໍາປີ ແລະ ການເຄື່ອນໄຫວວຽກງານ ເຄິ່ງສະໄໝ 2021-2025 ຂອງອົງການກວດສອບແຫ່ງລັດ ຕໍ່ຄະນະປະຈໍາ ສະພາແຫ່ງຊາດ ຈໍານວນ 2 ຄັ້ງ (ບົດ) ແລະ ກອງປະຊຸມສະໄໝສາມັນສະພາແຫ່ງຊາດ 2 ຄັ້ງ (ບົດ), ສ້າງນັກກວດສອບ ຂັ້ນ 1 (ຊຸດທີ 4) ຈໍານວນ 15 ຄົນ ແລະ ນັກກວດສອບ ຂັ້ນ 2 (ຊຸດທີ 1) ຈໍານວນ 5 ຄົນ, ລວມທັງໝົດ ໃຫ້ໄດ້ ຈໍານວນ 20 ຄົນ, ຍົກລະດັບວຽກງານວິຊາສະເພາະ ປະລິນຍາເອກ ຈໍານວນ 1 ທ່ານ ແລະ ປະລິນຍາໂທ ຈໍານວນ 14 ຄົນ, ຍົກລະດັບທິດສະດີ-ການເມືອງ ຈໍານວນ 46 ຄົນ, ວຽກງານບຳລຸງ-ກໍ່ສ້າງ ແລະ ຝຶກອົບຮົມໃຫ້ພະນັກງານ-ນັກກວດສອບ ຈໍານວນ 160 ເທື່ອຄົນ, ໃນນັ້ນ ຝຶກອົບຮົມພາຍໃນ ຈຳນວນ 150 ເທື່ອຄົນ ແລະ ຕ່າງປະເທດ ຈຳນວນ 10 ເທື່ອຄົນ, ສ້າງ ແລະ ປັບປຸງນິຕິກໍາ ໃຫ້ແທດເໝາະກັບຄວາມຮຽກຮ້ອງຕ້ອງການພ້ອມທັງສ້າງ ແລະ ຈັດຕັ້ງຜັນຂະຫຍາຍບົດບັນທຶກຊ່ວຍຈຳວ່າດ້ວຍການຮ່ວມມື ກັບ ບັນດາຂະແໜງການກ່ຽວຂ້ອງ.
ສຳລັບວຽກງານວິຊາສະເພາະຈະດຳເນີນການເຄື່ອນໄຫວວຽກງານກວດສອບ ໃນປີ 2023 ຈໍານວນ 103 ເປົ້າໝາຍ, ໃນນັ້ນ: ກວດສອບອົງການຈັດຕັ້ງລັດ ຈໍານວນ 24 ເປົ້າໝາຍ, ທະນາຄານ ຈໍານວນ 7 ເປົ້າໝາຍ, ລັດວິສາຫະກິດ ຈໍານວນ 11 ເປົ້າໝາຍ, ໂຄງການ ຈໍານວນ 21 ເປົ້າໝາຍ, ອົງການກວດສອບປະຈໍາພາກເໜືອ 1 ແລະ ພາກເໜືອ 2 ຈໍານວນ 15 ເປົ້າໝາຍ, ອົງການກວດສອບປະຈໍາພາກກາງ 1 ແລະ ພາກກາງ 2 ຈໍານວນ 14 ເປົ້າໝາຍ ແລະ ອົງການກວດສອບປະຈໍາພາກໃຕ້ ຈໍານວນ 11 ເປົ້າໝາຍ, ສະຫຼຸບຜົນການກວດສອບ ເຊັ່ນ: ເຊັນບົດບັນທຶກຜົນການກວດສອບ, ອອກຈົດໝາຍແນະນໍາ ແລະ ບົດແຈ້ງຜົນການກວດສອບ ແລະ ສົ່ງບົດສະຫຼຸບຜົນການກວດສອບ ໃຫ້ເປົ້າໝາຍຖືກກວດສອບ ທັນຕາມເວລາທີ່ກໍານົດໄວ້ ໃນກົດໝາຍວ່າດ້ວຍ ການກວດສອບແຫ່ງລັດ ສະບັບປັບປຸງ ປີ 2022, ສ້າງກົນໄກ, ວິທີການ ແລະ ແຜນການຕິດຕາມ, ຊຸກຍູ້ການຈັດຕັ້ງປະຕິບັດຄໍາແນະນໍາແກ້ໄຂຜົນການກວດສອບ ຢ່າງເປັນປົກກະຕິ ແລະ ເປັນລາຍໄຕມາດ, ຊຸກຍູ້, ຕິດຕາມ ແລະ ສ້າງຄວາມເຂົ້າໃຈ ກ່ຽວກັບໃນຄວາມຮັບຜິດຊອບ ຂອງເປົ້າໝາຍຖືກກວດສອບ ທີ່ມີສ່ວນຮ່ວມໃນການແກ້ໄຂຜົນການກວດສອບ, ປະສານສົມທົບ ກັບແຕ່ລະພາກສ່ວນ, ດຳເນີນການຕິດຕາມ ແລະ ປະເມີນ ການແກ້ໄຂໃນແຕ່ລະໄລຍະ ໂດຍການປະສານສົມທົບກັບບັນດາອົງການແຫ່ງສິດອຳນາດທີ່ກ່ຽວຂ້ອງຢ່າງປົກກະຕິກົມກຽວ.
ໂດຍ: ສຳນານ ພົມພັກດີ
