ຄະນະນັກຮຽນລາວ 100 ກວ່າຄົນ ໄດ້ສໍາເລັດກິດຈະກໍາສະເຫຼີມສະຫຼອງວັນເດັກນ້ອຍສາກົນ ພາຍໃຕ້ຫົວຂໍ້ “ຂໍ້ລິເລີ່ມ ໜຶ່ງແລວທາງ ໜຶ່ງເສັ້ນທາງ ເຊື່ອມໂຍງ ເຊື່ອມຈອດ ປະຊາຊົນສອງຊາດ” ຮ່ວມໃຈກັນຈັບມື ລະຫວ່າງນັກຮຽນລາວ-ຈີນ ແລະ ທັດສະນະສຶກສາ ທີ່ ສປ ຈີນ ພາຍຫຼັງໄດ້ດໍາເນີນມາແຕ່ວັນທີ 23 ພຶດສະພາ 2023.
ພິທີປິດໄດ້ມີຂຶ້ນໃນວັນທີ 6 ມິຖຸນາ ຜ່ານມາ ທີ່ໂຮງຮຽນປະຖົມສາທິດ ອູຢວນ ເມືອງເຊ້ຍເໝິນ ແຂວງຟູຈ້ຽນ ສປ ຈີນ ໂດຍເປັນກຽດເຂົ້າຮ່ວມຂອງທ່ານ ສີສະໝຸດ ແສນບຸດຕະລາດ ຫົວໜ້າຄະນະນໍາພາ, ຮອງຫົວໜ້າກົມຮ່ວມມືກັບຕ່າງປະເທດ ກະຊວງສຶກສາທິການ ແລະ ກິລາ ແລະ ທ່ານ ຫຼິງ ເຫວີຍ ຮອງປະທານສະຫະພັນເພື່ອການກຸສົນ ສປ ຈີນ, ພ້ອມດ້ວຍຄະນະຜູ້ແທນລາວ-ຈີນ, ຜູ້ອໍານວຍການໂຮງຮຽນ, ຄູ ແລະ ນັກຮຽນ.
ກິດຈະກໍາດັ່ງກ່າວ, ແມ່ນກິດຈະກໍາຮ່ວມລະຫວ່າງ ສະຫະພັນເພື່ອການກຸສົນແຫ່ງ ສປ ຈີນ ແລະ ກະຊວງສຶກສາທິການ ແລະ ກິລາ ສປປ ລາວ ເພື່ອເປັນການຮັດແໜ້ນສາຍພົວພັນທາງການທູດ ແລະ ການຮ່ວມມືຂອງສອງພັກ-ສອງລັດ ແລະ ປະຊາຊົນ ສອງຊາດ ລາວ-ຈີນ ພາຍໃຕ້ໂຄງການ ໜຶ່ງແລວທາງ ໜຶ່ງເສັ້ນທາງ ທັງເປັນການສົ່ງເສີມເຍົາວະຊົນລາວໄດ້ແລກປ່ຽນວັດທະນະທໍາກັບເຍົາວະຊົນຈີນ ແລະ ຮຽນຮູ້ບົດຮຽນອັນດີໃນການພັດທະນາຊັບພະຍາກອນມະນຸດຂອງ ສປ ຈີນ. ນອກຈາກນັ້ນ, ຄະນະຮັບຜິດຊອບ ແລະ ຄູອາຈານນໍາພາ ຈະໄດ້ຮຽນຮູ້ບົດຮຽນໃນການສ້າງສາພັດທະນາປະເທດຊາດຂອງ ສປ ຈີນ ໃນແຕ່ລະໄລຍະ ພ້ອມທັງແລກປ່ຽນບົດຮຽນ ແລະ ປະສົບການໃນພັດທະນາຊັບພະຍາກອນມະນຸດ ເພື່ອນໍາໄປໝູນໃຊ້ເຂົ້າໃນວຽກງານຂອງຕົນໃຫ້ມີມີຄຸນນະພາບ ແລະ ປະສິດທິພາບ.
ຕະຫຼອດໄລຍະ 15 ວັນ ນັກຮຽນໄດ້ເຮັດກິດຈະກໍາຈັບມືີກັບນັກຮຽນຈີນຢູ່ໂຮງຮຽນປະຖົມຢົນຊ່ຽງຮຸ່ງ ກິ່ງແຂວງສິບສອງພັນນາ, ໂຮງຮຽນປະຖົມຈົງຮວາ ນະຄອນຄຸນໝິງ ແຂວງຢຸນນານ, ໂຮງຮຽນປະຖົມປັກກິ່ງປາອີ່ ຫຼື ໂຮງຮຽນແປດໜຶ່ງ ຢູ່ນະຄອນຫຼວງປັກກິ່ງ, ໂຮງຮຽນປະຖົມເຂດພັດທະນາເສດຖະກິດຊີອານ ແຂວງຊານຊີ ແລະ ໂຮງຮຽນປະຖົມສາທິດ ອູຢວນ ເມືອງເຊ້ຍເໝິນ ແຂວງຟູຈ້ຽນ ສປ ຈີນ ເພື່ອສ້າງຄວາມຮູ້ຈັກຮັກແພງ, ແລກປ່ຽນວັດທະນະທໍາ ແລະ ຄວາມສາມັກຄີກັນລະຫວ່າງນັກຮຽນສອງຊາດລາວ-ຈີນ. ນອກຈາກນັ້ນ, ຍັງໄດຮ່ວມເຮັດກິດຈະກໍາ ແລະ ທັດສະນະສຶກສາຫຼາຍແຫ່ງ ເຊັ່ນ: ທັດສະນະສຶກສາຢູ່ຟາມປູກຫຍ້າຫວານ-ລ້ຽງສັດ ສິບສອງພັນນາ, ສວນປາສະຫງວນສິບສອງພັນນາ, ພະລາດຊະວັງບູຮານກູກົ່ວ, ມະຫາວິທະຍາໄລຊິງຫົວ, ສະໜາມຫຼວງທຽນອານເໝິນ, ກໍາແພງເມືອງຈີນ, ຫໍພິພິທະພັນວິທະຍາສາດ, ຫໍພິພິທະພັນສຸສານທະຫານຈີນຊີຮ່ອງເຕ້, ປັ້ນຫຸ່ນທະຫານດ້ວຍດິນໜຽວ, ຢ້ຽມຊົມຫໍພິພິທະພັນຊີອານ, ເລາະຊົມກໍາແພງເມືອງຊີອານ, ຢ້ຽມຊົມສະຖາບັນຝຶກອົບຮົມຫຸ່ນກະບອກໄມ້, ຮັບຊົມການສະແດງລະຄອນຕຸກກະຕາ, ລະບາຍສີຕຸກກະຕາຫຸ່ນກະບອກໄມ້, ຢ້ຽມຊົມເກາະກູ່ລ່າງຫຍູ ແລະ ຫໍພິພິທະພັນສັດນໍ້າ ທີ່ເຕັມໄປດ້ວຍຄວາມຕື່ນເຕັ້ນ ແລະ ເບີກບານມ່ວນຊື່ນ.
ໃນວັນດຽວກັນນີ້, ນັກຮຽນລາວຍັງໄດ້ຮ່ວມກິດຈະກໍາຈັບມືກັບນັກຮຽນປະຖົມສາທິດ ອູຢວນ ແລະ ເຮັດກິດຈະກໍາຮ່ວມກັນຫຼາຍຢ່າງ ເປັນຕົ້ນແມ່ນ ກິດຈະກໍາແຕ້ມຮູບລະບາຍສີ, ຕັດເຈ້ຍເປັນຮູບພາບ, ປະກອບຍານອາວະກາດຈໍາລອງ ແລະ ກິດຈະກໍາລົດບັງຄັບ. ນອກຈາກນັ້ນ, ໃນພີທີ ນາງ ນິບພາພອນ ໜໍ່ຈະເລີນ ຕາງໜ້ານັກຮຽນລາວໄດ້ອ່ານຈົດໝາຍເຖິງ ທ່ານ ສີຈິ້ນຜິງ ປະທານປະເທດແຫ່ງ ສປ ຈີນ. ພ້ອມກັນນັ້ນ, ນັກຮຽນລາວ 100 ກວ່າຄົນ ທີ່ເຂົ້າຮ່ວມກິດຈະກຳຄັ້ງນີ້ ຍັງໄດ້ຮັບໃບຢັ້ງຢືນກຽດຕິຍົດນໍາອີກ.
ໂດຍ: ນໍ້າອ້ອຍ ເພັດລໍາພອນ
