ກະຊວງແຮງງານ ແລະ ສະຫວັດດີການສັງຄົມ, ແນະນຳແຜນງານກິດຈະກຳການຊ່ວຍເຫຼືີອຜູ້ດ້ອຍໂອກາດ, ທີ່ບໍ່ສາມາດເຂົ້າເຖິງການຄໍ້າປະກັນສະບຽງອາຫານ ໃນວັນທີ 9 ມິຖຸນາ ນີ້ ທີ່ນະຄອນຫຼວງວຽງຈັນ; ເປັນກຽດໃນພິທີ ມີທ່ານ ພູທອນ ເມືອງປາກ ປະທານອົງການກາແດງລາວ, ທ່ານ ຢານ ເດວບາເຣີ ຜູ້ອຳນວຍການ ແລະ ຜູ້ຕາງໜ້າອົງການອາຫານໂລກ ປະຈຳລາວ, ທ່ານ ລີປ່າວ ຢ່າງ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ທ່ານ ລີປ່າວ ຢ່າງ ກ່າວວ່າ: ໃນໄລຍະ 2-3 ປີ ຜ່ານມາ ສປປ ລາວ ເປັນປະເທດໜຶ່ງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ໄພພິບັດທາງທຳມະຊາດ ໄດ້ສົ່ງຜົນກະທົບຕໍ່ການພັດທະນາທາງດ້ານເສດຖະກິດ ກໍຄືການດຳລົງຊີວິດຂອງປະຊາຊົນທີ່ມີອາຊີບໃນການທຳການຜະລິດ, ເຮັດໃຫ້ຜົນຜະລິດບໍ່ໄດ້ຮັບໝາກຜົນຕາມແຜນທີ່ຄາດຄະເນ ພ້ອມກັນນີ້ ຄວາມຫຍຸ້ງຍາກທາງດ້ານເສດ ຖະກິດ-ການເງິນ, ອັດຕາເງິນເຟີ້ຕ່າງໆໄດ້ສົ່ງຜົນສະທ້ອນເຮັດໃຫ້ປະຊາຊົນຈຳນວນໜຶ່ງຍັງສືບຕໍ່ປະເຊີນກັບຄວາມຂາດແຄນທາງດ້ານສະບຽງອາຫານທີ່ຈໍາເປັນສໍາລັບການດຳລົງຊີວິດປະຈຳວັນ. ສະນັ້ນ ກະຊວງ ຮສສ ໃນຖານະເປັນຈຸດໃຈກາງຂອງລັດຖະບານ, ໃນການປະສານສົມທົບພາກສ່ວນຕ່າງໆເພື່ອເຮັດໜ້າທີ່ລະດົມການຊ່ວຍເຫຼືອບັນເທົາທຸກສຸກເສີນ, ນໍາໄປຊ່ວຍເຫຼືອເປົ້າໝາຍທີ່ທຸກຍາກດ້ອຍໂອກາດ, ຈຶ່ງໄດ້ສົມ ທົບກັບອົງການອາຫານໂລກຊ່ວຍເຫຼືອພິຈາລະນາການລະດົມທຶນ, ໂດຍອົງການອາຫານໂລກ ສາມາດຊ່ວຍເຫຼືອເຂົ້າກິນ 900 ໂຕນ (ເຂົ້າຈ້າວ) ໃນນີ້ ນຳໃຊ້ຈາກໂຄງການຄັງແຮສຸກເສີນທີ່ມີໂຄງການຮ່ວມກັນ 400 ໂຕນ (ໂດຍລັດຖະບານ ສ ເກົາຫຼີ ໃຫ້ການສະໜັບສະໜູນ) ແລະ 500 ໂຕນຈາກການລະດົມທຶນ ຊຶ່ງການຊ່ວຍເຫຼືອໃນຄັ້ງນີ້ ຈະໄດ້ຈັດຕັ້ງປະຕິບັດຢູ່ 4 ແຂວງ ຄື: ຫຼວງນໍ້າທາ ອຸດົມໄຊ, ສາລະວັນ ແລະ ແຂວງເຊກອງ. ໂດຍຈະເລີ່ມແຈກເຂົ້າໃນເດືອນກໍລະກົດ ຫາ ເດືອນກັນຍາ 2023, ໂດຍມອບໃຫ້ອົງການກາແດງລາວເປັນຜູ້ແຈກຢາຍຕາມເປົ້າໝາຍທີ່ຄະນະກຳມະການຮັບຜິດຊອບໂຄງການໄດ້ຄັດເລືອກຮ່ວມກັນ, ຄາດວ່າ ຈະມີຜູ້ໄດ້ຮັບຜົນປະໂຫຍດ 180.000 ຄົນ ການຊ່ວຍເຫຼືອດ້ານສະບຽງອາຫານຄັ້ງນີ້ ຈະຊ່ວຍໃຫ້ຫຼຸດຊ່ອງວ່າງໃນການຂາດອາຫານແກ່ຄອບຄົວທີ່ມີຄວາມສ່ຽງສູງໂດຍສະເພາະໃນລະດູຝົນ ຫຼື ລະດູຂາດແຄນອາຫານ, ເນື່ອງຈາກເຂົ້າທີ່ສະສົມໄວ້ບໍ່ພຽງພໍທີ່ຈະຊ່ວຍໃຫ້ຮອດລະດູການເກັບກ່ຽວຊ່ວຍໃຫ້ບັນດາຄອບຄົວຮັບມືກັບຄ່າໃຊ້ຈ່າຍໃນການດໍາລົງຊີວິດ.
ທ່ານ ພູທອນ ເມືອງປາກ ກ່າວວ່າ: ອົງການກາແດງແຫ່ຊາດລາວໄດ້ຮັບໜ້າທີ່ມອບໝາຍຈາກລັດຖະບານ ໃນການຕອບໂຕ້ຕໍ່ສິ່ງທ້າທາຍດ້ານມະນຸດສະທຳທີ່ເກີດຂຶ້ນກັບປະຊາຊົນຊຶ່ງການຕອບສະໜອງຄວາມຕ້ອງການອາຫານອັນຮີບດ່ວນຂອງປະຊາຊົນທີ່ໄດ້ຮັບຜົນກະທົບ. ສະນັ້ນ, ການຈັດຕັ້ງປະຕິບັດໂຄງການ, ຈະເອົາໃຈໃສ່ເຮັດວຽກຢ່າງໃກ້ຊິດກັບເຈົ້າໜ້າທີ່ຂັ້ນແຂວງ ແລະ ທ້ອງຖິ່ນໃນການຈົດທະບຽນຄອບຄົວທີ່ມີສິດໃນການຮັບການຊ່ວຍເຫຼືອ ແລະ ຈະນຳເອົາການຊ່ວຍເຫຼືອຄັ້ງນີ້ ໄປແຈກຢາຍໃຫ້ທັນຕາມກຳນົດເວລາ.
ໂອກາດນີ້, ທ່ານ ຢານ ເດວບາເຣີ ກ່າວວ່າ: ໃນຖານະເປັນອົງການມະນຸດສະທໍາທີ່ໃຫຍ່ທີ່ສຸດໃນໂລກ ປັດຈຸບັນ 60% ຂອງປະຊາຊົນລາວກຳລັງຫາທຸກວິທີທາງໃນການຮັບມືເພື່ອຫາລາຍຮັບເພື່ອມາຈຸນເຈືອຄອບຄົວ ໃນນີ້ 40% ແມ່ນມາຈາກເງິນໃນບັນຊີຝາກປະຢັດ ແລະ 19% ແມ່ນເງິນກູ້ຢືມເພື່ອມາຊື້ ອາຫານ ໃນນີ້ 16% ຂອງປະຊາກອນໃນເຂດຊົນນະບົດ ແມ່ນປະເຊີນກັບບັນຫາຄວາມບໍ່ໝັ້ນຄົງດ້ານອາຫານ, ມີຄວາມຕ້ອງການສະໜັບສະໜູນຈາກຂະແໜງການຕ່າງໆ ດັ່ງນັ້ນ, ຈຶ່ງໄດ້ຮ່ວມກັບຫຼາຍພາກ ສ່ວນເພື່ອຊ່ວຍໃຫ້ພວກເຂົາເຈົ້າສາມາດກັບມາລຸກຂຶ້ນຢືນໄດ້ອີກຄັ້ງຫຼັງຈາກປະເຊີນກັບສິ່ງທ້າທາຍໃນໄລຍະທີ່ຜ່ານມາກ່ອນທີ່ເສດຖະກິດຂອງປະເທດຈະກັບມາຟື້ນໂຕອີກຄັ້ງໜຶ່ງ.
(ຂ່າວ-ພາບ: ແສງຈັນ)
