ອັດຕາເງິນເຟີ້ ຂອງ ສປປ ລາວ ໃນເດືອນພຶດສະພາ 2023 ເພີ່ມຂຶ້ນ 38,9% ເມື່ອທຽບໃສ່ເດືອນດຽວກັນຂອງປີຜ່ານມາ, ແຕ່ຖ້າທຽບໃສ່ເດືອນເມສາ 2023 ຫຼຸດລົງເລັກນ້ອຍ ຊຶ່ງສັງເກດເຫັນວ່າຈັງຫວະການເພີ່ມຂຶ້ນຂອງລາຄາສິນຄ້າ ແລະ ບໍລິການເພີ່ມຂຶ້ນຢູ່ໃນທ່າອ່ຽງຕ່ໍາລົງເລັກນ້ອຍເມື່ອທຽບໃສ່ ເດືອນເມສາຜ່ານມາ.
ອີງຕາມບົດລາຍງານຂອງສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ປະຈຳເດືອນພຶດສະພາ 2023 ໃຫ້ຮູວ່າ: ດັດຊະນີລາຄາສິນຄ້າໂດຍລວມຂອງເດືອນພຶດສະພາ ຢູ່ໃນລະດັບ 182,29 ຊຶ່ງເພີ່ມຂຶ້ນຈາກ 131,28 ໃນເດືອນພຶດສະພາປີຜ່ານມາ ເຮັດໃຫ້ອັດຕາເງິນເຟີ້ລວມຂອງ ສປປ ລາວ ໃນເດືອນພຶດສະພາ 2023 ຢູ່ໃນລະດັບ 38,9%. ສັງເກດເຫັນວ່າ ຈັງຫວະການເພີ່ມຂຶ້ນຂອງລາຄາສິນຄ້າ ແລະ ບໍລິການ ຢູ່ໃນທ່າອ່ຽງຕ່ໍາລົງເລັກນ້ອຍເມື່ອທຽບໃສ່ ເດືອນເມສາຜ່ານມາ (ເດືອນເມສາ 2023 ຢູ່ໃນລະດັບ 39,9%). ໝວດສິນຄ້າທີ່ມີອັດຕາເງິນເຟີ້ສູງກວ່າໝູ່ແມ່ນ ໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນ 52,7%, ໝວດຮັກສາສຸຂະພາບ ແລະ ຢາ ເພີ່ມຂຶ້ນ 40,8%, ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 38,7%, ໝວດເຄື່ອງໃຊ້ໃນເຮືອນ ເພີ່ມຂຶ້ນ 35,6%, ໝວດເຄື່ອງນຸ່ງຫົ່ມ ແລະ ເກີບ ເພີ່ມຂຶ້ນ 28,3%, ໝວດເຫຼົ້າ ແລະ ຢາສູບ ເພີ່ມຂຶ້ນ 26,4%, ໝວດທີ່ພັກອາໄສ, ນ້ໍາປະປາ, ໄຟຟ້າ ແລະ ເຊື້ອເພີງຫຸງຕົ້ມ ເພີ່ມຂຶ້ນ 25,2%, ຄົມມະນາຄົມ ແລະ ຂົນສົ່ງ ເພີ່ມຂຶ້ນ 24,7%.
ພ້ອມກັນນັ້ນ, ເມື່ອທຽບລາຄາສິນຄ້າກັບເດືອນຜ່ານມາເຫັນວ່າລາຄາຍັງສືບຕໍ່ເພີ່ມຂຶ້ນ ຊຶ່ງເພີ່ມຂຶ້ນ 2,4%. ໃນນັ້ນ, ໝວດເຄື່ອງນຸ່ງຫົ່ມ ແລະ ເກີບ ເພີ່ມຂຶ້ນ 5,87%, ພົ້ນເດັ່ນແມ່ນການເພີ່ມຂຶ້ນຂອງເຄື່ອງນຸ່ງ ເຊັ່ນ: ເສື້ອເຊີດ ແອໂລແຂນສັ້ນ ເພີ່ມຈາກ 87.563 ກີບ/ຜືນ ໃນເດືອນເມສາ 2023 ມາເປັນ ມາເປັນ 91.111 ກີບ/ຜືນ ໃນເດືອນ ພຶດສະພາ 2023, ເສື້ອເຊີດແອໂລແຂນຍາວ ເພີ່ມຈາກ 110.228 ກີບ/ຜືນ ມາເປັນ 114.906 ກີບ/ຜືນ ແລະ ເສື້ອຢືດມີຄໍ ເພີ່ມຈາກ 72.800 ກີບ/ຜືນ ມາເປັນ 76.495 ກີບ/ຜືນ.
ໝວດອາຫານ ແລະ ເຄື່ອງດື່ມທີ່ບໍ່ແມ່ນເຫຼົ້າ ເພີ່ມຂຶ້ນ 3,54% ພົ້ນເດັ່ນແມ່ນ ລາຄາເຂົ້າສານ ໜຽວເພີ່ມຈາກ 14.838 ກີບ/ກິໂລ ມາເປັນ 15.064 ກີບ/ກິໂລ, ເຂົ້າສານຈ້າວ ເພີ່ມຈາກ 15.287 ກີບ/ກິໂລ ມາເປັນ 16.071 ກີບ/ກິໂລ, ຊິ້ນໝູ ເພີ່ມຈາກ 78.449 ກີບ/ກິໂລ ມາເປັນ 79.627 ກີບ/ກິໂລ, ລາຄາຊີ້ນງົວປະເພດ 1 ເພີ່ມຈາກ 108.221 ກີບ/ກິໂລ ມາເປັນ 109.847 ກີບ/ກິໂລ, ໄກ່ ພັນປອກເພີ່ມຈາກ 65.255 ກີບ/ໂຕ ມາເປັນ 65.315 ກີບ/ໂຕ, ປານິນລ້ຽງກໍເພີ່ມຂຶ້ນ. ໝວດເຄື່ອງໃຊ້ໃນເຮືອນເພີ່ມຂຶ້ນ 2,47% ພົ້ນເດັ່ນແມ່ນການເພີ່ມຂຶ້ນຂອງ ແອເຢັນ ເພີ່ມຈາກ 4.880.378 ມາເປັນ 5.161.370 ກີບ/ໜ່ວຍ, ຕູ້ເຢັນເພີ່ມຈາກ 2.335.342 ກີບ/ໜ່ວຍ ມາເປັນ 2.397.747 ກີບ/ໜ່ວຍ, ແຟັບຊັກເຄື່ອງ ເພີ່ມຈາກ 67.934 ກີບ/ຖົງ ມາເປັນ 69.093 ກີບ/ຖົງ.
ບົດລາຍງານດັ່ງກ່າວ ຍັງໃຫ້ຮູ້ວ່າ: ອັດຕາເງິນເຟີ້ພື້ນຖານ ຫຼື ດັດຊະນີລາຄາການຊົມໃຊ້ພື້ນຖານ ແມ່ນໄດ້ຄິດໄລ່ ຈາກ 402 ລາຍການ ກວມເອົາ 82,9% ຂອງລາຍການສິນຄ້າ ແລະ ບໍລິການທັງໝົດ ແລະ ກວມເອົານໍ້າໜັກການຊົມໃຊ້ 55,6%. ອັດຕາເງິນເຟີ້ພື້ນຖານ ເດືອນພຶດສະພາ 2023 ຢູ່ໃນລະດັບ 29,6% ແລະ ທຽບເດືອນຜ່ານມາ ເພີ່ມຂຶ້ນ 1,5% ຕົ້ນຕໍແມ່ນການເພີ່ມຂຶ້ນຂອງອາຫານສໍາເລັດຮູບ ແລະ ທາດແປ້ງ, ເຄື່ອງປຸງແຕ່ງອາຫານ, ເຄື່ອງດື່ມບໍ່ແມ່ນເຫຼົ້າ, ໝວດເຫຼົ້າ ແລະ ຢາສູບ, ເຄື່ອງນຸ່ງຫົ່ມ ແລະ ເກີບ, ເຄື່ອງກໍ່ສ້າງ ແລະ ອຸປະກອນສ້ອມແປງເຮືອນ ແລະ ໝວດເຄື່ອງໃຊ້ ໃນເຮືອນ.
ສໍາລັບອັດຕາເງິນເຟີ້ທີ່ບໍ່ແມ່ນພື້ນຖານ ຫຼື ດັດຊະນີລາຄາການຊົມໃຊ້ບໍ່ເປັນພື້ນຖານ ແມ່ນ ຄິດໄລ່ ຈາກ 83 ລາຍການ ກວມເອົາ 17,1% ຂອງລາຍການສິນຄ້າ ແລະ ບໍລິການທັງໝົດ ແລະ ກວມເອົານ້ຳໜັກການຊົມໃຊ້ 44,4%. ອັດຕາເງິນເຟີ້ທີ່ບໍ່ແມ່ນພື້ນຖານ ຂອງເດືອນພຶດສະພາ ຢູ່ໃນລະດັບ 49,5% ແລະ ທຽບເດືອນຜ່ານມາ ເພີ່ມຂຶ້ນ 3,3% ຕົ້ນຕໍແມ່ນການເພີ່ມຂຶ້ນຂອງປະເພດອາຫານສົດ ແລະ ນໍ້າມັນເຊື້ອໄຟ.
ໃນຂະນະທີ່ອັດຕາເງິນເຟີ້ສິນຄ້າພາຍໃນ ແລະ ສິນຄ້ານໍາເຂົ້ ຊຶ່ງອັດຕາເງິນເຟີ້ສິນຄ້າພາຍໃນ ແມ່ນ ຄິດໄລ່ຈາກ 230 ລາຍການ ກວມເອົາ 47,4% ຂອງລາຍການສິນຄ້າ ທັງໝົດ ແລະ ກວມເອົານໍ້າໜັກ 69,3%. ອັດຕາເງິນເຟີ້ສິນຄ້າພາຍໃນເດືອນພຶດສະພາ ຢູ່ໃນລະດັບ 43,6% ແຕ່ຖ້າທຽບໃສ່ເດືອນຜ່ານມາ ເພີ່ມຂຶ້ນ 2,9% ຕົ້ນຕໍແມ່ນຍ້ອນ ການເໜັງຕີງຂອງລາຄາ ປະເພດອາຫານສົດ ເຊັ່ນ: ເຂົ້າສານ, ຊີ້ນ ໂດຍສະເພາະ ແມ່ນຊີ້ນຫມູ, ງົວ ແລະ ຄວາຍ, ລາຄາຄໍາຮູບປະພັນ ເຫຼົ່ານີ້ເປັນຕົ້ນ.
ສໍາລັບອັດຕາເງິນເຟີ້ສິນຄ້ານໍາເຂົ້າ ແມ່ນຄິດໄລ່ຈາກ 255 ລາຍການ ກວມເອົາ 52,6% ຂອງລາຍການ ສິນຄ້າທັງໝົດ ແລະ ກວມເອົານ້ໍາໜັກ 30,7%. ອັດຕາເງິນເຟີ້ສິນຄ້ານໍາເຂົ້າຂອງເດືອນພຶດສະພາ ຢູ່ໃນລະດັບ 29,5% ແລະ ທຽບໃສ່ເດືອນຜ່ານມາ ເພີ່ມຂຶ້ນ 1,5% ຕົ້ນຕໍແມ່ນຍ້ອນການເໜັງຕີງເພີ່ມຂຶ້ນຂອງລາຄານໍ້າມັນເຊື່ອໄຟ, ເຄື່ອງນຸ່ງຫົ່ມ, ເຄື່ອງໃຊ້ໃນເຮືອນ, ເຄື່ອງເອເລັກໂຕຣນິກຕ່າງໆ.
ຂ່າວ-ພາບ: ຄ. ຄຳປະສິດ
