ໃນວັນທີ 10 ມິຖຸນາ 2023 ເຈົ້າໜ້າທີ່ຕໍາຫລວດກວດຄົນເຂົ້າ-ອອກເມືອງ ດ່ານສາກົນຂົວມິດຕະພາບ1 ໄດ້ມອບສົ່ງຜູ້ຖືກຫາ 1 ຄົນ ຊື່ ທ້າວ ສີລະສອນ ຫລື ອາກົງ ອາຍຸ 26 ປີ ເຊື້ອຊາດລາວ-ສັນຊາດ ລາວ, ປັດຈຸບັນຢູ່ບ້ານວັງຊອບ ເມືອງໄຊຍະບູລີ ແຂວງໄຊຍະບູລີ; ທີ່ໄດ້ລົງມືປຸ້ນຄໍາ ທີ່ຮ້ານຄໍາພໍໃຈ ໃນວັນທີ 8 ມິຖຸນາ 2023 ແລ້ວໄດ້ເອົາຕົວຫລົບໜີໄປປະເທດໄທ. ຈາກນັ້ນ, ເຈົ້າໜ້າທີ່ຕໍາຫລວດ ສປປ ລາວ ໄດ້ປະສານສົມທົບກັບເຈົ້າໜ້າທີ່ຕໍາຫລວດ ຣາຊະອານາຈັກໄທ ໃນການຕິດຕາມຈັບຕົວຜູ້ກ່ຽວ ຈົນສາມາດຈັບຕົວຜູ້ກ່ຽວໄດ້ໃນວັນທີ 9 ມິຖຸນາ 2023 ທີ່ເມືອງຂອນແກ່ນ ປະເທດໄທ.
ດັ່ງນັ້ນ, ເຈົ້າໜ້າທີ່ຕໍາຫລວດກວດຄົນເຂົ້າ-ອອກເມືອງ ດ່ານສາກົນຂົວມິດຕະພາບ1 ຣາຊະອານາຈັກໄທ ຈຶ່ງໄດ້ນໍາຕົວທ້າວ ສີລະສອນ ຫລື ອາກົງ ມອບໃຫ້ເຈົ້າໜ້າທີ່ຕໍາຫລວດກວດຄົນເຂົ້າ-ອອກເມືອງ ສປປ ລາວ ເພື່ອນໍາຕົວໄປດໍາເນີນຄະດີຕໍ່ໄປ ກ່າວມອບໂດຍ ພັອ ກິດມົງກຸດ ບູລະນະພັກດີ ຜູ້ກໍາກັບກວດຄົນເຂົ້າ-ອອກ ດ່ານສາກົນຂົວມິດຕະພາບ1 ແລະ ຕາງໜ້າຮັບໂດຍ ພັທ ບຸນແສງ ແສງມະນີ ຮອງຫົວໜ້າຕໍາຫລວດກວດຄົນເຂົ້າ-ອອກເມືອງ ປະຈໍາດ່ານສາກົນຂົວມິດຕະພາບ 1 ພ້ອມດ້ວຍເຈົ້າໜ້າທີ່ຕໍາຫລວດທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ສ່ວນຜູ້ຖືກຫາ ທ້າວ ສີລະສອນ ຫລື ອາກົງ ເຈົ້າໜ້າທີ່ຕໍາຫລວດວິຊາສະເພາະ ສປປ ລາວ ຈະ ສອບສວນ ແລະ ດໍາເນີນຄະດີຕາມກົດໝາຍ. ຕໍ່ກັບເຫດການດັ່ງກ່າວ ຝາກເຖິງຜູ້ປະກອບການຈົ່ງຍົກສູງສະຕິລະວັງຕົວປ້ອງກັນຊັບສິນ ໃນການດໍາເນີນທຸລະກິດຂອງບັນດາທ່ານໃຫ້ດີ ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີ.
ຂໍ້ມູນຈາກ: ໂທລະພາບ ປກສ.
