ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ ໄດ້ຈັດພິທີເຊັນບົດບັນທຶກການຮ່ວມມື ລະຫວ່າງ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ກັບ ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດ ການນຳໃຊ້ຊັບພະຍາກອນຄືນໃໝ່ ຈຳກັດ ແລະ ບໍລິສັດ ລາວທາດຫຼວງລົງທຶນ ພັດທະນາ ຈຳກັດ ໃນວັນທີ 8 ມິຖຸນາ ນີ້ ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ.
ໃຫ້ກຽດເຂົ້າຮ່ວມໃນພິທີ ໂດຍ ທ່ານ ຄຳເຈນ ວົງໂພສີ ລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ສອນປະເສີດ ດາລາວົງ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ທ່ານ ທະນົງໄຊ ຄຸດໄພທູນ ຫົວໜ້າ ຄະນະຄຸ້ມຄອງ ເຂດເສດຖະກິດພິເສດ ນະຄອນຫຼວງວຽງຈັນ, ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດການນຳໃຊ້ຊັບພະຍາກອນຄືນໃໝ່ ຈຳກັດ ແລະ ທ່ານ ຫວງຊີວເວີນ ປະທານບໍລິສັດ ລາວທາດຫຼວງ ລົງທຶນ ພັດທະນາ ຈຳກັດ ພ້ອມດ້ວຍແຂກຖືກເຊີນ; ເປັນກຽດລົງນາມ ໃນບົດບັນທຶກການຮ່ວມມື ເພື່ອເປັນການສົ່ງເສີມ ແລະ ດຶງດູດການລົງທຶນ ໃຫ້ເຂົ້າມາລົງທຶນ ໃນເຂດເສດຖະກິດພິເສດ ບຶງທາດຫຼວງ ແລະ ເຂດພັດທະນາເຕັກໂນໂລຊີ ລະດັບສູງ ຢູ່ເມືອງປາກງື່ມ ນະຄອນຫຼວງວຽງຈັນ ຊຶ່ງຕາງໜ້າລົງນາມ ໂດຍ ທ່ານ ສອນປະເສີດ ດາລາວົງ, ທ່ານ ເສີນກວ່າງປ່ຽວ ແລະ ທ່ານ ຫວງຊີວເວີນ ໂດຍຊ້ອງໜ້າ ທ່ານ ຄຳເຈນ ວົງໂພສີ ພ້ອມດ້ວຍບັນດາແຂກຖືກເຊີນ.
ໃນພິທີ, ທ່ານ ສອນປະເສີດ ດາລາວົງ ໄດ້ກ່າວວ່າ: ການພັດທະນາເຂດເສດຖະກິດພິເສດ ຢູ່ ສປປ ລາວ ໄດ້ເລີ່ມສ້າງຕັ້ງຂຶ້ນໃນປີ 2003 ເປັນຕົ້ນມາໂດຍມາຮອດປັດຈຸບັນ ສປປ ລາວ ມີເຂດເສດຖະກິດພິເສດ ທີ່ໄດ້ຮັບການອະນຸມັດສ້າງຕັ້ງໃນຂອບເຂດ ທົ່ວປະເທດທັງໝົດ ຈຳນວນ 21 ເຂດ ທີ່ຕັ້ງຢູ່ 7 ແຂວງ ຄື: ແຂວງບໍ່ແກ້ວ, ຫຼວງນໍ້າທາ, ອຸດົມໄຊ, ນະຄອນຫຼວງວຽງຈັນ, ຄໍາມ່ວນ, ສະຫວັນນະເຂດ ແລະ ແຂວງຈຳປາສັກ. ໃນນີ້ປະກອບມີ ເຂດອຸດສາຫະກຳ, ເຂດທ່ອງທ່ຽວ, ເຂດການຄ້າ-ການບໍລິການ, ເຂດຂົນສົ່ງ (Logistic) ຊຶ່ງສາມາດດຶງດູດການລົງທຶນໄດ້ 1.235 ວິສາຫະກິດ (ເປັນບໍລິສັດພາຍໃນ 148 ບໍລິສັດ, ຕ່າງປະເທດ 1.033 ບໍລິສັດ ແລະ ພາຍໃນຮ່ວມກັບຕ່າງປະເທດ 54 ບໍລິສັດ). ໄດ້ນໍາໃຊ້ທີ່ດິນຕົວຈິງໃນການພັດທະນາ ພຽງແຕ່ 15 ພັນກວ່າເຮັກຕາ ໂດຍສາມາດສ້າງລາຍຮັບເຂົ້າງົບປະມານຂອງລັດໄດ້ທັງໝົດ 860 ຕື້ກວ່າກີບ. ສາມາດສ້າງວຽກເຮັດງານທຳໄດ້ 63.935 ຄົນ ໃນນັ້ນເປັນແຮງງານ ຕ່າງປະເທດ 30.448 ຄົນ ແລະ ແຮງງານລາວ 33.447 ຄົນ, ໄດ້ນຳເຂົ້າວັດຖຸດິບ, ເຄື່ອງກົນຈັກ ແລະ ອຸປະກອນ ເພື່ອມາຮັບໃຊ້ການຜະລິດ ແລະ ການກໍ່ສ້າງພື້ນຖານໂຄງລ່າງ ມູນຄ່າທັງໝົດ 5,8 ຕື້ກວ່າໂດລາ, ສົ່ງອອກສິນຄ້າ ມີມູນຄ່າທັງໝົດ 3 ຕື້ກວ່າໂດລາ. ສໍາລັບນັກລົງທຶນຈາກ ສປ ຈີນ ທີ່ລົງທຶນໃນເຂດເສດຖະກິດພິເສດ ທີ່ແມ່ນຜູ້ພັດທະນາ ຈາກ ສປ ຈີນ ລົງທຶນ ນັ້ນມີ 6 ເຂດ ຄື: 1) ເຂດເສດຖະກິດພິເສດ ບໍ່ເຕ່ນແດນງາມ, 2) ເຂດເສດຖະກິດພິເສດ ສາມຫຼ່ຽມຄຳ, 3) ເຂດພັດທະນາກວມລວມໄຊເຊດຖາ, 4) ເຂດເສດຖະກິດພິເສດ ບຶງທາດຫວຼງ, 5) ເຂດພັດທະນາເສດຖະກິດໃໝ່ ສີທັນດອນ ແລະ 6) ເຂດວີຕາປາກ. ນອກຈາກນີ້ກໍຍັງມີບັນດາວິສາຫະກິດທີ່ເປັນ ນັກລົງທຶນ ຈາກ ສປ ຈີນ ດໍາເນີນກິດຈະການຢູ່ບັນດາ ຂສພ ອື່ນອີກ ລວມຈຳນວນ 855 ບໍລິສັດ ກວມເອົາ 69,23% ຂອງບັນດາວິສາຫະກິດທີ່ດຳເນີນທຸລະກິດໃນເຂດເສດຖະກິດທົ່ວປະເທດ. ນັກລົງທຶນທີ່ມາຈາກ ສປ ຈີນ ລົງທຶນໃນເຂດເສດຖະກິດພິເສດແມ່ນມີຈຳນວນຫຼາຍພໍສົມຄວນຖ້າທຽບໃສ່ບັນດານັກລົງທຶນປະເທດອື່ນໆ. ໂດຍລວມແລ້ວ ບັນດາວິສາຫະກິດຂອງ ສປ ຈີນ ທີ່ດໍາເນີນທຸລະກິດຢູ່ ໃນເຂດເສດຖະກິດພິເສດ ຂອບເຂດທົ່ວປະເທດກໍເຫັນວ່າມີຂໍ້ສະດວກຫຼາຍດ້ານ ແລະ ມີທ່າອ່ຽງເພີ່ມຂຶ້ນໃນແຕ່ລະປີ, ການເພີ່ມຂຶ້ນດັ່ງກ່າວເຫັນວ່າ ເປັນທ່າອ່ຽງທີ່ດີ ສາເຫດຕົ້ນຕໍແມ່ນການເປີດປະເທດໃນໄລຍະຜ່ານມາ, ເສັ້ນທາງລົດໄຟລາວ-ຈີນ ແລະ ເສັ້ນທາງດ່ວນວຽງຈັນ-ວັງວຽງ ໄດ້ມີການເປີດນຳໃຊ້ຢ່າງເປັນທາງການ ຊຶ່ງເປັນເງື່ອນໄຂໜຶ່ງທີ່ເອື້ອອຳນວຍຄວາມສະດວກໃຫ້ແກ່ນັກລົງທຶນເຂົ້າມາລົງທຶນໃນເຂດເສດຖະກິດພິເສດຫຼາຍຂຶ້ນ, ບວກກັບການປັບປຸງສະພາບແວດລ້ອມຕ່າງໆ ຢູ່ພາຍໃນເຂດເສດຖະກິດພິເສດໃຫ້ມີຄວາມສະດວກສະບາຍ ເປັນຕົ້ນການພັດທະນາພື້ນຖານໂຄງລ່າງຂອງຜູ້ພັດທະນາ, ການແກ້ໄຂບັນຫາຂໍ້ຄົງຄ້າງຕ່າງໆ ແລະ ການປັບປຸງກົນໄກການບໍລິການປະຕູດຽວ.
ອີງໃສ່ທ່າແຮງ ແລະ ບາດກ້າວຂະຫຍາຍຕົວຂອງເຂດເສດຖະກິດພິເສດ ສປປ ລາວ ທີ່ນັບມື້ເພີ່ມຂຶ້ນນັ້ນ, ວຽກງານການດຶງດູດການລົງທຶນ ກໍຖືເປັນວຽກງານໜຶ່ງທີ່ມີຄວາມສໍາຄັນຕໍ່ການປະກອບສ່ວນການພັດທະນາເຂດເສດຖະກິດຂອງຊາດ ກໍຄືການພັດທະນາເຂດເສດຖະກິດພິເສດ ຊຶ່ງໄລຍະຜ່ານມາ ຫຂສພ ພວກເຮົາກໍໃຫ້ຄວາມສຳຄັນໃນການໂຄສະນາດຶງດູດການລົງທຶນທັງພາຍໃນ ແລະ ຕ່າງປະເທດ ເປັນປົກກະຕິ. ສະນັ້ນ, ການລົງນາມບົດບັນທຶກຮ່ວມມື ລະຫວ່າງ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ກະຊວງແຜນການ ແລະ ການລົງທຶນ ກັບ ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດການນຳໃຊ້ຊັບພະຍາກອນຄືນໃໝ່ ຈຳກັດ ແລະ ບໍລິສັດ ລາວທາດຫຼວງລົງທຶນ ພັດທະນາ ຈຳກັດ ໃນມື້ນີ້ ຈະເປັນອີກບາດກ້າວໜຶ່ງທີ່ຈະຊ່ວຍລະດົມທຸລະກິດການລົງທຶນທີ່ມີທ່າແຮງ ເຂົ້າມາລົງທຶນພັດທະນາ ຢູ່ເຂດເສດຖະກິດພິເສດ ໃຫ້ຫຼາຍຂຶ້ນ, ໂດຍສະເພາະແມ່ນຢູ່ ເຂດເສດຖະກິດພິເສດ ບຶງທາດຫຼວງ ແລະ ເຂດພັດທະນາເຕັກໂນໂລຊີລະດັບສູງ ຢູ່ເມືອງປາກງື່ມ ນະຄອນຫຼວງວຽງຈັນ.
(ຂ່າວ-ພາບ: ແສງຈັນ)
