ສື່ມວນຊົນລາວມີພາລະບົດໃນການກະຈາຍຂໍ້ມູນຂ່າວສານສູ່ສັງຄົມທັງພາຍໃນ ແລະ ຕ່າງປະເທດ, ແມ່ນຄວາມສໍາເລັດໃນການຮ່ວມມືລາວ-ຈີນ ໂດຍສະເພາະແມ່ນການປະຕິບັດ ໜຶ່ງແລວ ໜຶ່ງເສັ້ນທາງຢູ່ ສປປ ລາວ, ແມ່ນການຮ່ວມມືລະຫວ່າງສື່ມວນຊົນລາວ ແລະ ສື່ມວນຊົນຈີນ, ສື່ມວນຊົນ ແມ່ນພາຫະນະໃນການຖະແຫຼງຂ່າວທີ່ຈໍາເປັນໃນຊີວິດສັງຄົມ ໂດຍສະເພາະແມ່ນຊີວິດວັດທະນະທໍາ-ສັງຄົມ, ເປັນເຄື່ອງມືອັນແຫຼມຄົມຂອງພັກ, ເປັນປາກ, ເປັນກະບອກສຽງຂອງພັກ-ລັດ ແລະ ປະຊາຊົນ, ພ້ອມດຽວກັນນັ້ນກໍເປັນເວທີແຫ່ງການສົ່ງເສີມປະຊາທິປະໄຕ ປະຊາຊົນລາວບັນດາເຜົ່າ, ຮັບໃຊ້ພາລະກິດປົກປັກຮັກສາ ແລະ ພັດທະນາປະເທດຊາດ, ຕອບໂຕ້ຖ້ອຍທໍານອງຂອງກຸ່ມຄົນບໍ່ດີ, ບັນດາອິດທິກໍາລັງປໍລະປັກ ແລະ ກໍາລັງຫັນປ່ຽນໂດຍສັນຕິຂອງສັດຕູ.
ທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວ ແຫ່ງ ສປປ ລາວ ອະດີດຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ກ່າວໃນພິທີສໍາພາດກ່ຽວກັບຜົນສໍາເລັດການຮ່ວມມືໃນການປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນ ທາງລະຫວ່າງ ສອງຊາດ ລາວ-ຈີນ ໃຫ້ປະຊາຊົນລາວ ແລະ ຈີນ ໄດ້ຮັບຮູ້ ໃນວັນທີ 6 ມິຖຸນາ ຜ່ານມາວ່າ: ປັດຈຸບັນອົງການສື່ມວນຊົນລາວໄດ້ກະຈາຍກັນຢູ່ທັງສູນກາງ ແລະ ທ້ອງຖິ່ນທີ່ມີທັງສື່ແບບດັ່ງເດີມທີ່ສື່ສານລວງດຽວ (ໜັງສືພິມ-ວາລະສານ, ວິທະຍຸ-ໂທລະພາບ-ໂທລະໂຄ່ງ) ແລະ ສື່ໃໝ່ ລວມທັງສື່ອອນລາຍທີ່ ສາມາດສື່ສານໄດ້ສອງລວງ. ນັກຂ່າວສັງກັດຢູ່ທັງພາກລັດ, ອົງການຈັດຕັ້ງມະຫາຊົນ ແລະ ນັກຂ່າວເປັນພົນລະເມືອງ ທີ່ບໍລິການຂໍ້ມູນຂ່າວສານສູ່ສັງຄົມ ແຕ່ຈໍານວນໜຶ່ງຍັງບໍ່ທັນໄດ້ມາລົງທະບຽນຕາມລະບຽບ ແລະ ກົດໝາຍຂອງ ສປປ ລາວ, ຄວາມສໍາເລັດໃນການຮ່ວມມືລາວ-ຈີນ ໂດຍສະເພາະແມ່ນການປະຕິບັດຂໍ້ລິໜຶ່ງແລວ ໜຶ່ງເສັ້ນທາງຢູ່ ສປປ ລາວ, ເປັນຕົ້ນແມ່ນໂຄງການທາງລົດໄຟລາວ-ຈີນ ຊຶ່ງໄດ້ເລີ່ມລົງມືກໍ່ສ້າງໃນເດືອນ ທັນວາ 2016 ແລະ ສໍາເລັດເປີດນໍາໃຊ້ໃນເດືອນທັນວາ 2021 ພາຍຫຼັງການກໍ່ສ້າງສໍາເລັດ ການ ໄປມາຫາສູ່ກັນລະຫວ່າງປະຊາຊົນລາວ-ຈີນ ແລະ ການແລກປ່ຽນສິນຄ້າລະຫວ່າງສອງຊາດກໍນັບມື້ເພີ່ມທະວີ ຄວາມແໜ້ນແຟ້ນຂຶ້ນກວ່າເກົ່າ ຊຶ່ງໄດ້ສ້າງສະພາບແວດລ້ອມທີ່ສະດວກດີຂຶ້ນກວ່າເກົ່າໃຫ້ແກ່ການຮ່ວມມືດ້ານ ເສດຖະກິດ ແລະ ການຄ້າ, ການລົງທຶນ, ພະລັງງານ, ອຸດສາຫະກໍາ, ກະສິກໍາ ແລະ ການທ່ອງທ່ຽວລະຫວ່າງສອງປະເທດ ໝາກຜົນຕົວຈິງທີ່ ສປປ ລາວ ໄດ້ຮັບ ກໍແມ່ນການພັດທະນາພື້ນຖານໂຄງລ່າງ ເຮັດໃຫ້ ສປປ ລາວ ສາມາດເຊື່ອມຈອດເຂົ້າກັບປະເທດໃນອະນຸພາກພື້ນ, ພາກພື້ນ ແລະ ສາກົນ ຊຶ່ງອັນທີ່ພົ້ນເດັ່ນກໍແມ່ນທາງດ່ວນ ແລະ ໂຄງການລົດໄຟຄວາມໄວສູງ ລາວ-ຈີນ ທີ່ເປັນໂຄງການຮ່ວມມືທີ່ໃຫຍ່ທີ່ສຸດ ສໍາລັບ ສປປ ລາວ ພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ.
ພ້ອມດຽວກັນນັ້ນ, ສປປ ລາວ ແລະ ສປ ຈີນ ຍັງໄດ້ຮ່ວມກັນສ້າງ ແລວທາງເສດຖະກິດລາວ-ຈີນ ຊຶ່ງເປັນແລວທາງເສດຖະກິດໃໝ່ເພື່ອເພີ່ມທະວີການເຊື່ອມຈອດດ້ານການຄ້າ- ການລົງທຶນ. ນອກຈາກນີ້, ຂະແໜງການທີ່ກ່ຽວຂ້ອງຂອງ ສປປ ລາວ ຍັງໄດ້ເຂົ້າຮ່ວມໃນຫຼາຍກົນໄກການຮ່ວມມືຂອງຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ເຊັ່ນ: ເສັ້ນທາງສາຍໄໝດີຈີຕອນ, ດ້ານພະລັງງານ, ການທ່ອງທ່ຽວ, ການພັດທະນາສີຂຽວ, ດ້ານສາທາລະນະສຸກ ແລະ ອື່ນໆ.
ທ່ານ ສະຫວັນຄອນ ຣາຊມຸນຕຣີ ຍັງໄດ້ກ່າວຕື່ມອີກວ່າ: ຄວາມຄິດລິເລີ່ມສ້າງ ໜຶ່ງແລວ ໜຶ່ງເສັ້ນທາງ ແມ່ນ ສະເໜີຂຶ້ນໂດຍ ທ່ານ ສີຈິ້ນຜິງ ປະທານປະເທດແຫ່ງ ສປ ຈີນ ໃນປີ 2013 ໂດຍມີເຄົ້າຄວາມຄິດມາຈາກ ເສັ້ນທາງສາຍໄໝບູຮານທີ່ມີປະຫວັດຍາວນານເຖິງ 2 ພັນກວ່າປີແລ້ວ, ໃນຍຸກນັ້ນປະຊາຊົນໃນພາກພື້ນຢູເຣເຊຍ (ເຂດຕໍ່ກັນລະຫວ່າງທະວີບເອເຊຍ ແລະ ເອີຣົບ) ໄດ້ຄົ້ນຫາ ແລະ ເປີດເສັ້ນທາງເພື່ອແລກປ່ຽນການຄ້າຂາຍ ແລະ ແລກປ່ຽນວັດທະນະທໍານໍາກັນ ທັງເປັນການເຊື່ອມໂຍງຄວາມສີວິໄລ ລະຫວ່າງເອເຊຍ-ຢູໂຣບ-ອາຟຣິກາ ຈຶ່ງກາຍມາເປັນເສັ້ນທາງສາຍໄໝທີ່ທົ່ວໂລກຮູ້ຈັກດີ. ນໍ້າໃຈຂອງເສັ້ນທາງສາຍໄໝບູຮານຄືສັນຕິພາບ ແລະ ການຮ່ວມມື, “ ການເປີດກວ້າງ ແລະ ເຊື່ອມໂຍງກັນ, ຮຽນຮູ້ ແລະ ໄດ້ຮັບຜົນປະໂຫຍດຮ່ວມກັນ” ມັນໄດ້ແຜ່ວິວັດທະນາການຈາກຮຸ່ນສູ່ຮຸ່ນ ໄດ້ປະກອບສ່ວນສ້າງຄວາມຜາສຸກ ແລະ ການພັດທະນາໃຫ້ປະເທດຕ່າງໆທີ່ຕັ້ງຢູ່ ຕາມລຽບເສັ້ນທາງຢ່າງຫຼວງຫຼາຍ.ສະນັ້ນ ທ່ານ ສີຈິ້ນຜິງ ຈຶ່ງເປັນຜູ້ລິເລີ່ມ ໜຶ່ງແລວ ໜຶ່ງເສັ້ນທາງໃນປີ 2013 ຈຸດປະສົງ ແມ່ນເພື່ອຍົກລະດັບການຮ່ວມມືໃນພາກພື້ນ ແລະ ການເຊື່ອມຈອດ ລະຫວ່າງທະວີບເພື່ອພັດທະນາຮ່ວມກັນ ແລະ ໄດ້ຮັບຜົນປະໂຫຍດຮ່ວມກັນຂໍ້ລິເລີ່ມນີ້ປະກອບດ້ວຍ 2 ໂຄງການໃຫຍ່, ຄື: ແລວເສດຖະກິດເສັ້ນທາງສາຍ ໄໝ ແລະ ເສັ້ນທາງສາຍໄໝທາງທະເລ ສະຕະວັດທີ 21 ໜຶ່ງແລວ ແມ່ນເນັ້ນການຮວມຕົວກັນຂອງຈີນ ກັບເອເຊຍກາງ, ຣັດເຊຍ ແລະ ເອີຣົບ, ເຊື່ອມໂຍງຈີນກັບອ່າວເປີເຊຍ, ເຂດທະເລເມດີເຕຣາເນ ຜ່ານເອເຊຍກາງ ແລະ ເອເຊຍຕາເວັນຕົກ ເຊື່ອມຈອດຈີນກັບເອເຊຍຕາເວັນອອກສ່ຽງໃຕ້ (ອາຊຽນ) ເອເຊຍໃຕ້ ແລະ ມະຫາສະໝຸດອິນເດຍ; ໜຶ່ງ ເສັ້ນທາງ ແມ່ນຖືກອອກແບບ ແຄມຝັ່ງທະເລຈີນໄປຫາເອີຣົບຜ່ານທະເລຈີນໃຕ້ ແລະ ມະຫາສະມຸດອິນເດຍ ເສັ້ນທາງໜຶ່ງ ແລະ ອີກເສັ້ນທາງໜຶ່ງ ແມ່ນຈາກແຄມຝັ່ງທະເລຈີນຜ່ານທະເລຈີນໃຕ້ໄປຫາມະຫາສະມຸດປາຊີຟິກ, ນີ້ຄືເສັ້ນທາງເຊື່ອມຈອດຂອງໂຄງການໜຶ່ງແລວ ໜຶ່ງເສັ້ນທາງ.
ໂດຍ: ບຸນອູ້ມ
