ຂ່າວຕ່າງປະເທດລາຍງານ ເມື່ອວັນທີ 8 ມິຖຸນາ ຜ່ານມາ, ທ່ານ ຮຸນແຊນ ນາຍົກລັດຖະມົນຕີກຳປູເຈຍກ່າວວ່າ: ກຳປູເຈຍ ກຳລັງຢູ່ໃນເສັ້ນທາງຂອງການຫຼຸດພົ້ນອອກຈາກສະຖານະປະເທດທີ່ພັດທະນານ້ອຍທີ່ສຸດພາຍໃນປີ 2027 ແລະ ຈະບັນລຸເປົ້າໝາຍການເປັນປະເທດທີ່ມີລາຍໄດ້ປານກາງລະດັບສູງພາຍໃນປີ 2030.
ຂະນະດຽວກັນ, ຜູ້ນຳກຳປູເຈຍກ່າວວ່າ: ເສດຖະກິດຂອງປະເທດຟື້ນຕົວດີຕາມລຳດັບ ຫຼັງຈາກຜ່ານພົ້ນການແຜ່ລະບາດຂອງພະຍາດໂຄວິດ-19 ໂດຍໂຕເລກລວມຍອດຜະລິດຕະພັນພາຍໃນປະເທດ (GDP) ມີທ່າອ່ຽງຂະຫຍາຍຕົວ 5,6% ໃນປີນີ້ ເພີ່ມຂຶ້ນຈາກ 5,2% ໃນປີ 2022 ຜ່ານມາ. ທາງດ້ານຂໍ້ມູນຈາກກະຊວງການຄ້າຂອງກຳປູເຈຍລະບຸວ່າ ຂໍ້ຕົກລົງຫຸ້ນສ່ວນທາງດ້ານເສດຖະກິດລະດັບພາກພື້ນ (RCEP), ຂໍ້ຕົກລົງການຄ້າເສລີກຳປູເຈຍ-ຈີນ (CCFTA) ແລະ ຂໍ້ຕົກລົງການຄ້າເສລີກຳປູເຈຍ- ສປປ ເກົາຫຼີ (CKFTA) ຄືປັດໄຈສຳຄັນທີ່ຈະຊ່ວຍໃຫ້ກຳປູເຈຍຫຼຸດພົ້ນອອກຈາກສະຖານະ ແລະ ບັນລຸເປົ້າ ໝາຍທັງໝົດພາຍໃນປີ 2030 ຕະຫຼອດຈົນກາຍເປັນປະເທດທີ່ມີລາຍໄດ້ສູງພາຍໃນປີ 2050.
ນອກຈາກນີ້, ທະນາຄານພັດທະນາອາຊີ (ADB) ລະບຸວ່າ: ກຳປູເຈຍຜ່ານເກນການຫຼຸດພົ້ນອອກຈາກສະຖານະປະເທດທີ່ພັດທະນານ້ອຍທີ່ສຸດຄັ້ງທຳອິດໃນປີ 2021 ຫຼັງຈາກຖືກຈັດຢູ່ໃນກຸ່ມປະເທດດັ່ງກ່າວມາສອງທົດສະວັດ ໂດຍມີແຜນຫຼຸດພົ້ນອອກຈາກສະຖານະນີ້ໄວທີ່ສຸດໃນປີ 2027 ຊຶ່ງຈະເປັນຄວາມສຳເລັດຄັ້ງຍິ່ງໃຫຍ່ທີ່ສະທ້ອນການບັນລຸເປົ້າໝາຍການພັດທະນາເສດຖະກິດ ແລະ ສັງຄົມຢ່າງມີໄລຍະສຳຄັນ.
